ಸಂಗೀತ ದಿಗ್ಗಜ ಜುಬೀನ್ ಗಾರ್ಗ್​ ಸಾವು ಪ್ರಕರಣ; ಡಿ. 12ರಂದು ನ್ಯಾಯಾಲಯಕ್ಕೆ ಚಾರ್ಜ್​ಶೀಟ್ ಸಲ್ಲಿಸಲಿರುವ ಎಸ್​ಐಟಿ | Zubeen Garg

ಗುವಾಹಟಿ: ಸಂಗೀತ ದಿಗ್ಗಜ ಜುಬೀನ್ ಗಾರ್ಗ್(Zubeen Garg) ಸಾವು ಪ್ರಕರಣದ ವಿಶೇಷ ತನಿಖಾ ತಂಡದ (ಎಸ್‌ಐಟಿ) ತನಿಖೆ ಕೊನೆಯ ಹಂತದಲ್ಲಿದ್ದು, ಡಿಸೆಂಬರ್ 12 ರಂದು ನ್ಯಾಯಾಲಯಕ್ಕೆ ಆರೋಪಪಟ್ಟಿ ಸಲ್ಲಿಸಲಿದೆ ಎಂದು ಶನಿವಾರ(ಡಿ. 06) ವರದಿಯಾಗಿದೆ.

ಈ ಕುರಿತು ಮಾಧ್ಯಮಗಳೊಂದಿಗೆ ಮಾತನಾಡಿರುವ ಎಸ್‌ಐಟಿ ಮುಖ್ಯಸ್ಥ ಮತ್ತು ವಿಶೇಷ ಡಿಜಿಪಿ ಪ್ರಸಾದ್ ಗುಪ್ತಾ, ತನಿಖೆ ಪೂರ್ಣಗೊಳ್ಳುವ ಹಂತದಲ್ಲಿದೆ. ನಾವು ಡಿಸೆಂಬರ್ 12 ರಂದು ನ್ಯಾಯಾಲಯದಲ್ಲಿ ಪ್ರಕರಣದ ಆರೋಪಪಟ್ಟಿ ಸಲ್ಲಿಸುತ್ತೇವೆ. ಏಳು ಜನರನ್ನು ಬಂಧಿಸಿದ್ದೇವೆ ಮತ್ತು 300 ಕ್ಕೂ ಹೆಚ್ಚು ಜನರ ಹೇಳಿಕೆಗಳನ್ನು ದಾಖಲಿಸಿದ್ದೇವೆ ಎಂದು ಹೇಳಿದ್ದಾರೆ.

ಶುಕ್ರವಾರ ಮಾತನಾಡಿದ್ದ ಅಸ್ಸಾಂ ಸಿಎಂ ಹಿಮಂತ ಬಿಸ್ವಾ ಶರ್ಮಾ, ಎಸ್‌ಐಟಿ ಆರೋಪಪಟ್ಟಿ ಸಲ್ಲಿಸುವ ಪ್ರಕ್ರಿಯೆಯಲ್ಲಿದೆ. ಸುಮಾರು 3,000 ರಿಂದ 3,500 ದಾಖಲೆಗಳಿಗೆ ಸಹಿ ಹಾಕಬೇಕು. ಮತ್ತು ಜೆರಾಕ್ಸ್ ಮಾಡಬೇಕು ಎಂದು ಎಸ್‌ಐಟಿ ನನಗೆ ತಿಳಿಸಿದೆ. ನಾವು ಅಡ್ವೊಕೇಟ್ ಜನರಲ್ ಜೊತೆ ಮಾತನಾಡಿದ್ದೇವೆ ಎಂದು ತಿಳಿಸಿದ್ದಾರೆ.

ಈಗಾಗಲೇ ವಿಧಾನಸಭೆಯಲ್ಲಿ ಹೇಳಿದಂತೆ ಜುಬೀನ್ ಅವರದ್ದು ಕೊಲೆ, ಒಬ್ಬ ವ್ಯಕ್ತಿ ಗಾರ್ಗ್ ಅವರನ್ನು ಕೊಲೆ ಮಾಡಿದ್ದಾನೆ. ಮತ್ತು ಇತರರು ಸಹಕರಿಸಿದ್ದಾರೆ. ಇದು ಸರಳ ಕೊಲೆ ಎಂದು ತಮ್ಮ ಮಾತನ್ನು ಮತ್ತೊಮ್ಮೆ ಪುನರುಚ್ಚರಿಸಿದ್ದಾರೆ.

ವಿವರಗಳನ್ನು ನೀಡದ ಸಿಎಂ ಶರ್ಮಾ, ಗಾರ್ಗ್ ಅವರ ಕೊಲೆ ಒಂದು ದೊಡ್ಡ ಪಿತೂರಿ. ಕೋವಿಡ್ ಸಾಂಕ್ರಾಮಿಕ ರೋಗಕ್ಕೂ ಮೊದಲೇ ಇದು ಪ್ರಾರಂಭವಾಗಿದೆ. ಸಾವು ಹಣಕಾಸಿನ ವಿಷಯಗಳಿಗೆ ಸಂಬಂಧಿಸಿದೆ. ನಮ್ಮಲ್ಲಿ ಪುರಾವೆಗಳಿವೆ. ಅದಕ್ಕಾಗಿಯೇ ನಾನು ಎಸ್‌ಐಟಿಗೆ ಮೊದಲು ಕೊಲೆ ಪ್ರಕರಣದ ಆರೋಪಪಟ್ಟಿ ಸಲ್ಲಿಸಿ ನಂತರ ಯಾರೂ ತಪ್ಪಿಸಿಕೊಳ್ಳದಂತೆ ತನಿಖೆಯನ್ನು ವಿಸ್ತರಿಸಲು ಹೇಳಿದೆ ಎಂದು ಹೇಳಿದ್ದಾರೆ.

ಸೆ. 19ರಂದು ಈಶಾನ್ಯ ಭಾರತ ಉತ್ಸವದಲ್ಲಿ ಭಾಗವಹಿಸಲು ಸಿಂಗಾಪುರಕ್ಕೆ ತೆರಳಿದ್ದ ಜುಬೀನ್ ಗಾರ್ಗ್ ಅವರು, ಅಲ್ಲಿ ಸಮುದ್ರದಲ್ಲಿ ಈಜಾಡುತ್ತಿದ್ದಾಗ ಮೃತಪಟ್ಟಿದ್ದರು. ಪ್ರಕರಣ ಸಂಬಂಧ ಈಗಾಗಲೇ ಅವರ ಮ್ಯಾನೇಜರ್ ಸೇರಿ ಏಳು ಮಂದಿಯನ್ನು ಬಂಧಿಸಲಾಗಿದೆ (ಏಜೆನ್ಸೀಸ್).