ಭಾರತದ ಮೊದಲ ವಿಶ್ವ ಜೂನಿಯರ್ ಸ್ಕ್ವಾಶ್ ಚಾಂಪಿಯನ್​ಶಿಪ್ ಆಗಿ ಇತಿಹಾಸ ಬರೆದ ಅನಾಹತ್ ಸಿಂಗ್ | Anahat Singh

Anahat Singh: ಕೆನಡಾದ ನಯಾಗರಾ-ಆನ್-ದಿ-ಲೇಕ್‌ನಲ್ಲಿ ಶನಿವಾರ(ಜು. 25) ನಡೆದ ವಿಶ್ವ ಸ್ಕ್ವಾಷ್ ಜೂನಿಯರ್ ಚಾಂಪಿಯನ್‌ಶಿಪ್-2026ರ ಬಾಲಕಿಯರ ಸಿಂಗಲ್ಸ್ ಫೈನಲ್‌ನಲ್ಲಿ ಈಜಿಪ್ಟ್‌ನ ರುಕಯ್ಯ ಸೇಲಂ ಅವರನ್ನು ಸೋಲಿಸುವ ಮೂಲಕ ಭಾರತದ ಮೊದಲ ವಿಶ್ವ ಜೂನಿಯರ್ ಸ್ಕ್ವಾಷ್ ಚಾಂಪಿಯನ್ ಆಗುವ ಮೂಲಕ ಅನಾಹತ್ ಸಿಂಗ್ ಇತಿಹಾಸ ಸೃಷ್ಟಿಸಿದ್ದಾರೆ.

ಅಗ್ರ ಶ್ರೇಯಾಂಕದ ಅನಾಹತ್ ಎರಡನೇ ಶ್ರೇಯಾಂಕದ ಸೇಲಂ ಅವರನ್ನು 3-0 (11-3, 11-7, 11-9) ಅಂತರದಿಂದ ಸೋಲಿಸಿ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು. ಮತ್ತು ಪಂದ್ಯಾವಳಿಯಲ್ಲಿ ಈಜಿಪ್ಟ್‌ನ ದೀರ್ಘ ಓಟವನ್ನು ಕೊನೆಗೊಳಿಸಿದರು. 18 ವರ್ಷದ ಈ ವಿಜಯವು ಜೂನಿಯರ್ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಭಾರತದ ಅತ್ಯುತ್ತಮ ಫಲಿತಾಂಶವಾಗಿದ್ದು, 2005 ರಲ್ಲಿ ರನ್ನರ್ ಅಪ್ ಸ್ಥಾನ ಪಡೆದ ಜೋಶ್ನಾ ಚಿನ್ನಪ್ಪ ಅವರಿಗಿಂತ ಒಂದು ಹೆಜ್ಜೆ ಮುಂದೆ ಹೋಗಿದ್ದಾರೆ. 

ಪಂದ್ಯಾವಳಿಯ ಉದ್ದಕ್ಕೂ ಅನಾಹತ್ ಉತ್ತಮ ಆಟವಾಡಿದ್ದರು. ಪ್ರಶಸ್ತಿಯನ್ನು ಗೆಲ್ಲುವ ಹಾದಿಯಲ್ಲಿ ಅವರು ಆರು ಪಂದ್ಯಗಳಲ್ಲಿ ಕೇವಲ ಎರಡು ಸೆಟ್‌ಗಳನ್ನು ಕಳೆದುಕೊಂಡರು ಮತ್ತು ಒಂದು ಪಂದ್ಯವನ್ನು ಸಹ ಸೋಲದೆ ತಮ್ಮ ಮೊದಲ ಮೂರು ಪಂದ್ಯಗಳನ್ನು ಗೆದ್ದರು.

ಹಿರಿಯರ ಪಿಎಸ್‌ಎ ಟೂರ್‌ನಲ್ಲಿ ವಿಶ್ವದ 20ನೇ ಶ್ರೇಯಾಂಕದ ಆಟಗಾರ್ತಿ ಆಸ್ಟ್ರೇಲಿಯಾದ ಲಿಲ್ಲಿ ವಿಲ್ಸನ್ ವಿರುದ್ಧ 3-0 ಅಂತರದ ಗೆಲುವಿನೊಂದಿಗೆ ತನ್ನ ಅಭಿಯಾನವನ್ನು ಪ್ರಾರಂಭಿಸಿದರು. ನಂತರ ಅವರು ಹಾಂಗ್ ಕಾಂಗ್ ಚೀನಾದ ಪುಯಿ ಯಿನ್ ಕ್ಲೋಯ್ ಲೋ ಮತ್ತು ಮಲೇಷ್ಯಾದ ಡಾಯ್ಸ್ ಯೆ ಸ್ಯಾನ್ ಲೀ ಅವರನ್ನು ಸೋಲಿಸಿ ಕ್ವಾರ್ಟರ್ ಫೈನಲ್ ತಲುಪಿದರು.

ಅಲ್ಲಿಂದ ಅನಾಹತ್ ಸತತವಾಗಿ ಮೂರು ಈಜಿಪ್ಟ್ ಎದುರಾಳಿಗಳನ್ನು ಸೋಲಿಸಿದರು. ಅವರು ಕ್ವಾರ್ಟರ್-ಫೈನಲ್‌ನಲ್ಲಿ ಹಬೀಬಾ ರಿಜ್ಕ್ ಅವರನ್ನು 3-1 (11-7, 11-5, 6-11, 11-9) ಅಂತರದಿಂದ ಸೋಲಿಸಿದರು. ಬಳಿಕ ಸೆಮಿಫೈನಲ್‌ನಲ್ಲಿ ಬಾರ್ಬ್ ಸಮೇಹ್ ವಿರುದ್ಧ 3-1 (11-3, 8-11, 11-4, 11-6) ಅಂತರದಿಂದ ಜಯಗಳಿಸಿದರು. ಕೊನೆಗೆ ಫೈನಲ್‌ನಲ್ಲಿ ಸೇಲಂ ಅವರನ್ನು ಸೋಲಿಸಿದ್ದಾರೆ. 

ಇನ್ನೂ ಅನಾಹತ್ ಪ್ರಮುಖ ಸಾಧನೆ ಅಂದ್ರೆ, ಬಾಲಕಿಯರ ಸಿಂಗಲ್ಸ್ ವಿಭಾಗದಲ್ಲಿ ಈಜಿಪ್ಟ್‌ನ ಪ್ರಾಬಲ್ಯವನ್ನು ಕೊನೆಗೊಳಿಸಿತು. ಈಜಿಪ್ಟ್ ಆಟಗಾರ್ತಿಯರು 2011ರಿಂದ ಸತತ 13 ಆವೃತ್ತಿಗಳಲ್ಲಿ ಪ್ರಶಸ್ತಿಯನ್ನು ಗೆದ್ದಿದ್ದರು. 2010ರಲ್ಲಿ ಅಮಂಡಾ ಸೋಭಿ ನಂತರ ವಿಶ್ವ ಜೂನಿಯರ್ ಸ್ಕ್ವಾಷ್ ಚಾಂಪಿಯನ್‌ಶಿಪ್ ಬಾಲಕಿಯರ ಸಿಂಗಲ್ಸ್ ಪ್ರಶಸ್ತಿಯನ್ನು ಗೆದ್ದ ಮೊದಲ ಈಜಿಪ್ಟ್ ಅಲ್ಲದ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಅನಾಹತ್ ಪಾತ್ರರಾಗಿದ್ದಾರೆ.

ಕಳೆದ ವರ್ಷ ಕೈರೋದಲ್ಲಿ ನಡೆದ ಜೂನಿಯರ್ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಕಂಚಿನ ಪದಕ ಗೆಲ್ಲುವ ಮೂಲಕ ಅನಾಹತ್ ಭಾರತದ 15 ವರ್ಷಗಳ ವೈಯಕ್ತಿಕ ಪದಕ ಕಾಯುವಿಕೆಯನ್ನು ಕೊನೆಗೊಳಿಸಿದ್ದರು. ಈ ವರ್ಷ ಭಾರತದ ಮೊದಲ ಜೂನಿಯರ್ ವಿಶ್ವ ಚಾಂಪಿಯನ್ ಆಗುವ ಮೂಲಕ ಮತ್ತೊಂದು ಹೆಜ್ಜೆ ಮುಂದೆ ಹೋಗಿ ದಾಖಲೆ ಬರೆದಿದ್ದಾರೆ (ಏಜೆನ್ಸೀಸ್).