ಲಕ್ಷ ಲಕ್ಷ ಸಂಬಳದ ಉದ್ಯೋಗಕ್ಕೆ ಗುಡ್​ ಬೈ ಹೇಳಿ ಬೆಂಗಳೂರಲ್ಲಿ ಆಟೋ ಚಾಲಕನಾದ ವ್ಯಕ್ತಿ! auto driver

ಬೆಂಗಳೂರು: ಲಕ್ಷಾಂತರ ಸಂಬಳ ಪಡೆಯುವ ಉದ್ಯೋಗವನ್ನು ಬಿಟ್ಟು ಸ್ವಂತ ಉದ್ಯಮ ಮಾಡುತ್ತಿರುವ ಸಾಕಷ್ಟು ವ್ಯಕ್ತಿಗಳ ಬಗ್ಗೆ ಕೇಳಿದ್ದೇವೆ ಮತ್ತು ಕಂಡಿದ್ದೇವೆ. ಆದರೆ, ಕಾರ್ಪೋರೇಟ್​ ಕಂಪನಿಯಲ್ಲಿ ಲಕ್ಷ ಲಕ್ಷ ಸಂಬಳ ಪಡೆಯುತ್ತಿದ್ದ ವ್ಯಕ್ತಿಯೊಬ್ಬ ಬೆಂಗಳೂರಲ್ಲಿ ಸಾಮಾನ್ಯ ಆಟೋ ಚಾಲಕನಾಗಿರುವ ( auto driver ) ಬಗ್ಗೆ ಎಂದಾದರೂ ಕೇಳಿದ್ದೀರಾ? ಕೇಳಿಲ್ಲ ಅಂದರೆ, ನಾವಿಂದು ನಿಮಗೆ ಪರಿಚಯಿಸುತ್ತೇವೆ ನೋಡಿ.

ಹೌದು, ರಾಕೇಶ್​ ಎಂಬುವರು ಹೆಚ್ಚು ಸಂಬಳ ಪಡೆಯುವ ಕಾರ್ಪೊರೇಟ್ ಉದ್ಯೋಗವನ್ನು ತ್ಯಜಿಸಿ, ಆಟೋ ಚಾಲಕನಾಗಿ ಹೊಸ ಜೀವನ ಆರಂಭಿಸುತ್ತಿರುವ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ಹಣವೇ ಮುಖ್ಯವಲ್ಲ, ಹಣದಿಂದಾಚೆಗೆ ಹೆಚ್ಚಿನ ಗುರಿಗಳನ್ನು ಹೊಂದಬೇಕು ಮತ್ತು ಯಾವುದೇ ಬಿಕ್ಕಟ್ಟುಗಳಿಗೆ ಎದೆಗುಂದಬಾರದು ಎಂಬ ಸಂದೇಶವನ್ನು ಸಾರಿರುವ ರಾಕೇಶ್​, ಸಾವಿರಾರು ಜನರಿಗೆ ಸ್ಫೂರ್ತಿ ನೀಡಿದ್ದಾರೆ.

ಏನೇ ಆಗಲಿ ಮುಂದೆ ಸಾಗು ಎಂಬುದೇ ನನ್ನ ಜೀವನ ಮಂತ್ರ. ನನ್ನ ದಾರಿಯಲ್ಲಿ ಬರುವ ಯಾವುದೇ ಸವಾಲುಗಳನ್ನು ನಾನು ಎದುರಿಸುತ್ತೇನೆ. ಈ ಜಗತ್ತಿನಲ್ಲಿ ಹಣ ಅತ್ಯಗತ್ಯವಾದರು ಕೂಡ ಅದೇ ಜೀವನದಲ್ಲಿ ಏಕೈಕ ಮುಖ್ಯ ವಿಷಯವೆಂದು ನಾನು ನಂಬುವುದಿಲ್ಲ ಎಂದು ರಾಕೇಶ್​ ಹೇಳಿದ್ದಾರೆ.

ಒಂದು ಹಂತದಲ್ಲಿ ನನ್ನ ಜೀವನ ಸಂಪೂರ್ಣವಾಗಿ ಕುಸಿದು ಬಿತ್ತು. ಮತ್ತೆ ಮೊದಲಿನಂತೆ ಆಗುವುದಿಲ್ಲ ಎಂದು ಭಾವಿಸಿ ನಾನು ಭರವಸೆ ಕಳೆದುಕೊಂಡೆ. ಆದರೆ, ಯಾವುದೇ ಹಿನ್ನಡೆ ಬಂದಾಗ ಅದರಿಂದ ಹೇಗೆ ಚೇತರಿಸಿಕೊಳ್ಳುವುದು ಎಂಬುದು ತುಂಬಾನೇ ಮುಖ್ಯ. ಜೀವನವನ್ನು ಮತ್ತೆ ಶುರು ಮಾಡಲು ನನಗೀಗ ಭಯವಿಲ್ಲ. ನಾನೀಗ ಆಟೋ ಓಡಿಸುತ್ತಿದ್ದೇನೆ. ಜೀವನ ಇಲ್ಲಿಗೆ ಮುಗಿಯುವುದಿಲ್ಲ. ನನ್ನ ದಾರಿಯಲ್ಲಿ ಏನೇ ಬಂದರೂ ನಾನು ಎದುರಿಸುತ್ತೇನೆ. ನನಗೆ ಯಾವುದೇ ಭಯವಿಲ್ಲ ಎಂದಿದ್ದಾರೆ. ನನ್ನ ಈ ಮಾತುಗಳು ಜೀವನದಲ್ಲಿ ಸೋತು ಕುಳಿತಿರುವವರಿಗೆ ಎಂದು ರಾಕೇಶ್​ ವಿಡಿಯೋದ ಆರಂಭದಲ್ಲಿ ತಿಳಿಸಿದ್ದಾರೆ.

ಜೀವನವನ್ನು ಸಮತೋಲನದಲ್ಲಿಡುವ ಬಗ್ಗೆಯೂ ರಾಕೇಶ್​ ಸಲಹೆ ನೀಡಿದ್ದಾರೆ. ಜೀವನದಲ್ಲಿ ಹಣ ಮುಖ್ಯ ಆದರೆ, ಅದೊಂದೇ ನಿಮಗೆ ಬೇಕಾಗಿರುವುದು ಎಂದು ಭಾವಿಸಬೇಡಿ. ಜೀವನದಲ್ಲಿ ಅದಕ್ಕಿಂತ ಮುಖ್ಯವಾದ ಇನ್ನೂ ಅನೇಕ ವಿಷಯಗಳಿವೆ. ಹಣದ ಹಿಂದೆ ಬೀಳಬೇಡಿ. ಸಾಕಷ್ಟು ಜನರು ಸಣ್ಣ ಪುಟ್ಟ ಕೆಲಸಗಳನ್ನು ಮಾಡಿ ಸಂತೋಷದಿಂದ ಬದುಕುತ್ತಿದ್ದಾರೆ. ಈ ವಿಚಾರವನ್ನು ಅರಿತುಕೊಂಡಾಗ ನನಗೆ ಒಂದು ರೀತಿಯ ಸ್ವಾತಂತ್ರ್ಯವನ್ನು ನೀಡುತ್ತದೆ ಎಂದು ರಾಕೇಶ್​ ಅವರು ಸ್ಫೂರ್ತಿದಾಯಕ ಮಾತುಗಳನ್ನು ಆಡಿದ್ದಾರೆ, (ಏಜೆನ್ಸೀಸ್​).