ಐಫೆಲ್ ಟವರ್​ಗೆ ಹಿಂದೂ ಸನ್ಯಾಸಿಗಳ ಭೇಟಿ ವೇಳೆ ಮಹಿಳೆಯರ ಸೈಡ್​ಲೈನ್​ಗೆ ಸೂಚನೆ; ಪ್ಯಾರಿಸ್​ನಲ್ಲಿ ಭಾರಿ ವಿವಾದ; ಟವರ್ ಬಂದ್ | Eiffel Tower

ನವದೆಹಲಿ: ಬೋಚಸನ್ವಾಸಿ ಅಕ್ಷರ ಪುರುಷೋತ್ತಮ ಸ್ವಾಮಿನಾರಾಯಣ ಸಂಸ್ಥೆಗೆ ಸಂಬಂಧಿಸಿದ 100 ಹಿಂದೂ ಸನ್ಯಾಸಿಗಳ ನಿಯೋಗದ ಭೇಟಿ ಸಮಯದಲ್ಲಿ ಐತಿಹಾಸಿಕ ಐಫೆಲ್ ಟವರ್​ನ(Eiffel Tower) ಮಹಿಳಾ ಉದ್ಯೋಗಿಗಳನ್ನು ಸ್ಥಳದಿಂದ ಬೇರೆ ಕಡೆ ಹೋಗುವಂತೆ ಸೂಚಿಸಿದ ಬಗ್ಗೆ ವಿವಾದ ಹುಟ್ಟಿಕೊಂಡಿದ್ದು, ಸಿಬ್ಬಂದಿ ಸೋಮವಾರ(ಸೆ. 07) ಇಡೀ ದಿನ ಸಾರ್ವಜನಿಕರಿಗೆ ಟವರ್ ಬಂದ್ ಮಾಡಿ ಪ್ರತಿಭಟನೆ ನಡೆಸಿದ್ದಾರೆ ಎಂದು ವರದಿಯಾಗಿದೆ.

ಹಿಂದೂ ಸನ್ಯಾಸಿಗಳ ಭೇಟಿ ವೇಳೆ ಮಹಿಳೆ ಉದ್ಯೋಗಿಗಳನ್ನು ಸೈಡ್​ಲೈನ್​ಗೆ ಸೂಚಿಸಿದ ಘಟನೆ ಬಗ್ಗೆ ಫ್ಯಾನ್ಸ್​ನಲ್ಲಿ ಆಕ್ರೋಶ ಹುಟ್ಟು ಹಾಕಿದ್ದು, ವಿದೇಶಿ ಸಂದರ್ಶಕರು ಟವರ್ ವೀಕ್ಷಣೆ ಸಮಯದಲ್ಲಿ ಮಹಿಳೆಯರು ಸ್ಥಳದಲ್ಲಿರಬಾರದು ಎಂಬುದನ್ನು ಯಾವುದೇ ಕಾರಣಕ್ಕೂ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಇದು ನಮ್ಮ ಗಣರಾಜ್ಯದ ನಿಲುವಿಗೆ ವಿರುದ್ಧ, ಲಿಂಗ ತಾರತಮ್ಯ ಎಂದು ಸ್ಥಳೀಯರು, ರಾಜಕಾರಣಿಗಳು ಘಟನೆಯನ್ನು ಖಂಡಿಸಿದ್ದಾರೆ.

ಐತಿಹಾಸಿಕ ಟವರ್ ಬಂದ್ ಬಗ್ಗೆ ನಿರ್ವಹಣೆ ಸಂಸ್ಥೆಯಾದ ಎಸ್​ಇಟಿಇ ಪ್ರತಿಕ್ರಿಯೆ ನೀಡಿದ್ದು, ಅಸಾಧಾರಣ ಸಂದರ್ಭಗಳಿಂದ ಸೋಮವಾರ ಐಫೆಲ್ ಟವರ್​ ಅನ್ನು ಮುಚ್ಚಲಾಗಿದೆ ಎಂದು ಹೇಳಿದೆ. ಶನಿವಾರ ಫ್ರಾನ್ಸ್‌ನಲ್ಲಿ ಹೊಸ ದೇವಾಲಯವನ್ನು ಉದ್ಘಾಟಿಸಿದ ಬಿಎಪಿಎಸ್​ ಹಿಂದೂ ಚಳವಳಿಗೆ ಸಂಬಂಧಿಸಿದ ಸುಮಾರು 100 ಸನ್ಯಾಸಿಗಳ ಗುಂಪೊಂದು ಟವರ್​​​ಗೆ ಭೇಟಿ ನೀಡಿದ ಬಳಿಕ ಈ ಘಟನೆ ನಡೆದಿದೆ.

ಈ ಕುರಿತು ಮಾತನಾಡಿರುವ ಯೂನಿಯನ್ ಪ್ರತಿನಿಧಿ ಡಯೇನ್ ಡಾವೊಯಿನ್, ಶನಿವಾರ ಹಿಂದೂ ಸನ್ಯಾಸಿಗಳ ನಿಯೋಗದ ಭೇಟಿಯ ಸಮಯದಲ್ಲಿ ಅವರು ಹಾದುಹೋದಾಗ ಮಹಿಳಾ ಕಾರ್ಮಿಕರನ್ನು ಅವರ ಕೆಲಸದ ಸ್ಥಳಗಳಿಂದ ದೂರ ಸ್ಥಳಾಂತರಿಸಲಾಯಿತು ಎಂದು ಹೇಳಿದ್ದಾರೆ. ಮತ್ತು ಮಹಿಳೆಯರು ಎಂಬ ಕಾರಣಕ್ಕೆ ಅವರನ್ನು ಸ್ಥಳದಿಂದ ಹೊರ ಹೋಗುವಂತೆ ಸೂಚಿಸಿದ್ದಕ್ಕೆ ಖಂಡಿಸಿದ್ದಾರೆ.

ಭಾರತದ ಬಿಎಪಿಎಸ್ ಸನ್ಯಾಸಿಗಳ ನಿಯೋಗದ ಟವರ್ ವೀಕ್ಷಣೆ ವೇಳೆ ಮಹಿಳೆಯರೊಂದಿಗಿನ ಸಂವಹನವನ್ನು ಮಿತಿಗೊಳಿಸುವ ರೀತಿಯಲ್ಲಿ ಭೇಟಿಯನ್ನು ಆಯೋಜಿಸಬೇಕೆಂದು ಹಿಂದೂ ನಿಯೋಗ ವಿನಂತಿಸಿತ್ತು ಎಂದು ಟವರ್ ನಿರ್ವಹಣೆ ಸಂಸ್ಥೆ ಎಸ್​ಇಟಿಇ ಹೇಳಿದ್ದು, ನಾವು ಈ ಷರತ್ತುಗಳನ್ನು ಒಪ್ಪಿಕೊಳ್ಳಬಾರದಿತ್ತು ಎಂದಿದೆ.

ಮಹಿಳಾ ಉದ್ಯೋಗಿಗಳನ್ನು ಸ್ಥಳದಿಂದ ಬೇರೆಡೆ ಸ್ಥಳಾಂತರಿಸಿದ ಬಗ್ಗೆ ಹುಟ್ಟಿಕೊಂಡಿರುವ ವಿವಾದದ ಬಗ್ಗೆ ಸೋಮವಾರ(ಸೆ. 07) ಪ್ರತಿಕ್ರಿಯಿಸಿರುವ ಬಿಎಪಿಎಸ್, ನಮ್ಮ ನಿಯೋಗದ ಭೇಟಿಯಿಂದ ವ್ಯಕ್ತಪಡಿಸಲಾದ ಕಳವಳಗಳನ್ನು ನಾವು ಅರ್ಥಮಾಡಿಕೊಂಡಿದ್ದೇವೆ ಮತ್ತು ಅವುಗಳನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸುತ್ತೇವೆ. ಆದಾಗ್ಯೂ, ಉಂಟಾದ ಯಾವುದೇ ನೋವು ಅಥವಾ ಅನಾನುಕೂಲಕ್ಕಾಗಿ ನಾವು ಪ್ರಾಮಾಣಿಕವಾಗಿ ಕ್ಷಮೆ ಯಾಚಿಸುತ್ತೇವೆ ಎಂದು ಹೇಳಿದೆ.

ನಮ್ಮ ನಿಯೋಗದ ಗಾತ್ರವನ್ನು ಗಮನದಲ್ಲಿಟ್ಟುಕೊಂಡು, ಇತರ ಸಂದರ್ಶಕರಿಗೆ ಉಂಟಾಗಬಹುದಾದ ಅಡಚಣೆಯನ್ನು ಸಾಧ್ಯವಾದಷ್ಟು ಕಡಿಮೆ ಮಾಡಲು, ಈ ಭೇಟಿಯನ್ನು ಐಫೆಲ್ ಟವರ್ ತಂಡಗಳ ಸಹಯೋಗದೊಂದಿಗೆ ಸಾರ್ವಜನಿಕರಿಗೆ ಪ್ರವೇಶಾವಕಾಶ ಆರಂಭವಾಗುವ ಸಮಯದಲ್ಲೇ ಆಯೋಜಿಸಲಾಗಿತ್ತು. ನಮಗೆ ತಿಳಿದಿರುವಂತೆ, ಯಾವುದೇ ಹಂತದಲ್ಲಿಯೂ ಯಾರಿಗೂ ಐಫೆಲ್ ಟವರ್‌ಗೆ ಪ್ರವೇಶವನ್ನು ನಿರಾಕರಿಸಲಾಗಿಲ್ಲ. ಪರಸ್ಪರ ಗೌರವ ಮತ್ತು ಸೇವೆಯ ಸಾರ್ವತ್ರಿಕ ಮೌಲ್ಯಗಳಲ್ಲಿ ನಾವು ನಂಬಿಕೆ ಹೊಂದಿದ್ದೇವೆ ಎಂದು ತಿಳಿಸಿದೆ.

ಮಹಿಳೆಯರನ್ನು ಸ್ಥಳಾಂತರದ ಬಗ್ಗೆ ಉಂಟಾದ ವಿವಾದದ ಬಗ್ಗೆ ಪ್ಯಾರಿಸ್ ಮೇಯರ್ ಎಮ್ಯಾನುಯೆಲ್ ಗ್ರೆಗೊಯಿರ್ ಅವರು ಎಕ್ಸ್​​ನಲ್ಲಿ ಆಕ್ರೋಶ ವ್ಯಕ್ತಪಡಿಸಿದ್ದು, ಐಫೆಲ್ ಟವರ್‌ನ ಉದ್ಯೋಗಿಗಳಲ್ಲಿನ ಆಕ್ರೋಶದ ಬಗ್ಗೆ ತಮಗೆ ತಿಳಿದಿದೆ. ಅಂತಹ ಷರತ್ತುಗಳನ್ನು ಒಪ್ಪಿರುವುದು ಸ್ವೀಕಾರಾರ್ಹವಲ್ಲ ಎಂದು ಕಿಡಿಕಾರಿದ್ದಾರೆ (ಏಜೆನ್ಸೀಸ್).