ಸಮುದ್ರದಾಳದಲ್ಲಿ ಸಿದ್ಧವಾಗ್ತಿದೆ ಭಾರತದ ರಹಸ್ಯ ಬ್ರಹ್ಮಾಸ್ತ್ರ: ಚೀನಾ-ಪಾಕಿಸ್ತಾನ ಕುತಂತ್ರ ಇನ್ಮುಂದೆ ನಡೆಯಲ್ಲ! Pakistan and China

ನವದೆಹಲಿ: ಹಿಂದೂ ಮಹಾಸಾಗರ ಪ್ರದೇಶದಲ್ಲಿ ಚೀನಾ ಮತ್ತು ಪಾಕಿಸ್ತಾನದ ( Pakistan and China ) ಜಲಾಂತರ್ಗಾಮಿಗಳ ಕಿರಿಕಿರಿ ಹಾಗೂ ಅಕ್ರಮ ನುಸುಳುವಿಕೆಗೆ ಶಾಶ್ವತ ಬ್ರೇಕ್ ಹಾಕಲು ಭಾರತೀಯ ರಕ್ಷಣಾ ಪಡೆಗಳು ಈಗ ಅತ್ಯಂತ ಹೈಟೆಕ್ ರಣತಂತ್ರ ರೂಪಿಸಿವೆ.

ಸಾಗರದ ತಳಭಾಗದಲ್ಲಿ ವೈರಿಗಳ ಪ್ರತಿಯೊಂದು ಚಲನವಲನವನ್ನು ಸೆರೆಹಿಡಿಯಲು ಅತ್ಯಂತ ಅತ್ಯಾಧುನಿಕ ಸೆನ್ಸಾರ್ ನೆಟ್‌ವರ್ಕ್ ಒಂದನ್ನು ಸ್ಥಾಪಿಸಲು ಭಾರತ ಸಜ್ಜಾಗುತ್ತಿದೆ. ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆಯು (DRDO) ದಿನದ 24 ಗಂಟೆಯೂ ಸಾಗರದೊಳಗಿನ ನಿಗೂಢ ಚಟುವಟಿಕೆಗಳನ್ನು ಕಣ್ಗಾವಲು ನಡೆಸಲು ಬೃಹತ್ 'ಫೈಬರ್ ಆಪ್ಟಿಕ್ ಸರ್ವೈಲೆನ್ಸ್ ಗ್ರಿಡ್' ನಿರ್ಮಿಸುವ ಮಹತ್ವದ ಹೆಜ್ಜೆಯನ್ನು ಇಟ್ಟಿದೆ.

ಸಾಗರದ ಆಳದಲ್ಲಿ ಅಳವಡಿಸಲಾಗುವ ಈ ಅತ್ಯಾಧುನಿಕ ವ್ಯವಸ್ಥೆಯನ್ನು 'ಅಂಡರ್‌ವಾಟರ್ ಫೈಬರ್ ಆಪ್ಟಿಕ್ ಸೆನ್ಸಿಂಗ್ ಸಿಸ್ಟಮ್' (Underwater Fibre Optic Sensing System) ಎಂದು ಕರೆಯಲಾಗುತ್ತದೆ. ಕೊಚ್ಚಿ ಮೂಲದ ಡಿಆರ್‌ಡಿಒದ ಪ್ರಮುಖ ಪ್ರಯೋಗಾಲಯವಾದ 'ನೇವಲ್ ಫಿಸಿಕಲ್ ಅಂಡ್ ಓಷಿಯಾನೋಗ್ರಾಫಿಕ್ ಲ್ಯಾಬೋರೇಟರಿ' ಈ ಮೆಗಾ ಪ್ರಾಜೆಕ್ಟ್‌ನ ನೇತೃತ್ವ ವಹಿಸಿಕೊಂಡಿದೆ. ಈ ಸಾಗರದಾಳದ ಗ್ರಿಡ್‌ನ ನಿರ್ಮಾಣ, ನಿಯೋಜನೆ ಮತ್ತು ಕಮಿಷನಿಂಗ್ ಕಾರ್ಯಗಳಿಗಾಗಿ ಸೂಕ್ತ ಪಾಲುದಾರರನ್ನು ಹುಡುಕಲು ಜಾಗತಿಕ ಮಟ್ಟದಲ್ಲಿ ಆಸಕ್ತಿ ಪತ್ರವನ್ನು (EOI) ಈಗಾಗಲೇ ಹೊರಡಿಸಲಾಗಿದೆ.

ಈ ಹೊಸ ತಂತ್ರಜ್ಞಾನದ ಅಡಿಯಲ್ಲಿ, ಸಾಗರದ ತಳಭಾಗದಲ್ಲಿ ಅತ್ಯಂತ ಸೂಕ್ಷ್ಮ ಸಂವೇದನಾ ಸೆನ್ಸಾರ್ ನೋಡ್‌ಗಳನ್ನು ಸ್ಥಾಪಿಸಲಾಗುತ್ತದೆ. ಇವುಗಳನ್ನು ಸಮುದ್ರದಾಳದ ಮೂಲಕವೇ ಸಾಗುವ ಫೈಬರ್ ಆಪ್ಟಿಕ್ ಕೇಬಲ್‌ಗಳ ಸಹಾಯದಿಂದ ಭೂಮಿಯ ಮೇಲಿರುವ ನೌಕಾಸೇನೆಯ ವೀಕ್ಷಣಾ ಕೇಂದ್ರಕ್ಕೆ ಸಂಪರ್ಕಿಸಲಾಗುತ್ತದೆ. ಸಾಗರದೊಳಗಿನ ಸಣ್ಣ ಧ್ವನಿ ಅಥವಾ ಅಲೆಗಳ ಏರುಪೇರನ್ನೂ ಈ ಸೆನ್ಸಾರ್‌ಗಳು ಪತ್ತೆಹಚ್ಚಲಿದ್ದು, ಆ ಮಾಹಿತಿಯನ್ನು ಕರಾವಳಿ ಕೇಂದ್ರಕ್ಕೆ ರವಾನಿಸಲಿವೆ. ಅಲ್ಲಿ ಅತ್ಯಾಧುನಿಕ ತಂತ್ರಜ್ಞಾನದ ಮೂಲಕ ಡೇಟಾವನ್ನು ವಿಶ್ಲೇಷಿಸಿ, ವೈರಿ ದೇಶಗಳ ಸಬ್‌ಮರೀನ್‌ಗಳ ನಿಖರ ಸ್ಥಾನವನ್ನು ಪತ್ತೆಹಚ್ಚಲಾಗುತ್ತದೆ.

ಇತ್ತೀಚಿನ ದಿನಗಳಲ್ಲಿ ಹಿಂದೂ ಮಹಾಸಾಗರ ಪ್ರದೇಶದಲ್ಲಿ ಚೀನಾದ ಪರಮಾಣು ಜಲಾಂತರ್ಗಾಮಿಗಳು ಮತ್ತು ಸಂಶೋಧನಾ ನೌಕೆಗಳ ಹಾವಳಿ ವಿಪರೀತವಾಗಿ ಹೆಚ್ಚಾಗಿದೆ. ಚೀನಾದ ಈ ನೌಕೆಗಳು ಭವಿಷ್ಯದ ಸಬ್‌ಮರೀನ್ ಕಾರ್ಯಾಚರಣೆಗಳಿಗಾಗಿ ರಹಸ್ಯವಾಗಿ ಮಾಹಿತಿ ಕಲೆಹಾಕಲು ಭಾರತದ ಗಡಿಯ ಬಳಿ ಸುಳಿದಾಡುತ್ತಿವೆ. ಇದರೊಂದಿಗೆ, ಚೀನಾ ನಿರ್ಮಿತ ಅತ್ಯಾಧುನಿಕ 'ಹಂಗೋರ್-ಕ್ಲಾಸ್' ಜಲಾಂತರ್ಗಾಮಿಗಳನ್ನು ಪಾಕಿಸ್ತಾನವೂ ಸಾಗರಕ್ಕೆ ಇಳಿಸಿದೆ. ಇವು ವಾರಗಳ ಕಾಲ ಸಮುದ್ರದಾಳದಲ್ಲೇ ಅಡಗಿರಬಲ್ಲ ಸಾಮರ್ಥ್ಯ ಹೊಂದಿದ್ದು, ಭಾರತಕ್ಕೆ ದೊಡ್ಡ ಭದ್ರತಾ ಸವಾಲೊಡ್ಡಿದ್ದವು. ಇದಕ್ಕೆ ಕೌಂಟರ್ ಕೊಡಲು ಈಗ ಭಾರತ ಈ ಸಾಗರದಾಳದ ಹೈಟೆಕ್ ಬೇಹುಗಾರಿಕಾ ಜಾಲವನ್ನು ಹೆಣೆಯುತ್ತಿದೆ.

ಸದ್ಯ ಭಾರತದ ಸ್ವದೇಶಿ ಜಲಾಂತರ್ಗಾಮಿಗಳ ಆಧುನೀಕರಣ ಯೋಜನೆಗಳು ಮತ್ತು ಹೊಸ ಪರಮಾಣು ಸಬ್‌ಮರೀನ್‌ಗಳ ನಿರ್ಮಾಣ ಕಾರ್ಯಗಳು ಹಲವು ವರ್ಷಗಳ ವಿಳಂಬವನ್ನು ಎದುರಿಸುತ್ತಿವೆ. ಇಂತಹ ನಿರ್ಣಾಯಕ ಸಮಯದಲ್ಲಿ, ಡಿಆರ್‌ಡಿಒ ರೂಪಿಸಿರುವ ಈ ಅಂಡರ್‌ವಾಟರ್ ಸಿಸ್ಟಮ್ ಭಾರತೀಯ ನೌಕಾಸೇನೆಗೆ ಆನೆಬಲ ತರಲಿದೆ. ಮೈದಾನದಲ್ಲಿ ಯಾವುದೇ ಅಬ್ಬರವಿಲ್ಲದೆ, ಸಾಗರದ ಅಲೆಗಳ ಅಡಿಯಲ್ಲಿ ಅತ್ಯಂತ ಸೈಲೆಂಟ್‌ ಆಗಿ ದಿನದ 24 ಗಂಟೆಯೂ ನಿರಂತರ ಕಣ್ಗಾವಲು ನಡೆಸುವ ಮೂಲಕ, ವೈರಿ ದೇಶಗಳ ಯಾವುದೇ ಕುತಂತ್ರಗಳು ಭಾರತದ ಗಡಿಯೊಳಗೆ ನಡೆಯದಂತೆ ತಡೆಯಲು ಈ ತಂತ್ರಜ್ಞಾನ ನೌಕಾಸೇನೆಗೆ ಬ್ರಹ್ಮಾಸ್ತ್ರವಾಗಲಿದೆ, (ಏಜೆನ್ಸೀಸ್​).