ಕೇರಳ ಚುನಾವಣಾ ಫಲಿತಾಂಶ: ದೇವನಾಡಿನ 'ಸೂಪರ್ ವುಮನ್' ಫಾತಿಮಾ ತಹ್ಲಿಯಾ; ಮುಸ್ಲಿಂ ಲೀಗ್‌ನ ಮೊದಲ ಮಹಿಳಾ ಎಂಎಲ್​ಎ! Kerala Election Results

ಪೆರಂಬ್ರಾ: ಕೇರಳ ರಾಜಕಾರಣದ ಈ ಬಾರಿಯ ಫಲಿತಾಂಶ (Kerala Election Results) ದಲ್ಲಿ ಅತ್ಯಂತ ಹೆಚ್ಚು ಸದ್ದು ಮಾಡುತ್ತಿರುವ ಹೆಸರು ಫಾತಿಮಾ ತಹ್ಲಿಯಾ. ಎಡಪಕ್ಷಗಳ ಭದ್ರಕೋಟೆ ಎನಿಸಿದ್ದ ಪೆರಂಬ್ರಾ ವಿಧಾನಸಭಾ ಕ್ಷೇತ್ರದಲ್ಲಿ ಅನಿರೀಕ್ಷಿತ ಫಲಿತಾಂಶ ಹೊರಬಿದ್ದಿದ್ದಿದೆ.

ಕೋಝಿಕ್ಕೋಡ್‌ನ ಪೆರುವಯಲ್‌ನಲ್ಲಿ ಜನಿಸಿದ ಫಾತಿಮಾ ತಹ್ಲಿಯಾ, ವಿದ್ಯಾರ್ಥಿ ದೆಸೆಯಿಂದಲೇ ಹೋರಾಟದ ಹಾದಿಯಲ್ಲಿ ಬೆಳೆದವರು. ಮುಸ್ಲಿಂ ಸ್ಟೂಡೆಂಟ್ಸ್ ಫೆಡರೇಶನ್ (MSF) ಮೂಲಕ ರಾಜಕೀಯ ಪ್ರವೇಶಿಸಿದ ಇವರು, ಬಳಿಕ ಕೋಝಿಕ್ಕೋಡ್ ಕಾರ್ಪೊರೇಶನ್‌ನಲ್ಲಿ ಕೌನ್ಸಿಲರ್ ಆಗಿ ಸೇವೆ ಸಲ್ಲಿಸಿದ್ದರು. ಸದ್ಯ ಮುಸ್ಲಿಂ ಯೂತ್ ಲೀಗ್‌ನ ರಾಜ್ಯ ಕಾರ್ಯದರ್ಶಿಯಾಗಿರುವ ಇವರು, ವೃತ್ತಿಯಲ್ಲಿ ವಕೀಲರು. ಕೋಝಿಕ್ಕೋಡ್ ಸರ್ಕಾರಿ ಕಾನೂನು ಕಾಲೇಜಿನಲ್ಲಿ ಬಿಎ ಎಲ್‌ಎಲ್‌ಬಿ ಮುಗಿಸಿ, ತೃಶ್ಯೂರ್‌ನಲ್ಲಿ ಎಲ್‌ಎಲ್‌ಎಂ ಸ್ನಾತಕೋತ್ತರ ಪದವಿ ಪಡೆದಿರುವ ಇವರು ಸದ್ಯ ಜಿಲ್ಲಾ ನ್ಯಾಯಾಲಯದಲ್ಲಿ ವಕೀಲೆಯಾಗಿ ಕೆಲಸ ಮಾಡುತ್ತಿದ್ದಾರೆ.

ಫಾತಿಮಾ ಅವರ ಈ ಗೆಲುವು ಸುಲಭದ್ದಾಗಿರಲಿಲ್ಲ. ಅಭ್ಯರ್ಥಿಯಾಗಿ ಅವರ ಹೆಸರು ಘೋಷಣೆಯಾದ ಕ್ಷಣದಿಂದಲೇ ಸೋಷಿಯಲ್ ಮೀಡಿಯಾದಲ್ಲಿ ಅವರ ವಿರುದ್ಧ ಭೀಕರ ಸೈಬರ್ ದಾಳಿ ಆರಂಭವಾಗಿತ್ತು. ಅವರು ಧರಿಸುವ ಹಿಜಾಬ್‌ನಿಂದ ಹಿಡಿದು ಅವರ ವೈಯಕ್ತಿಕ ಬದುಕಿನ ಬಗ್ಗೆ ಅತ್ಯಂತ ಅಸಭ್ಯ ಮತ್ತು ಲೈಂಗಿಕ ಅಶ್ಲೀಲತೆಯಿಂದ ಕೂಡಿದ ಕಾಮೆಂಟ್‌ಗಳನ್ನು ಹರಿಬಿಡಲಾಗಿತ್ತು. ಒಬ್ಬ ಯುವ ಮುಸ್ಲಿಂ ಮಹಿಳೆ ಚುನಾವಣೆ ಎದುರಿಸಲು ಸಮರ್ಥಳೇ? ಎಂಬ ಕಿಡಿಗೇಡಿಗಳ ಪ್ರಶ್ನೆಗೆ ಫಾತಿಮಾ ಧೃತಿಗೆಡದೆ ಉತ್ತರಿಸಿದ್ದರು. ಇಂತಹ ದಾಳಿಗಳು ನನಗೇನು ಹೊಸತಲ್ಲ ಎಂದು ಎದೆಗುಂದದೆ ಪ್ರಚಾರ ನಡೆಸಿದ್ದರು.

ಚುನಾವಣಾ ಪ್ರಚಾರದ ವೇಳೆ 'ಕೌಮಿಂತೆ ಕುಟ್ಟಿ' (ಸಮುದಾಯದ ಮಗು) ಎಂಬ ವಿವಾದ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿತ್ತು. ಎಡರಂಗದ ಪ್ರಚಾರ ವಾಹನಗಳಲ್ಲಿ ಫಾತಿಮಾ ಅವರನ್ನು ಕೇವಲ ಒಂದು ಧರ್ಮ ಅಥವಾ ಸಮುದಾಯದ ಅಭ್ಯರ್ಥಿ ಎಂದು ಬಿಂಬಿಸಲಾಗುತ್ತಿದೆ ಎಂದು ಯುಡಿಎಫ್ ಆರೋಪಿಸಿತ್ತು. ಚುನಾವಣೆಯನ್ನು ಕೋಮುಮಯಗೊಳಿಸಲು ಎಡಪಕ್ಷಗಳು ಪ್ರಯತ್ನಿಸುತ್ತಿವೆ ಎಂಬ ದೂರು ಚುನಾವಣಾ ಆಯೋಗಕ್ಕೂ ತಲುಪಿತ್ತು. ಆದರೆ ಇವೆಲ್ಲವನ್ನೂ ಮೀರಿ ಪೆರಂಬ್ರಾದ ಮತದಾರರು ಫಾತಿಮಾ ಅವರ ಶಿಕ್ಷಣ, ಹೋರಾಟ ಮತ್ತು ನಾಯಕತ್ವಕ್ಕೆ ಮನ್ನಣೆ ನೀಡಿದ್ದಾರೆ.

ಪೆರಂಬ್ರಾ ಎನ್ನುವುದು ದಶಕಗಳಿಂದ ಎಡಪಕ್ಷಗಳ ಭದ್ರಕೋಟೆಯಾಗಿತ್ತು. ಮುಸ್ಲಿಂ ಲೀಗ್ ಈ ಬಾರಿ ಕಣಕ್ಕಿಳಿಸಿದ ಇಬ್ಬರು ಮಹಿಳಾ ಅಭ್ಯರ್ಥಿಗಳಲ್ಲಿ ಫಾತಿಮಾ ಒಬ್ಬರು. ಹಿರಿಯ ನಾಯಕ ಟಿ.ಪಿ. ರಾಮಕೃಷ್ಣನ್ ಅವರಂತಹ ದೈತ್ಯ ನಾಯಕನನ್ನು ಪರಾಭವಗೊಳಿಸುವ ಮೂಲಕ ಫಾತಿಮಾ ಕೇರಳದ ಯುವ ಸಮುದಾಯಕ್ಕೆ ಮಾದರಿಯಾಗಿದ್ದಾರೆ ಎಂದರೆ ತಪ್ಪಾಗದು,(ಏಜನ್ಸೀಸ್​).