ಮೀನು ಹಿಡಿಯಲು ಹೋದ ಯುವಕನಿಗೆ ಸಾವಿನ ಭಯ ತೋರಿಸಿದ ಆಕ್ಟೋಪಸ್: ಬದುಕಿದ್ದೇ ರೋಚಕ! ಇಲ್ಲಿದೆ ವೈರಲ್​ ವಿಡಿಯೋ...Octopus

ಮನಿಲಾ: ಫಿಲಿಪ್ಪೈನ್ಸ್‌ನಲ್ಲಿ ನಡೆದ ಸಾಮಾನ್ಯ ಮೀನುಗಾರಿಕೆಯೊಂದು ಜೀವಭಯ ಹುಟ್ಟಿಸುವ ಕರಾಳ ಅನುಭವವಾಗಿ ಬದಲಾದ ಪ್ರಸಂಗ ಜರುಗಿದೆ. ಜೆಸ್ಸೆರ್​ ಸರ್ವಾಂಟೆಸ್ ಹೆಸರಿನ ಮೀನುಗಾರನ ಮೇಲೆ ಆಕ್ಟೋಪಸ್‌ವೊಂದು ( Octopus ) ಅನಿರೀಕ್ಷಿತವಾಗಿ ದಾಳಿ ನಡೆಸಿದ್ದು, ಆತನ ಮುಖ ಹಾಗೂ ತಲೆಗೆ ತನ್ನ ಬಲವಾದ ಸ್ಪರ್ಶತಂತುಗಳಿಂದ ಬಿಗಿದುಕೊಂಡ ಭಯಾನಕ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ಜುಲೈ 10ರಂದು ಪಾಲವಾನ್ ದ್ವೀಪದ ಪೋರ್ಟೊ ಪ್ರಿನ್ಸೆಸಾ ಬಳಿ ಜೆಸ್ಸೆರ್​ ಸರ್ವಾಂಟೆಸ್ ತಮ್ಮ ಮರದ ಪುಟ್ಟ ದೋಣಿಯಲ್ಲಿ ಮೀನು ಹಿಡಿಯುತ್ತಿದ್ದಾಗ ಈ ಘಟನೆ ನಡೆದಿದೆ. ಸರ್ವಾಂಟೆಸ್​ ಅವರು ಸಮುದ್ರದಿಂದ ಹೊರತೆಗೆದ ಆಕ್ಟೋಪಸ್, ಅವರ ಕೈಯಿಂದ ತಪ್ಪಿಸಿಕೊಳ್ಳಲು ಹೆಣಗಾಡುತ್ತಾ ಅನಿರೀಕ್ಷಿತವಾಗಿ ಅವರ ಮುಖವನ್ನೇ ಹಿಡಿದುಕೊಂಡಿತು.

ಆಕ್ಟೋಪಸ್‌ನ ದೃಢವಾದ ಮತ್ತು ಜಿಗುಟಾದ ಹೀರುವ ಕಪ್‌ಗಳು (Suckers) ಆತನ ಚರ್ಮದ ಮೇಲೆ ಬಲವಾಗಿ ಅಂಟಿಕೊಂಡಿದ್ದವು. ಇದರಿಂದಾಗಿ ಜೆಸ್ಸರ್ ಉಸಿರಾಡಲು ಪರದಾಡಬೇಕಾಯಿತು ಮತ್ತು ಆ ಪ್ರಾಣಿಯನ್ನು ಮುಖದಿಂದ ಕಳಚಿಕೊಳ್ಳಲು ಅವರು ನಡೆಸಿದ ಪ್ರಯತ್ನಗಳು ಆರಂಭದಲ್ಲಿ ವಿಫಲಗೊಂಡವು. ಆಕ್ಟೋಪಸ್ ತನ್ನ ಬಾಯಿಯನ್ನು ಸಂಪೂರ್ಣವಾಗಿ ಮುಚ್ಚಿದ್ದರಿಂದ ಉಸಿರುಗಟ್ಟುವ ವಾತಾವರಣ ನಿರ್ಮಾಣವಾಗಿತ್ತು ಎಂದು ಸ್ವತಃ ಮೀನುಗಾರ ವಿವರಿಸಿದ್ದಾರೆ.

ಈ ಭಯಾನಕ ಪರಿಸ್ಥಿತಿಯಿಂದ ಪಾರಾಗಲು ಜೆಸ್ಸರ್ ಬಿದಿರಿನ ತುಂಡನ್ನು ಬಳಸಿ ಹೋರಾಟ ನಡೆಸಬೇಕಾಯಿತು. ಆಕ್ಟೋಪಸ್ ತನ್ನ ಹಿಡಿತವನ್ನು ಬಿಡಿಸಲು ನಿರಾಕರಿಸಿದಾಗ, ಅವರು ಬಿದಿರಿನಿಂದ ಆ ಪ್ರಾಣಿಯ ಮೇಲೆ ಹಲವು ಬಾರಿ ಹೊಡೆದು ತನ್ನ ಮುಖದಿಂದ ಅದನ್ನು ಬೇರ್ಪಡಿಸಲು ಹರಸಾಹಸ ಪಟ್ಟರು.

ಅಂತಿಮವಾಗಿ ಸಾಕಷ್ಟು ಹೆಣಗಾಡಿದ ನಂತರ ಆಕ್ಟೋಪಸ್ ತನ್ನ ಹಿಡಿತವನ್ನು ಸಡಿಲಗೊಳಿಸಿತು. ತಕ್ಷಣವೇ ಎಚ್ಚೆತ್ತುಕೊಂಡ ಜೆಸ್ಸರ್ ಆ ಸಮುದ್ರ ಜೀವಿಯನ್ನು ಮರಳಿ ನೀರಿನಲ್ಲೇ ಎಸೆದು ನಿಟ್ಟುಸಿರು ಬಿಟ್ಟರು. ಸಣ್ಣ ಗಾತ್ರದ ಆಕ್ಟೋಪಸ್ ಕೂಡ ಎಷ್ಟು ಅಪಾಯಕಾರಿ ಹಾಗೂ ಬಲಶಾಲಿಯಾಗಿರಬಲ್ಲುದು ಎಂಬುದಕ್ಕೆ ಈ ಘಟನೆ ಒಂದು ತಾಜಾ ಉದಾಹರಣೆಯಾಗಿದೆ.

ಅಂದಹಾಗೆ, ಆಕ್ಟೋಪಸ್‌ಗಳ ಮೃದುವಾದ ದೇಹ ಮತ್ತು ನೂರಾರು ಹೀರುವ ಕಪ್‌ಗಳನ್ನು ಹೊಂದಿರುವ ತೋಳುಗಳು ಅತ್ಯಂತ ಬಲವಾದ ಹಿಡಿತವನ್ನು ಸಾಧಿಸಲು ಸಹಾಯ ಮಾಡುತ್ತವೆ. ಅವುಗಳ ನರವ್ಯೂಹ ಮತ್ತು ವಿಶಿಷ್ಟ ರಚನೆಯಿಂದಾಗಿ ಬೇಟೆಯನ್ನು ಅಥವಾ ಇನ್ಯಾವುದೇ ವಸ್ತುವನ್ನು ಸೆರೆಹಿಡಿಯಲು ಇವುಗಳಿಗೆ ಅಸಾಧಾರಣ ಶಕ್ತಿ ಇರುತ್ತದೆ ಎಂಬುದನ್ನು ಈ ಘಟನೆ ಮತ್ತೊಮ್ಮೆ ಸಾಬೀತುಪಡಿಸಿದೆ, (ಏಜೆನ್ಸೀಸ್​).