ಭಾರತದಲ್ಲಿರುವ ಎಲ್ಲರೂ ಹಿಂದೂಗಳೇ; RSS ಜಗತ್ತಿನಲ್ಲೇ ಅತಿ ಹೆಚ್ಚು ತಪ್ಪಾಗಿ ಅರ್ಥೈಸಲ್ಪಟ್ಟ ಸಂಸ್ಥೆ; ಮೋಹನ್ ಭಾಗವತ್ ಅಭಿಮತ! Mohan Bhagwat on RSS

ತಿರುವನಂತಪುರಂ: ರಾಷ್ಟ್ರೀಯ ಸ್ವಯಂ ಸೇವಕ ಸಂಘ (RSS) ವು ಜಗತ್ತಿನ ಅತಿದೊಡ್ಡ ಸ್ವಯಂಸೇವಾ ಸಂಘಟನೆ ಜೊತೆ ಅತ್ಯಂತ ತಪ್ಪಾಗಿ ಅರ್ಥೈಸಲ್ಪಟ್ಟ ಸಂಸ್ಥೆಗಳಲ್ಲಿ ಕೂಡ ಅಗ್ರಗಣ್ಯವಾಗಿದೆ ಎಂದು ಆರ್​ಎಸ್​ಎಸ್​​ ಮುಖ್ಯಸ್ಥ ಮೋಹನ್​ ಭಾಗವತ್​​ (Mohan Bhagwat on RSS) ಹೇಳಿದ್ದಾರೆ.

ಶನಿವಾರ (ಜೂ.13) ತಿರುವನಂತಪುರಂನಲ್ಲಿ ಸಂಘ ಶತಾಬ್ದಿ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಅವರು, ಸಂಘದ ಬಗ್ಗೆ ತಿಳಿಯಬೇಕೆಂದರೆ ಮೊದಲು ಸಂಘದೊಟ್ಟಿಗೆ ಸೇರಿಕೊಳ್ಳಿ, ನಂತರ ಸಂಘವೇನು? ನಾವು ಮಾಡುವ ಕೆಲಸವೇನೆಂದು ತಿಳಿಯುತ್ತದೆ ಎಂದು ಹೇಳಿದರು.

ಜನರು ಆರ್​ಎಸ್​ಎಸ್​​ ಬಗ್ಗೆ ಹೊರಗಡೆ ಲಭ್ಯವಿರುವ ಮಾಹಿತಿ ಆಧರಿಸಿ ನಮ್ಮ ಬಗ್ಗೆ, ನಮ್ಮ ಸಂಘಟನೆ ಬಗ್ಗೆ ಅಭಿಪ್ರಾಯವನ್ನು ಮೂಡಿಸಿಕೊಳ್ಳುತ್ತಾರೆ. ಆದರೆ ನಮ್ಮ ಬಗ್ಗೆ ತಿಳಿಯ ಬಯಸುವವರು ಮೊದಲು ನಮ್ಮನ್ನು ಸೇರಿ ಎಂದು ಭಾಗವತ್​ ಹೇಳಿದ್ದಾರೆ.

ಇದೇ ಭಾಷಣದಲ್ಲಿ ಮಾತನಾಡಿದ ಭಾಗವತ್​, ನಾನು ಸಂಘದ ಆರನೇ ಸರಸಂಘಚಾಲನಾಗಿದ್ದೆನೆ. ನನಗೆ ಅನೇಕ ವೇದಿಕೆಗಳಲ್ಲಿ, ಇಸ್ಲಾಂ ಹಾಗೂ ಕ್ರಿಶ್ಚಿಯನ್​ ಪಂಥಕ್ಕೆ ಸೇರಿದವರು ಭೇಟಿಯಾಗುತ್ತಾರೆ. ಆಗ ನಾನು ಅವರಿಗೆ, ನೋಡಿ ನಾವು ಮತ್ತು ನೀವು ಸಾಂಸ್ಕೃತಿಕವಾಗಿ, ಐತಿಹಾಸಿಕವಾಗಿ ಮತ್ತು ಸಾಮಾಜಿಕ ಪ್ರಭಾವಗಳನ್ನು ಅಧ್ಯಯನ ಮಾಡಿದರೆ ನಾವೆಲ್ಲರೂ ಒಂದು, ನಾವೆಲ್ಲಾ ಹಿಂದೂ ಎಂದು ಹೇಳುತ್ತೆನೆ.

ಆದರೆ ಅವರಿಗೆ ಹಿಂದೂ ಎಂದು ಕರೆಯುವ ಬದಲು ಹಿಂದವಿಗಳು ಅಥವಾ ಭಾರತೀಯರೆಂದು ಕರೆದರೆ ಸರಿ ಎನ್ನಿಸುತ್ತದೆ ಎಂದು ಅವರು ನನ್ನಲ್ಲಿ ಹೇಳಿದುಂಟು. ಆದರೆ ಹಿಂದವಿ ಮತ್ತು ಭಾರತೀಯ ಎಂದರೆ ಸಹ ಹಿಂದೂ ಎಂದೇ ಆಗುತ್ತದೆ ಎಂಬುದಾಗಿ ಮೋಹನ್​ ಭಾಗವತ್​ ಹೇಳಿದ್ದಾರೆ, (ಏಜನ್ಸೀಸ್​).