ನಾನೇ ಸಾರ್ವಭೌಮ, ನೀವೆಲ್ಲಾ ನ್ಯಾಯಾಂಗ ಸೇವಕರು: ಸುಪ್ರೀಂ ಕೋರ್ಟ್‌ನಲ್ಲಿ ಹೈಡ್ರಾಮಾ; ಜಡ್ಜ್‌ಗಳಿಗೇ ಆದೇಶ ನೀಡಿ, ಪೇಪರ್ ಎಸೆದ ವಕೀಲ! Courtroom Drama in Supreme Court

ನವದೆಹಲಿ: ಶುಕ್ರವಾರ (ಜು.10) ಭಾರತದ ಸವೋಚ್ಚ ನ್ಯಾಯಾಲಯದಲ್ಲಿ ಹೈಡ್ರಾಮಾವೊಂದಕ್ಕೆ (Courtroom Drama in Supreme Court) ಸಾಕ್ಷಿಯಾಗಿದೆ. ವಾದ ಮಂಡಿಸುತ್ತಿದ್ದಾಗ ವಕೀಲರೊಬ್ಬರು ಭಾರತದ ಮುಖ್ಯ ನ್ಯಾಯಮೂರ್ತಿಗಳ ಬಗ್ಗೆ ಅವಾಚ್ಯ ಶಬ್ದಗಳಲ್ಲಿ ನಿಂದಿಸಿ, ಕಾಗದವನ್ನು ಎಸೆದಿರುವ ಘಟನೆ ಈಗ ಎಲ್ಲಡೆ ಸಂಚಲನ ಸೃಷ್ಟಿಸಿದೆ.

ಈ ಘಟನೆಯು ಇಂದು ಬೆಳಿಗ್ಗೆ 11.30 ರ ಸುಮಾರಿಗೆ ನ್ಯಾಯಮೂರ್ತಿ ಕೆ.ವಿ. ವಿಶ್ವನಾಥನ್ ಮತ್ತು ಅಲೋಕ್ ಆರಾಧೆ ಅವರ ನ್ಯಾಯಪೀಠದಲ್ಲಿ ಸಂಭವಿಸಿದೆ.

ಪ್ರಬಲ್ ಪ್ರತಾಪ್ ಎಂದು ಗುರುತಿಸಲಾದ ಅರ್ಜಿದಾರರು ಪೀಠದ ಮುಂದೆ ಹಾಜರಾಗಿ ತಮ್ಮನ್ನು ತಾವು ಸಾರ್ವಭೌಮ ಎಂದು ಪರಿಚಯಿಸಿಕೊಂಡರು. ನ್ಯಾಯಾಧೀಶರನ್ನು ನ್ಯಾಯಾಂಗ ಸೇವಕರು ಎಂದು ಸಂಬೋಧಿಸುತ್ತಾ, ಶ್ರೀ ನ್ಯಾಯಾಂಗ ಸೇವಕರೇ, ಸೈಬರ್ ಅಪರಾಧದಲ್ಲಿ ಸಿಂಡಿಕೇಟ್ ನಡೆಸುತ್ತಿದ್ದಕ್ಕಾಗಿ ಲಕ್ನೋದ ಎಎಸ್ಪಿ ವಿರುದ್ಧ ಎಫ್ಐಆರ್ ದಾಖಲಿಸಲು ಆದೇಶಿಸಲು ನಾನು ನಿಮಗೆ ಆದೇಶಿಸುತ್ತೇನೆ ಎಂದು ಹೇಳಿದ್ದಾರೆ.

ಕೂಡಲೇ ಈ ವಕೀಲನನ್ನು ಬಂಧಿಸಿದ ಪೊಲೀಸರು ಬೇರೆ ಕೊಠಡಿಗೆ ಕರೆದುಕೊಂಡು ಹೋಗಿದ್ದಾರೆ. ಕೆಲ ಸಮಯದ ಮಟ್ಟಿಗೆ ನ್ಯಾಯ ವಿಚಾರಣೆಯನ್ನು ಮುಂದೂಡಿದ ನ್ಯಾಯಮೂರ್ತಿಗಳು ನಂತರ ಮತ್ತೆ ವಿಚಾರಣೆ ಮುಂದುವರಿಸಿದ್ದಾರೆ.

ಆದರೆ ಈ ಪ್ರಕರಣದಲ್ಲಿ ವಕೀಲನ ಮೇಲೆ ಯಾವುದೇ ಕ್ರಮವನ್ನು ಕೈಗೊಳ್ಳದಂತೆ ನ್ಯಾಯಮೂರ್ತಿಗಳು ತಿಳಿಸಿದ್ದಾರೆ. ಅವನು ಈ ಪ್ರಕರಣದಲ್ಲಿ ಸೋಲಲಿದ್ದ, ಹೀಗಾಗಿ ಅವನ ಮಾನಸಿಕ ಸ್ಥಿತಿ ಆತನ ಹಿಡಿತದಲ್ಲಿರಲಿಲ್ಲ. ಹೀಗಾಗಿ ಈ ವರ್ತನೆ ತೋರಿದ್ದಾನೆ. ಆದರೆ ಅವನ ಮೇಲೆ ಯಾವುದೇ ಕಠಿಣ ಕ್ರಮವನ್ನು ಕೈಗೊಳ್ಳುವ ಅಗತ್ಯವಿಲ್ಲ ಎಂದು ಅವರು ಹೇಳಿದ್ದಾರೆ, (ಏಜನ್ಸೀಸ್​).