ಖುಷಿ ಸುದ್ದಿ ನೀಡಿದ ಉಪಗ್ರಹ ಚಿತ್ರ: ಇಡೀ ದೇಶವನ್ನೇ ಆವರಿಸುತ್ತಿರುವ ಕಣ್ಮರೆಯಾಗಿದ್ದ ಮಳೆ ಮೋಡಗಳು...! Monsoon Returns

Monsoon Returns : ದೇಶಾದ್ಯಂತ ವರುಣನ ಆರ್ಭಟ ಕೊಂಚ ತಣ್ಣಗಾಗಿರುವ ಬೆನ್ನಲ್ಲೇ ಭಾರತೀಯ ಹವಾಮಾನ ಇಲಾಖೆ (IMD) ಸಾರ್ವಜನಿಕರಿಗೆ ಸಿಹಿ ಸುದ್ದಿಯೊಂದನ್ನು ನೀಡಿದೆ.

ಹೌದು, ಭಾರತದಲ್ಲಿ ಮುಂಗಾರು ಮಾರುತಗಳು ಮತ್ತೆ ಭಾರಿ ಪ್ರಮಾಣದಲ್ಲಿ ಸಕ್ರಿಯಗೊಳ್ಳುತ್ತಿವೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಇತ್ತೀಚೆಗೆ ಇಸ್ರೋ (ISRO) ಸಂಸ್ಥೆಯ ಇನ್ಸಾಟ್-3ಡಿಆರ್ (INSAT-3DR) ಉಪಗ್ರಹವು ದೇಶದ ಹವಾಮಾನದ ಚಿತ್ರಗಳನ್ನು ಸೆರೆಹಿಡಿದಿದ್ದು, ಈ ಉಪಗ್ರಹ ಚಿತ್ರಗಳ ಪ್ರಕಾರ ಭಾರತದ ಒಟ್ಟು ಭೂಭಾಗದ ಸುಮಾರು ಎರಡು ತೃತೀಯಾಂಶದಷ್ಟು (ಮೂರನೇ ಎರಡು ಭಾಗ) ಪ್ರದೇಶದಲ್ಲಿ ದಟ್ಟವಾದ ಕಾರ್ಮೋಡಗಳು ಆವರಿಸಿರುವುದು ಪತ್ತೆಯಾಗಿದೆ. ಈ ಹಿನ್ನೆಲೆಯಲ್ಲಿ ಮುಂಬರುವ ದಿನಗಳಲ್ಲಿ ದೇಶದ ಹಲವು ರಾಜ್ಯಗಳಲ್ಲಿ ಭಾರಿಯಿಂದ ಅತಿ ಭಾರಿ ಮಳೆಯಾಗುವ ಸಾಧ್ಯತೆ ದಟ್ಟವಾಗಿದೆ.

ಉಪಗ್ರಹದ ದತ್ತಾಂಶಗಳ ಪ್ರಕಾರ ಪ್ರಸ್ತುತ ಜಮ್ಮು ಮತ್ತು ಕಾಶ್ಮೀರದಿಂದ ಹಿಡಿದು ಗಂಗಾ ನದಿ ಬಯಲು ಪ್ರದೇಶ, ಬಿಹಾರ, ಪಶ್ಚಿಮ ಬಂಗಾಳ ಹಾಗೂ ಈಶಾನ್ಯ ಭಾರತದ ರಾಜ್ಯಗಳವರೆಗೂ ಇಡೀ ಆಕಾಶವು ದಟ್ಟವಾದ ಮೋಡಗಳಿಂದ ಮುಚ್ಚಿಹೋಗಿದೆ. ಈ ಸಕ್ರಿಯ ಮುಂಗಾರು ವ್ಯವಸ್ಥೆಯು ಕೃಷಿ ವಲಯಕ್ಕೆ ಹೊಸ ಭರವಸೆ ಮೂಡಿಸಿದ್ದು, ಜಲಾಶಯಗಳ ಒಳಹರಿವು ಹೆಚ್ಚಾಗಲು ಸಹಕಾರಿಯಾಗಲಿದೆ. ಮುಂಬರುವ ದಿನಗಳಲ್ಲಿ ವರುಣನ ಅಬ್ಬರ ಜೋರಾಗಲಿರುವ ಕಾರಣ ಹವಾಮಾನ ಇಲಾಖೆಯು ಆಯಾ ರಾಜ್ಯಗಳ ಮುನ್ನೆಚ್ಚರಿಕೆ ಕ್ರಮಗಳನ್ನು ಪರಿಶೀಲಿಸುವಂತೆ ಮತ್ತು ಸಾರ್ವಜನಿಕರು ಅಗತ್ಯ ಜಾಗರೂಕತೆ ವಹಿಸುವಂತೆ ಸೂಚನೆ ನೀಡಿದೆ.

ಉಪಗ್ರಹದ ದತ್ತಾಂಶಗಳ ಆಳವಾದ ವಿಶ್ಲೇಷಣೆಯ ಪ್ರಕಾರ, ಸದ್ಯ ದೇಶದ ಪ್ರಮುಖ ರಾಜ್ಯಗಳಾದ ಪಂಜಾಬ್, ಉತ್ತರ ಪ್ರದೇಶ, ಬಿಹಾರ ಮತ್ತು ಪಶ್ಚಿಮ ಬಂಗಾಳದಲ್ಲಿ ಮೋಡಗಳ ಸಾಂದ್ರತೆಯು ಅತ್ಯಂತ ಗರಿಷ್ಠ ಮಟ್ಟದಲ್ಲಿದೆ. ಹವಾಮಾನ ಇಲಾಖೆಯ ವರದಿಯ ಅನ್ವಯ, ಅರಬ್ಬಿ ಸಮುದ್ರದಿಂದ ಬೀಸುತ್ತಿರುವ ತೇವಾಂಶಭರಿತ ಮಾರುತಗಳ ಪ್ರಭಾವದಿಂದಾಗಿ ಭಾರತದ ದಕ್ಷಿಣ ದ್ವೀಪಕಲ್ಪ ಪ್ರದೇಶದಲ್ಲೂ ಸಹ ದಟ್ಟವಾದ ಮೋಡಗಳು ಸೃಷ್ಟಿಯಾಗತೊಡಗಿವೆ. ಇಸ್ರೋ (ISRO) ಸಂಸ್ಥೆಯ ಇತ್ತೀಚಿನ ವಿಶ್ಲೇಷಣೆಯ ಪ್ರಕಾರ, ಪ್ರಸ್ತುತ ದೇಶದ ಒಟ್ಟು ಭೂಭಾಗದ ಸುಮಾರು ಶೇ. 60 ರಿಂದ 70 ರಷ್ಟು ಪ್ರದೇಶವು ಮೋಡ ಕವಿದ ವಾತಾವರಣದಿಂದ ಆವೃತವಾಗಿದೆ.

ಆದಾಗ್ಯೂ, ಮೋಡಗಳು ಆವರಿಸಿರುವ ಎಲ್ಲಾ ಪ್ರದೇಶಗಳಲ್ಲೂ ಒಂದೇ ಸಮನಾದ ಮಳೆಯಾಗುವುದಿಲ್ಲ ಎಂದು ಹವಾಮಾನ ತಜ್ಞರು ಸ್ಪಷ್ಟಪಡಿಸಿದ್ದಾರೆ. ವಾತಾವರಣದ ತೀರ ಎತ್ತರದ ಪ್ರದೇಶಗಳಲ್ಲಿ ರೂಪುಗೊಳ್ಳುವ ತಂಪಾದ ಚಂಡಮಾರುತದ ಮೋಡಗಳು ಇರುವ ಜಾಗಗಳಲ್ಲಿ ಮಾತ್ರವೇ ಭಾರಿ ಮಳೆ ಮತ್ತು ಗುಡುಗು ಸಹಿತ ಚಂಡಮಾರುತ ಸಂಭವಿಸುವ ಸಾಧ್ಯತೆಯಿದೆ. ಹೀಗಾಗಿ ಮೋಡಗಳ ಸಾಂದ್ರತೆ ಹೆಚ್ಚಿದ್ದರೂ, ಆಯಾ ಪ್ರದೇಶದ ಸ್ಥಳೀಯ ಹವಾಮಾನ ಪರಿಸ್ಥಿತಿಗಳ ಆಧಾರದ ಮೇಲೆ ಮಳೆಯ ತೀವ್ರತೆ ನಿರ್ಧಾರವಾಗಲಿದೆ ಎಂದು ಇಲಾಖೆ ತಿಳಿಸಿದೆ.

ಭೂಮಿಯಿಂದ ಬರೋಬ್ಬರಿ 36,000 ಕಿಲೋಮೀಟರ್ ಎತ್ತರದ ಭೂಸ್ಥಿರ ಕಕ್ಷೆಯಲ್ಲಿರುವ ಇನ್ಸಾಟ್-3ಡಿಆರ್ (INSAT-3DR) ಉಪಗ್ರಹವು ಪ್ರತಿ ಅರ್ಧ ಗಂಟೆಗೊಮ್ಮೆ ಭೂಮಿಯ ಹವಾಮಾನ ಚಿತ್ರಗಳನ್ನು ಕಳುಹಿಸುತ್ತದೆ. ಈ ಅತ್ಯಾಧುನಿಕ ಉಪಗ್ರಹ ಚಿತ್ರಗಳ ಆಧಾರದ ಮೇಲೆಯೇ ಭಾರತೀಯ ಹವಾಮಾನ ಇಲಾಖೆಯು (IMD) ಮಳೆಯ ಮುನ್ಸೂಚನೆ ಮತ್ತು ತೀವ್ರತೆಯನ್ನು ಅಂದಾಜಿಸುತ್ತದೆ. ಈ ಉಪಗ್ರಹದಲ್ಲಿರುವ ಇನ್‌ಫ್ರಾರೆಡ್ ಸೆನ್ಸಾರ್ ಮೋಡಗಳ ಮೇಲ್ಭಾಗದ ತಾಪಮಾನವನ್ನು ನಿಖರವಾಗಿ ಅಳೆಯುತ್ತದೆ. ಮೋಡಗಳ ಮೇಲ್ಭಾಗವು ಎಷ್ಟು ಎತ್ತರದಲ್ಲಿರುತ್ತದೆಯೋ, ಅಷ್ಟು ತಾಪಮಾನ ಕುಸಿಯುತ್ತದೆ ಮತ್ತು ಅಂತಹ ಮೋಡಗಳನ್ನು ಅತ್ಯಂತ ಅಪಾಯಕಾರಿ ಹಾಗೂ ಭಾರಿ ಮಳೆ ತರುವ ಮೋಡಗಳು ಎಂದು ಪರಿಗಣಿಸಲಾಗುತ್ತದೆ.

ಜುಲೈ 19 ರಂದು ಸೆರೆಹಿಡಿಯಲಾದ ಉಪಗ್ರಹ ಚಿತ್ರಗಳ ಪ್ರಕಾರ, ಜಮ್ಮು ಮತ್ತು ಕಾಶ್ಮೀರದ ಮೇಲಿರುವ ಮೋಡಗಳ ಮೇಲ್ಭಾಗದ ತಾಪಮಾನವು ಮೈನಸ್ 80 ಡಿಗ್ರಿ ಸೆಲ್ಸಿಯಸ್‌ನಷ್ಟು ಕನಿಷ್ಠ ಮಟ್ಟಕ್ಕೆ ಕುಸಿದಿರುವುದು ದಾಖಲಾಗಿದೆ. ಇದರೊಂದಿಗೆ ಉತ್ತರ ಪ್ರದೇಶ, ಬಿಹಾರ, ಜಾರ್ಖಂಡ್, ಈಶಾನ್ಯ ಭಾರತದ ರಾಜ್ಯಗಳು ಮತ್ತು ದಕ್ಷಿಣ ಭಾರತದ ಕೆಲವು ಭಾಗಗಳಲ್ಲಿ ಮೋಡಗಳ ತಾಪಮಾನವು ಮೈನಸ್ 50 ಡಿಗ್ರಿ ಸೆಲ್ಸಿಯಸ್‌ಗಿಂತಲೂ ಕೆಳಗೆ ದಾಖಲಾಗಿದೆ. ಮತ್ತೊಂದೆಡೆ, ಮುಂಗಾರು ದ್ರೋಣ ರೇಖೆಯು ಪ್ರಸ್ತುತ ಇಡೀ ಉತ್ತರ ಭಾರತವನ್ನು ಆವರಿಸಿರುವುದರಿಂದ, ಮುಂಬರುವ ದಿನಗಳಲ್ಲಿ ಉತ್ತರ ಭಾರತದ ರಾಜ್ಯಗಳಲ್ಲಿ ವಿನಾಶಕಾರಿ ಹಾಗೂ ಭಾರಿ ಮಳೆಯಾಗುವ ಸಾಧ್ಯತೆಗಳು ದಟ್ಟವಾಗಿವೆ ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ, (ಏಜೆನ್ಸೀಸ್​).