ಧುರಂಧರ್ 2 ನಲ್ಲಿ ಪ್ರಧಾನಿ ಮೋದಿ ಎಂಟ್ರಿ: ಥಿಯೇಟರ್‌ಗಳಲ್ಲಿ ಶಿಳ್ಳೆ, ಚಪ್ಪಾಳೆಗಳ ಸುರಿಮಳೆ; ವಿಡಿಯೋ ವೈರಲ್​! PM Narendra Modi in Dhurandhar 2

ಬಾಲಿವುಡ್​: ಬಹುನಿರೀಕ್ಷಿತ ಧುರಂಧರ್ 2: ದಿ ರಿವೆಂಜ್ ಸಿನಿಮಾ ಇಂದು (ಮಾರ್ಚ್​ 19) ತೆರೆಕಂಡಿದ್ದು, ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿದೆ. ಆದರೆ ಸಿನಿಮಾದ ಕಥೆಗಿಂತ ಹೆಚ್ಚಾಗಿ ಈಗ ಸೋಷಿಯಲ್ ಮೀಡಿಯಾದಲ್ಲಿ ಚರ್ಚೆಯಾಗುತ್ತಿರುವುದು ಸಿನಿಮಾದಲ್ಲಿನ ಆ ಎರಡು ಅನಿರೀಕ್ಷಿತ ಸನ್ನಿವೇಶಗಳು.

ಹೌದು, ನಿರ್ದೇಶಕ ಆದಿತ್ಯ ಧರ್ ತಮ್ಮ ಸಿನಿಮಾದಲ್ಲಿ ಪ್ರಧಾನಿ ನರೇಂದ್ರ ಮೋದಿ (PM Narendra Modi in Dhurandhar 2) ಅವರ ನೈಜ ತುಣುಕುಗಳನ್ನು ಬಳಸಿಕೊಂಡಿದ್ದು, ಸಿನಿಮಾ ಮಂದಿರಗಳೇ ಅಕ್ಷರಶಃ ಹಬ್ಬದ ಮೈದಾನಗಳಾಗಿ ಬದಲಾಗಿವೆ.

ಸಿನಿಮಾದ ಕಥೆಯ ಓಟದಲ್ಲಿ ಪ್ರಧಾನಿ ಮೋದಿ ಅವರ ಎರಡು ಐತಿಹಾಸಿಕ ಕ್ಷಣಗಳನ್ನು ಬಳಸಿಕೊಳ್ಳಲಾಗಿದೆ. ಮೊದಲನೆಯದಾಗಿ, 2014ರಲ್ಲಿ ನರೇಂದ್ರ ಮೋದಿ ಅವರು ಮೊದಲ ಬಾರಿಗೆ ಪ್ರಧಾನಿಯಾಗಿ ಪ್ರಮಾಣವಚನ ಸ್ವೀಕರಿಸಿದ ದೂರದರ್ಶನದ ದೃಶ್ಯ. ಎರಡನೆಯದಾಗಿ, 2016ರಲ್ಲಿ ದೇಶಾದ್ಯಂತ ಸಂಚಲನ ಮೂಡಿಸಿದ್ದ ನೋಟು ಅಮಾನ್ಯೀಕರಣದ (Demonetization) ಭಾಷಣದ ತುಣುಕುಗಳನ್ನುಬಳಸಿಕೊಳ್ಳಲಾಗಿದೆ.

ಪರದೆಯ ಮೇಲೆ ಪ್ರಧಾನಿ ಮೋದಿ ಅವರ ಮುಖ ಕಾಣುತ್ತಿದ್ದಂತೆಯೇ ಪ್ರೇಕ್ಷಕರು ಜೈಕಾರ ಹಾಕುತ್ತಾ, ಶಿಳ್ಳೆ ಹೊಡೆಯುತ್ತಾ ಸಂಭ್ರಮಿಸುತ್ತಿರುವ ವಿಡಿಯೋಗಳು ಈಗ X (ಟ್ವಿಟರ್) ಸೇರಿದಂತೆ ಎಲ್ಲಾ ಕಡೆ ವೈರಲ್ ಆಗುತ್ತಿವೆ.

ಒಬ್ಬ ಬಳಕೆದಾರರು ಬರೆದಿರುವಂತೆ, ಮೋದಿ ಜಿ ಸ್ಕ್ರೀನ್ ಮೇಲೆ ಬರುತ್ತಿದ್ದಂತೆ ಇಡೀ ಥಿಯೇಟರ್ ಅಕ್ಷರಶಃ ಕಂಪಿಸಿತು. ಅವರ ಜನಪ್ರಿಯತೆ ಎಂತದ್ದು ಅನ್ನೋದು ಆ ಕ್ಷಣದಲ್ಲಿ ಸಾಬೀತಾಯ್ತು. ಪ್ರೇಕ್ಷಕರು ಹರ್ಷೋದ್ಗಾರದೊಂದಿಗೆ ಚಪ್ಪಾಳೆ ತಟ್ಟುತ್ತಿರುವುದು ಚಿತ್ರತಂಡಕ್ಕೂ ದೊಡ್ಡ ಬೂಸ್ಟ್ ನೀಡಿದೆ ಎಂದು ಬರೆದುಕೊಂಡಿದ್ದಾರೆ.

ಸಿನಿಮಾದ ಈ ಪ್ರಯೋಗಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದ್ದರೂ, ಸೋಷಿಯಲ್ ಮೀಡಿಯಾದಲ್ಲಿ ಸಣ್ಣ ಮಟ್ಟದ ಪರ-ವಿರೋಧದ ಚರ್ಚೆ ಕೂಡ ಶುರುವಾಗಿದೆ. ಕೆಲವರು ಸಿನಿಮಾದಲ್ಲಿ ನೋಟು ನಿಷೇಧದ ಪ್ರಸ್ತಾಪ ಬೇಕಿತ್ತೇ? ಎಂದು ಪ್ರಶ್ನಿಸಿದ್ದಾರೆ. ಇನ್ನು ಸಿನಿಮಾ ಬಿಡುಗಡೆಗೂ ಮುನ್ನವೇ ಸೆನ್ಸಾರ್ ಮಂಡಳಿಯಿಂದ A ಪ್ರಮಾಣಪತ್ರ ಪಡೆದುಕೊಂಡಿದ್ದು ಮತ್ತು ಹಲವು ದೃಶ್ಯಗಳಿಗೆ ಕತ್ತರಿ ಬಿದ್ದಿದ್ದು ಕೂಡ ಸುದ್ದಿಯಾಗಿತ್ತು,(ಏಜನ್ಸೀಸ್).