ದೇಶ

ಚುನಾವಣೆಯಲ್ಲಿ ಸೋತಿದ್ದಕ್ಕೆ ಇಲ್ಲಿ ಪ್ರಚಾರಕ್ಕಾಗಿ ಬಂದಿದ್ದಿರಾ?: ಪ್ರಶಾಂತ್ ಕಿಶೋರ್ ಪಕ್ಷಕ್ಕೆ ಸುಪ್ರೀಂ ಕೋರ್ಟ್ ತರಾಟೆ! Prashant Kishor

ಜನ್ ಸುರಾಜ್ ಪಕ್ಷದ ನಾಯಕ ಪ್ರಶಾಂತ್ ಕಿಶೋರ್, ಸುಪ್ರೀಂ ಕೋರ್ಟ್​
ಜನ್ ಸುರಾಜ್ ಪಕ್ಷದ ನಾಯಕ ಪ್ರಶಾಂತ್ ಕಿಶೋರ್, ಸುಪ್ರೀಂ ಕೋರ್ಟ್​
Published on: 

ಪ್ರಮುಖ ಮುಖ್ಯಾಂಶಗಳು

  • ಜನರು ನಿಮ್ಮನ್ನು ಚುನಾವಣೆಯಲ್ಲಿ ತಿರಸ್ಕರಿಸಿದ್ದಾರೆ ಈಗ ನೀವು ಪ್ರಚಾರ ಪಡೆಯಲು ಈ ನ್ಯಾಯಾಂಗ ವೇದಿಕೆಯನ್ನು ಬಳಸುತ್ತಿದ್ದೀರಾ? ಸುಪ್ರೀಂ ತರಾಟೆ
  • ಪ್ರಶಾಂತ್ ಕಿಶೋರ್ ನೇತೃತ್ವದ ರಾಜಕೀಯ ಪಕ್ಷ ಜನ್ ಸುರಾಜ್ ಸಲ್ಲಿಸಿದ್ದ ಅರ್ಜಿ ವಜಾ ಮಾಡಿದ ಸುಪ್ರೀಂ ಕೋರ್ಟ್
  • ಬಿಹಾರ ಚುನಾವಣೆಯಲ್ಲಿ ನಿತೀಶ್​ ಕುಮಾರ್​ ಅವರ ಜೆಡಿಯು ನೀತಿ ಸಂಹಿತೆಯನ್ನು ಉಲ್ಲಂಘಿಸಿದೆ ಎಂಬ ಆರೋಪ
ನವದೆಹಲಿ: ಕಳೆದ ವರ್ಷ ನವೆಂಬರ್‌ನಲ್ಲಿ ನಡೆದ ಬಿಹಾರ ವಿಧಾನಸಭಾ ಚುನಾವಣೆಯ ಫಲಿತಾಂಶವನ್ನು ಪ್ರಶ್ನಿಸಿ, ಚುನಾವಣಾ ತಂತ್ರಜ್ಞ ಪ್ರಶಾಂತ್ ಕಿಶೋರ್ (Prashant Kishor) ನೇತೃತ್ವದ ರಾಜಕೀಯ ಪಕ್ಷ ಜನ್ ಸುರಾಜ್ ಸಲ್ಲಿಸಿದ್ದ ಅರ್ಜಿಯನ್ನು ಸುಪ್ರೀಂ ಕೋರ್ಟ್ ಶುಕ್ರವಾರ (ಫೆ.6) ವಜಾಗೊಳಿಸಿದೆ.
ಅರ್ಜಿಯನ್ನು ಪರಿಗಣಿಸಲು ನಿರಾಕರಿಸಿದ ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್ ನೇತೃತ್ವದ ಪೀಠವು, ಪಕ್ಷದ ಚುನಾವಣಾ ಸೋಲಿನ ಬಗ್ಗೆ ತೀಕ್ಷ್ಣವಾದ ಟೀಕೆ ಮಾಡುತ್ತಾ, ಜನರು ನಿಮ್ಮನ್ನು ಚುನಾವಣೆಯಲ್ಲಿ ತಿರಸ್ಕರಿಸಿದ್ದಾರೆ ಈಗ ನೀವು ಪ್ರಚಾರ ಪಡೆಯಲು ಈ ನ್ಯಾಯಾಂಗ ವೇದಿಕೆಯನ್ನು ಬಳಸುತ್ತಿದ್ದೀರಾ? ಎಂದು ನ್ಯಾಯಪೀಠ ಗರಂ ಆಗಿದೆ. ವಿಧಿ 32 ರ ಅಡಿಯಲ್ಲಿ ಈ ವಿಷಯವನ್ನು ವಿಚಾರಣೆ ಮಾಡಲು ಪೀಠ ನಿರಾಕರಿಸಿ, ಅರ್ಜಿದಾರರು ಬಿಹಾರ ಹೈಕೋರ್ಟ್​ನ್ನು ಸಂಪರ್ಕಿಸುವಂತೆ ಹೇಳಿತು.
ಆಡಳಿತಾರೂಢ ಜನತಾದಳ (ಯುನೈಟೆಡ್) ಮತ್ತು ಭಾರತೀಯ ಜನತಾ ಪಕ್ಷದ ಮೈತ್ರಿಕೂಟವು ಮಾದರಿ ನೀತಿ ಸಂಹಿತೆಯನ್ನು ಉಲ್ಲಂಘನೆ ಮಾಡಿ ಗೆದ್ದಿರುವ ಕಾರಣ, ಚುನಾವಣಾ ಫಲಿತಾಂಶಗಳನ್ನು ಅಸಿಂಧು ಎಂದು ಘೋಷಿಸಲು ಪ್ರಶಾಂತ್​ ಕಿಶೋರ್​ ನೇತೃತ್ವದ ಜನ್ ಸುರಾಜ್ ಅರ್ಜಿಯಲ್ಲಿ ಕೋರಿತ್ತು.
ಚುನಾವಣಾ ಅವಧಿಯಲ್ಲಿ ಪ್ರತಿ ಕುಟುಂಬ ಒಬ್ಬ ಮಹಿಳೆಗೆ 10,000 ರೂ.ಗಳನ್ನು ವಿತರಿಸುವ ರಾಜ್ಯ ಸರ್ಕಾರದ ನಿರ್ಧಾರವು ಚುನಾವಣೆಯ ನ್ಯಾಯಸಮ್ಮತತೆಗೆ ಧಕ್ಕೆ ತಂದಿದೆ ಎನ್ನುವುದು ಅವರ ವಾದವಾಗಿತ್ತು. ಅರ್ಜಿಯ ಪ್ರಕಾರ, ಮಾದರಿ ನೀತಿ ಸಂಹಿತೆ ಜಾರಿಯಲ್ಲಿದ್ದಾಗ ಅಂದಾಜು 25–35 ಲಕ್ಷ ಮಹಿಳಾ ಮತದಾರರಿಗೆ ಈ ಹಣವನ್ನು ನೀಡಲಾಗಿದ್ದು, ನೀತಿ ಸಂಹಿತೆಯ ನೇರ ಉಲ್ಲಂಘನೆ ಎಂದು ಅರ್ಜಿಯಲ್ಲಿ ನಮೂದಿಸಲಾಗಿತ್ತು.
ಚುನಾವಣಾ ಸಂದರ್ಭದಲ್ಲಿ ನೀಡಲಾಗುವ ಉಚಿತ ಕೊಡುಗೆಗಳ ಕುರಿತಾದ ವಿಷಯವು ಈಗಾಗಲೇ ಪ್ರತ್ಯೇಕ ಪ್ರಕರಣದಲ್ಲಿ ತನ್ನ ಪರಿಗಣನೆಯಲ್ಲಿದೆ ಎಂದು ಸುಪ್ರೀಂ ಕೋರ್ಟ್ ಹೇಳಿದೆ.
ಜೆಡಿ(ಯು) ಪ್ರತಿ ಕ್ಷೇತ್ರಕ್ಕೆ ಕೋಟ್ಯಂತರ ರೂಪಾಯಿಗಳನ್ನು ವಿತರಿಸಿದೆ ಎಂದು ಕಿಶೋರ್ ಈ ಹಿಂದೆ ಹೇಳಿಕೊಂಡಿದ್ದರು ಮತ್ತು ಜೆಡಿ(ಯು) ಈ ಚುನಾವಣೆಯಲ್ಲಿ 25 ಕ್ಕಿಂತ ಹೆಚ್ಚು ಸ್ಥಾನಗಳನ್ನು ಗೆಲ್ಲಲ್ಲ ಎಂದು ಹೇಳಿದ್ದರು. ಆದರೆ ಚುನಾವಣೆಯಲ್ಲಿ, ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರ ಜೆಡಿ(ಯು) 85 ಸ್ಥಾನಗಳನ್ನು ಗೆದ್ದು ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿತು.
ನ್ಯಾಯಾಲಯವು ಈ ರೀತಿಯ ಆರೋಪಗಳನ್ನು ಕಡಿಮೆ ಅಂತರದಿಂದ ಪರಾಭವಗೊಂಡ ಪಕ್ಷ ಮಾಡಿದ್ದರೆ ವಿಚಾರಣೆಗೆ ಮುಂದಾಗುತ್ತಿತ್ತು. ಆದರೆ ಜನ್​ ಸುರಾಜ್​ ಪಕ್ಷ ಸ್ಪರ್ಧಿಸಿದ್ದ 238 ಸ್ಥಾನಗಳಲ್ಲಿ ಒಂದೇ ಒಂದು ವಿಧಾನ ಸಭೆಯಲ್ಲಿ ಜಯವನ್ನು ಗಳಿಸಿಲ್ಲ ಎಂದು ತಿಳಿಸಿದೆ. ಕೇವಲ ಪ್ರಚಾರದ ಸಲುವಾಗಿ ಈ ಆರೋಪವನ್ನು ಮಾಡಲಾಗಿದೆ ಎಂದು ನ್ಯಾಯಪೀಠ ಹೇಳಿದೆ,(ಏಜನ್ಸೀಸ್​).
BJP
Supreme Court
Election
Narendra Modi
Bihar
Prashant Kishor
Nitish Kumar
JDU
Kannada News
Vijayavani News
Jan Suraaj
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net