ಅಯೋಧ್ಯಾ ರಾಮ ಮಂದಿರ ದೇಣಿಗೆ ಅಕ್ರಮ ಪ್ರಕರಣ : ಸುಪ್ರೀಂ ಕೋರ್ಟ್​ನಿಂದ ಮಹತ್ವದ ಆದೇಶ; ತನಿಖಾ ವರದಿ ಸಲ್ಲಿಸಲು ಎಸ್​​ಐಟಿಗೆ ಸೂಚನೆ! Supreme Court in Ayodhya Ram Mandir

ನವದೆಹಲಿ: ಕಳೆದ ಕೆಲ ದಿನಗಳಿಂದ ಅಯೋಧ್ಯಾ ರಾಮ ಮಂದಿರದ ದೇಣಿಗೆಯಲ್ಲಿ ಅಕ್ರಮ ನಡೆದಿದೆ ಎಂಬ ಆರೋಪ ಕೇಳಿಬರುತ್ತಿದ್ದು, ಈ ಕುರಿತು ವಿಚಾರಣೆ ನಡೆಸಲು ರಾಜ್ಯ ಸರ್ಕಾರ ಎಸ್​ಐಟಿ ಯನ್ನು ರಚನೆ ಮಾಡಿತ್ತು.

ಈ ಪ್ರಕರಣದ ಕುರಿತು ದಾಖಲಾದ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್ (Supreme Court in Ayodhya Ram Mandir)​ ಸೋಮವಾರ (ಜು.13) ಇಲ್ಲಿವರೆಗೆ ನಡೆದಿರುವ ತನಿಖೆಯ ಮಾಹಿತಿಯನ್ನು ನ್ಯಾಯಪೀಠಕ್ಕೆ ಸಲ್ಲಿಸುವಂತೆ ಸೂಚಿಸಿದೆ. ಈ ಆದೇಶವನ್ನು ಮುಖ್ಯನ್ಯಾಯಮೂರ್ತಿ ಸೂರ್ಯಕಾಂತ್​, ಜಸ್ಟೀಸ್​ ಜಾಯ್ಮಲ್ಯ ಬಾಗ್ಚಿ ಮತ್ತು ವಿ ಮೊಹ್ನಾ ಅವರಿದ್ದ ನ್ಯಾಯಪೀಠ ಆದಷ್ಟು ಬೇಗ ಈ ವರದಿ ನ್ಯಾಯಪೀಠದ ಮುಂದೆ ಸಲ್ಲಿಸಬೇಕೆಂದು ಹೇಳಿದೆ.

ಈ ಆದೇಶಕ್ಕೆ ಉತ್ತರಿಸಿದ ರಾಜ್ಯ ಹಾಗೂ ಕೇಂದ್ರ ಸರ್ಕಾರವನ್ನು ಪ್ರತಿನಿಧಿಸಿದ್ದ ಸಾಲಿಸಿಟರಿ ಜನರಲ್​ ತುಷಾರ್​ ಮೆಹ್ತಾ, ಎಸ್​ಐಟಿ ನಡೆಸಿರುವ ತನಿಖೆ ವರದಿಯನ್ನು ಮುಚ್ಚಿದ ಲಕೋಟೆಯಲ್ಲಿ ನೀಡಲಾಗುವುದೆಂದು ನ್ಯಾಯಪೀಠಕ್ಕೆ ತಿಳಿಸಿದ್ದಾರೆ.

ಅಜಯ್ ಕುಮಾರ್ ರೈ, ದಿನೇಶ್ ಕುಮಾರ್ ಯಾದವ್ ಜೊತೆಗೆ ಅರ್ಜಿ ಸಲ್ಲಿಸಿರುವ ನರೇಂದ್ರ ಕುಮಾರ್​ ಗೋಸ್ವಾಮಿ, ಅಯೋಧ್ಯೆ ರಾಮ ಮಂದಿರದಲ್ಲಿ ನಡೆದಿದೆ ಎಂದು ಹೇಳಲಾಗುತ್ತಿರುವ ಅಕ್ರಮದ ಪ್ರಕರಣವನ್ನು ರಾಜ್ಯದ ಎಸ್​ಐಟಿ ಬದಲಿಗೆ ಕೇಂದ್ರ ತನಿಖಾ ಸಂಸ್ಥೆಯಾದ ಸಿಬಿಐ ವಿಚಾರಣೆ ನಡೆಸಲಿ ಎಂದು ಕೇಳಿದ್ದಾರೆ.

ಇದರ ಜೊತೆಗೆ ದೇವಸ್ಥಾನದ ದೇಣಿಗೆ ಸೇರಿದಂತೆ ಇತರೆ ಆರ್ಥಿಕ ಸಂಬಂಧಿ ಸಂಗತಿಗಳ ಕುರಿತು, ಕಂಟ್ರೋಲರ್ ಮತ್ತು ಆಡಿಟರ್ ಜನರಲ್ (ಸಿಎಜಿ) ಅವರು ಒಂದು ಆಡಿಟ್​ ಅನ್ನು ನಡೆಸಲಿ ಎಂದು ನ್ಯಾಯಪೀಠದ ಎದುರು ಮನವಿ ಮಾಡಿದ್ದಾರೆ.

ಹೀಗಾಗಿ ಸುಪ್ರೀಂ ಕೋರ್ಟ್​ ಎಸ್​ಐಟಿ ಇಲ್ಲಿವರೆಗೆ ನಡೆಸಿರುವ ತನಿಖೆ ಮಾಹಿತಿಯನ್ನು ಮೊದಲು ನ್ಯಾಯಾಲಯಕ್ಕೆ ನೀಡಿಲಿ ಎಂಬ ಆದೇಶವನ್ನು ನೀಡಿದೆ. ಈ ಪ್ರಕರಣದ ಮುಂದಿನ ವಿಚಾರಣೆಯನ್ನು ಜುಲೈ 20 ರಂದು ನಡೆಸುವುದಾಗಿ ತಿಳಿಸಿದೆ, (ಏಜನ್ಸೀಸ್​).