ದೇವಭೂಮಿಯಲ್ಲಿ ಶಾಂತಿ ಸ್ಥಾಪನೆ: ಸತತ ಮಾತುಕತೆ ಯಶಸ್ವಿ; ನಿಹಾಂಗ್ ಸಿಖ್ಖರ ಹಿಡಿತದಿಂದ ಮುಕ್ತವಾದ ನಗರಸು ಗುರುದ್ವಾರ! Nihang Sikhs in Nagarsu Gurudwara

ರುದ್ರಪ್ರಯಾಗ: ಪಾರ್ಕಿಂಗ್​ಗಾಗಿ ಪ್ರಾರಂಭವಾದ ಚಿಕ್ಕ ಗಲಾಟೆ ಗುರುದ್ವಾರವನ್ನು ತಮ್ಮ ಹಿಡಿತಕ್ಕೆ ತೆಗೆದುಕೊಳ್ಳುವ ಮಟ್ಟಿಗಿನ ಉದ್ವಿಗ್ನ ಘಟನೆ ಉತ್ತರಾಖಂಡ ರಾಜ್ಯದ ರುದ್ರಪ್ರಯಾಗನಲ್ಲಿ ನಡೆದಿತ್ತು.

ಶನಿವಾರ (ಜೂ. 20) ನಗರಸು ಗುರುದ್ವಾರವನ್ನು ತಮ್ಮ ಹಿಡಿತಕ್ಕೆ ತೆಗೆದುಕೊಂಡಿದ್ದ ನಿಹಾಂಗ್​ ಸಿಖ್​ಗಳು (Nihang Sikhs in Nagarsu Gurudwara) ನಿನ್ನೆ (ಮಂಗಳವಾರ, ಜೂ.23) ಮಾತುಕತೆಗೆ ಒಪ್ಪಿದ್ದು ಗುರುದ್ವಾರವನ್ನು ತೊರೆಯುವುದಾಗಿ ಭರವಸೆ ನೀಡಿದ್ದಾರೆ.

ಕಳೆದ ನಾಲ್ಕು ದಿನಗಳಿಂದ ನಗರಸು ಗುರುದ್ವಾರವನ್ನು ತಮ್ಮ ಹಿಡಿತಕ್ಕೆ ತೆಗೆದುಕೊಂಡಿದ್ದ ನಿಹಾಂಗ್​ ಸಿಖ್​ರು, ಪೊಲೀಸರಿಂದ ಬಂಧಿತರಾದ ತಮ್ಮ ಸಂಗಡಿಗರ ಬಿಡುಗಡೆಗೆ ಪಟ್ಟು ಹಿಡಿದು, ಗುರುದ್ವಾರದಲ್ಲಿದ್ದ ಭಕ್ತರನ್ನು ಬಂಧಿಗಳನ್ನಾಗಿಸಿ ಕೊಂಡಿದ್ದರು. ನಂತರ ನಿಹಾಂಗ್​ಗಳನ್ನು ಸಮಾಧಾನ ಪಡಿಸಲು, ಸ್ಥಳೀಯ ಆಡಳಿತಾಧಿಕಾರಿಗಳು, ಪೊಲೀಸ್​ ವರಿಷ್ಟಾಧಿಕಾರಿಗಳು ಹಾಗೂ ಅರೆ ಮಿಲಿಟರಿ ಪಡೆಯನ್ನು ಸ್ಥಳಕ್ಕೆ ರವಾನಿಸಲಾಗಿತ್ತು.

ಜೂನ್​ 16 ರಂದು ಕರ್ಣಪ್ರಯಾಗದಲ್ಲಿ ಪಾರ್ಕಿಂಗ್​ಗಾಗಿ ಸ್ಥಳೀಯರೊಂದಿಗೆ ನಿಹಾಂಗ್​ ಸಿಖ್​ರ ಜಗಳವಾಗಿತ್ತು. ಸ್ಥಳೀಯರು, ನಿಹಾಂಗ್​ಗಳು ತಮ್ಮ ತಲ್ವಾರ್​ ಮತ್ತು ಕೃಪಾಣಗಳ ಮೂಲಕ ಹಲ್ಲೆ ನಡೆಸಿದ್ದಾರೆಂದು ಪೊಲೀಸರಿಗೆ ದೂರನ್ನು ನೀಡಿದ್ದು, ನಾಲ್ಕು ಜನ ನಿಹಾಂಗ್​ಗಳನ್ನು ಬಂಧಿಸಲಾಗಿತ್ತು.

ಈ ಘಟನೆ ಬಳಿಕ ನಗರಸು ಗುರುದ್ವಾರಕ್ಕೆ ಮರಳಿದ ನಿಹಾಂಗ್​ಗಳು ನಾಳೆ ಪಂಜಾಬ್​ನಿಂದ ಹೋರಾಟಗಾರರು ಬರಲಿದ್ದಾರೆ ನಮಗೆ 50-60 ಕೋಣೆಗಳನ್ನು ವ್ಯವಸ್ಥೆ ಮಾಡಿ ಎಂದು ಗುರುದ್ವಾರ ಆಡಳಿತ ಮಂಡಳಿಗೆ ಕೇಳಿಕೊಂಡಿದ್ದರು. ಆದರೆ ಅವರ ಈ ಮನವಿ ಅಂಗೀಕಾರವಾಗದ ಹಿನ್ನಲೆ ಗುರುದ್ವಾರವನ್ನೇ ತಮ್ಮ ಹಿಡಿತಕ್ಕೆ ತೆಗೆದುಕೊಂಡಿದ್ದರು, (ಏಜನ್ಸೀಸ್​).