ಮಹಾರಾಷ್ಟ್ರದಲ್ಲಿ ಆಪರೇಷನ್ ಟೈಗರ್ ಸೌಂಡ್!...ವೈರಲ್ ಆಯ್ತು ಉದ್ಧವ್ ಬಣದ ರೆಬೆಲ್ ಸಂಸದರ ಮೀಟಿಂಗ್ ಫೋಟೋ | Operation Tiger

ವೈರಲ್ ಆಗಿರುವ ಈ ಫೋಟೋದಲ್ಲಿ ಹಿಂಗೋಲಿ ಸಂಸದ ನಾಗೇಶ್ ಪಾಟೀಲ್ ಅಷ್ಟೀಕರ್, ಯಾವತ್ಮಲ್​ ಸಂಸದ ಸಂಜಯ್ ದೇಶ್‌ಮುಖ್ ಮತ್ತು ಈಶಾನ್ಯ ಮುಂಬೈ ಸಂಸದ ಸಂಜಯ್ ದಿನಾ ಪಾಟೀಲ್ ಒಟ್ಟಿಗೆ ಕುಳಿತು ಚರ್ಚಿಸುತ್ತಿರುವುದು ಕಂಡುಬಂದಿದೆ. ಆಪರೇಷನ್ ಟೈಗರ್‌ನ ಭಾಗವಾಗಿಯೇ ಈ ನಾಯಕರು ಸಭೆ ಸೇರಿದ್ದಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿದ್ದು, ಈ ಭೇಟಿಯ ಅಧಿಕೃತ ಉದ್ದೇಶ ಇನ್ನೂ ಸ್ಪಷ್ಟವಾಗಿಲ್ಲದಿದ್ದರೂ, ಇದರ ಸಮಯ ಮಾತ್ರ ಉದ್ಧವ್ ಬಣದಲ್ಲಿ ತಲ್ಲಣ ಸೃಷ್ಟಿಸಿದೆ.

ಇತ್ತೀಚೆಗೆ ನವದೆಹಲಿಯಲ್ಲಿ ಉದ್ಧವ್ ಠಾಕ್ರೆ ನೇತೃತ್ವದಲ್ಲಿ ನಡೆದ ಶಿವಸೇನಾ (UBT) ಸಂಸದೀಯ ಸಭೆಗೆ ಪಕ್ಷದ ಒಟ್ಟು 9 ಲೋಕಸಭಾ ಸಂಸದರ ಪೈಕಿ 6 ಸಂಸದರು ಗೈರುಹಾಜರಾಗಿದ್ದರು. ನಾಗೇಶ್ ಅಷ್ಟೀಕರ್, ಸಂಜಯ್ ದೇಶ್‌ಮುಖ್, ಸಂಜಯ್ ಜಾಧವ್, ಸಂಜಯ್ ದಿನಾ ಪಾಟೀಲ್, ಓಂಪ್ರಕಾಶ್ ರಾಜೇನಿಂಬಾಳ್ಕರ್ ಮತ್ತು ಭೌಸಾಹೇಬ್ ವಾಕಚೌರೆ ಗೈರಾದ ಪ್ರಮುಖರಾಗಿದ್ದಾರೆ. ಈ ನಾಯಕರೆಲ್ಲರೂ ಒಟ್ಟಾಗಿ ಏಕನಾಥ್ ಶಿಂದೆ ನೇತೃತ್ವದ ಶಿವಸೇನೆ ಹಾಗೂ ಎನ್‌ಡಿಎ (NDA) ಮೈತ್ರಿಕೂಟದತ್ತ ಮುಖ ಮಾಡಿದ್ದಾರೆ ಎಂಬ ಚರ್ಚೆಗಳು ರಾಜಕೀಯ ವಲಯದಲ್ಲಿ ಜೋರಾಗಿವೆ.

ಶಿವಸೇನೆಯ 60ನೇ ಸಂಸ್ಥಾಪನಾ ದಿನಾಚರಣೆಯ ಸಂದರ್ಭದಲ್ಲಿ ಮಾತನಾಡಿದ ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರ ಹೇಳಿಕೆ ಈ ವದಂತಿಗಳಿಗೆ ಮತ್ತಷ್ಟು ಬಲ ನೀಡಿದೆ. ಉದ್ಧವ್ ಠಾಕ್ರೆ ವಿರುದ್ಧ ವಾಗ್ದಾಳಿ ನಡೆಸಿದ ಶಿಂಧೆ, ಎಲ್ಲರೂ ನಮ್ಮತ್ತಲೇ ನೋಡುತ್ತಿದ್ದಾರೆ, ಏಕನಾಥ್ ಶಿಂಧೆ ಏನು ಹೇಳಬಹುದು ಮತ್ತು ಯಾರು ವೇದಿಕೆಗೆ ಬರಬಹುದು ಎಂದು ಕಾಯುತ್ತಿದ್ದಾರೆ. ಇದು ಕೇವಲ ಟ್ರೈಲರ್ ಅಷ್ಟೇ, ಅಸಲಿ ಸಿನಿಮಾ ಇನ್ನು ಮುಂದೆ ಬರಲಿದೆ ಎಂದು ಮಾರ್ಮಿಕವಾಗಿ ನುಡಿದಿದ್ದಾರೆ. ಅವರು ನೇರವಾಗಿ ಆಪರೇಷನ್ ಟೈಗರ್ ಎಂದು ಹೆಸರಿಸದಿದ್ದರೂ, ವಿರೋಧ ಪಕ್ಷದ ಸಂಸದರನ್ನು ಸೆಳೆಯುವ ಮುನ್ಸೂಚನೆಯನ್ನು ಈ ಮೂಲಕ ನೀಡಿದ್ದಾರೆ ಎನ್ನಲಾಗುತ್ತಿದೆ.

2022ರಲ್ಲಿ ಏಕನಾಥ್ ಶಿಂದೆ ಅವರು ಉದ್ಧವ್ ಠಾಕ್ರೆ ವಿರುದ್ಧ ಬಂಡಾಯ ಎದ್ದು ಅಂತಿಮವಾಗಿ ಅಧಿಕೃತ ಶಿವಸೇನೆಯನ್ನು ತಮ್ಮದಾಗಿಸಿಕೊಂಡ ಇತಿಹಾಸವಿರುವ ಕಾರಣ, ಇಂದಿನ ಫೈವ್​ಸ್ಟಾರ್​ ಹೋಟೆಲ್ ಸಭೆಯ ಫೋಟೋ ಮಹಾರಾಷ್ಟ್ರ ರಾಜಕೀಯದಲ್ಲಿ ದೊಡ್ಡ ತಲ್ಲಣವನ್ನೇ ಸೃಷ್ಟಿಸಿದೆ ಎನ್ನುವುದರಲ್ಲಿ ಎರಡನೇ ಮಾತಿಲ್ಲ(ಏಜೆನ್ಸೀಸ್​).