ಸದ್ದಿಲ್ಲದೆ ಬಿಜೆಪಿ ವಾರ್ ರೂಮ್‌ಗೆ ಎಂಟ್ರಿ ಕೊಟ್ಟ ಅಮಿತ್​ ಷಾ! ಬಿಜೆಪಿಯ ಮಿಷನ್ ಕ್ಲೀನ್​ಗೆ ದೀದಿ ಸಾಮ್ರಾಜ್ಯ ನಡುಗುತ್ತಿದೆಯೇ..? Amit Shah

ರಾಜ್ಯದ ಆರ್ಥಿಕತೆ ಮತ್ತು ಭದ್ರತೆಗೆ ಧಕ್ಕೆ ತರುತ್ತಿರುವ ನುಸುಳುಕೋರರನ್ನು ಆಯ್ದು ಹೊರಹಾಕುವ ಪ್ರತಿಜ್ಞೆಯನ್ನು ಷಾ ಈ ಸಂದರ್ಭದಲ್ಲಿ ಮಾಡಿದರು.

ಅಮಿತ್ ಷಾ ಭಾಷಣದ ಪ್ರಮುಖ ಗುರಿ ಅಕ್ರಮ ವಲಸೆ ಮತ್ತು ರಾಜ್ಯದ ಭದ್ರತೆಯಾಗಿತ್ತು. ಚುನಾವಣಾ ಫಲಿತಾಂಶದ ನಂತರ, ಬಂಗಾಳದೊಳಗೆ ಯಾರೂ ನುಸುಳಲು ಸಾಧ್ಯವಾಗದಂತೆ ಮಾಡುತ್ತೇವೆ. ಈಗಾಗಲೇ ಇಲ್ಲಿ ನೆಲೆಸಿರುವ ಅಕ್ರಮ ವಲಸಿಗರನ್ನು ಬಿಜೆಪಿ ಸರ್ಕಾರವು ಆಯ್ದು ಹೊರಹಾಕಲಿದೆ. ನೀವು ಈ ಬಾರಿ ಮತ ಹಾಕುತ್ತಿರುವುದು ಕೇವಲ ಒಬ್ಬ ಶಾಸಕನನ್ನು ಆರಿಸಲು ಅಥವಾ ಸರ್ಕಾರ ರಚಿಸಲು ಅಲ್ಲ, ಬದಲಿಗೆ ಬಂಗಾಳದ ಮಣ್ಣನ್ನು ನುಸುಳುಕೋರರಿಂದ ಮುಕ್ತಗೊಳಿಸಲು ಎಂದು ಷಾ ಜನರಿಗೆ ಕರೆ ನೀಡಿದ್ದಾರೆ.

ನುಸುಳುಕೋರರಿಂದ ಬಂಗಾಳದ ಸಾಮಾನ್ಯ ಜನರಿಗೆ ಆಗುತ್ತಿರುವ ನಷ್ಟದ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಗೃಹ ಸಚಿವರು, ನುಸುಳುಕೋರರು ಬಂಗಾಳದ ಯುವಕರ ಉದ್ಯೋಗಗಳನ್ನು ಕಸಿದುಕೊಳ್ಳುತ್ತಿದ್ದಾರೆ. ಬಡವರ ಪಾಲಿನ ಪಡಿತರವನ್ನು ಲೂಟಿ ಮಾಡುತ್ತಿದ್ದಾರೆ. ಇದು ಕೇವಲ ಸ್ಥಳೀಯ ಸಮಸ್ಯೆಯಲ್ಲ, ಇದು ದೇಶದ ಭದ್ರತೆಯನ್ನೇ ಬುಡಮೇಲು ಮಾಡುವ ಸಂಚು ಎಂದು ದೀದಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.

ಮೊದಲ ಹಂತದ ಮತದಾನದ ಪ್ರವೃತ್ತಿಯನ್ನು ಗಮನಿಸಿರುವ ಅಮಿತ್ ಶಾ, ಬಂಗಾಳದಲ್ಲಿ ಬಿಜೆಪಿ ಪೂರ್ಣ ಬಹುಮತದೊಂದಿಗೆ ಸರ್ಕಾರ ರಚಿಸುವುದು ಖಚಿತ ಎಂದು ವಿಶ್ವಾಸ ವ್ಯಕ್ತಪಡಿಸಿದರು. ಇದು ಬಂಗಾಳದಾದ್ಯಂತ ನನ್ನ 30ನೇ ಕಾರ್ಯಕ್ರಮವಾಗಿದ್ದು. ಮತದಾನದ ಟ್ರೆಂಡ್ ನೋಡಿದರೆ ಮೇ 5ರಂದು ದೀದಿ ಆಟ ಮುಗಿಯುವುದು ನಿಶ್ಚಿತವಾಗಿದೆ. ಬಂಗಾಳದಲ್ಲಿ ಕಮಲ ಅರಳಲಿದೆ ಎಂದು ಭವಿಷ್ಯ ನುಡಿದಿದ್ದಾರೆ.

ಏಪ್ರಿಲ್ 29ರಂದು ನಡೆಯಲಿರುವ ಎರಡನೇ ಹಂತದ ಮತದಾನದಲ್ಲಿ ಜನರು ಕಮಲದ ಗುರುತಿಗೆ ಮತ ನೀಡುವ ಮೂಲಕ ಬಂಗಾಳದ ಪುನರುತ್ಥಾನಕ್ಕೆ ನಾಂದಿ ಹಾಡಬೇಕು ಎಂದು ರಾಹುಲ್ ಮನವಿ ಮಾಡಿದ್ದಾರೆ.

ಈ ರ‍್ಯಾಲಿಗೂ ಮುನ್ನ ಅಮಿತ್ ಷಾ ಕೋಲ್ಕತ್ತಾದ ಸಾಲ್ಟ್ ಲೇಕ್‌ನಲ್ಲಿರುವ ಬಿಜೆಪಿಯ ವಾರ್ ರೂಮ್​ಗೆ ಭೇಟಿ ನೀಡಿ ಹಿರಿಯ ನಾಯಕರೊಂದಿಗೆ ಮುಚ್ಚಿದ ಬಾಗಿಲಿನ ಸಭೆ ನಡೆಸಿದ್ದಾರೆ.

ಕಾರ್ಯತಂತ್ರದ ವಿಶ್ಲೇಷಣೆ: ಉತ್ತರ ಬಂಗಾಳ ಮತ್ತು ದಕ್ಷಿಣ ಬಂಗಾಳದ ಮತದಾನದ ಅಂಕಿಅಂಶಗಳನ್ನು ಷಾ ಪರಿಶೀಲಿಸಿದ್ದಾರೆ.

ನೆಲಮಟ್ಟದ ವರದಿ: ಬೂತ್ ಮಟ್ಟದ ಕಾರ್ಯಕರ್ತರಿಂದ ಬಂದ ಫೀಡ್‌ಬ್ಯಾಕ್ ಆಧಾರದ ಮೇಲೆ ಮುಂದಿನ ಹಂತದ ಪ್ರಚಾರಕ್ಕೆ ತಂತ್ರ ರೂಪಿಸಿದ್ದಾರೆ.

ರಿಯಲ್ ಟೈಮ್ ಮಾನಿಟರಿಂಗ್: ಮತದಾನದ ಸಮಯದಲ್ಲಿ ಯಾವುದೇ ಅಹಿತಕರ ಘಟನೆಗಳು ನಡೆಯದಂತೆ ಗಮನಿಸಲು ವಿಶೇಷ ತಂಡಗಳಿಗೆ ಸೂಚನೆ ನೀಡಿದ್ದಾರೆ.

ಈ ಭೇಟಿಯು ಅಮಿತ್ ಷಾ ಅವರ ಅಧಿಕೃತ ಪ್ರವಾಸದ ಪಟ್ಟಿಯಲ್ಲಿ ಇರಲಿಲ್ಲ ಎಂಬುದು ವಿಶೇಷವಾಗಿದೆ. ಮತದಾನದ ದಿನದಂದೇ ಅವರು ವಾರ್ ರೂಮ್‌ಗೆ ಇಳಿದಿರುವುದು ರಾಜ್ಯದ ಮೇಲೆ ಬಿಜೆಪಿ ಹೊಂದಿರುವ ಗಂಭೀರತೆಯನ್ನು ತೋರಿಸುತ್ತದೆ.

ಪಶ್ಚಿಮ ಬಂಗಾಳದ ಈ ಚುನಾವಣೆ ದೇಶದ ಗಮನ ಸೆಳೆದಿದೆ. ಅಮಿತ್ ಷಾ ಅವರ 'ನುಸುಳುಕೋರ ವಿರೋಧಿ' ಅಜೆಂಡಾ ಬಂಗಾಳದ ಮತದಾರರನ್ನು ಎಷ್ಟರ ಮಟ್ಟಿಗೆ ಪ್ರಭಾವಿಸುತ್ತದೆ ಎಂಬುದು ಕುತೂಹಲ ಮೂಡಿಸಿದೆ. ಟಿಎಂಸಿಯ ಭದ್ರಕೋಟೆಯಲ್ಲಿ ಬಿಜೆಪಿ ತನ್ನ ಅಸ್ತಿತ್ವವನ್ನು ಭದ್ರಪಡಿಸಿಕೊಳ್ಳಲು ಸಕಲ ಸಿದ್ಧತೆ ನಡೆಸಿದ್ದು, ಅಮಿತ್ ಷಾ ಅವರ ಸತತ ಪ್ರವಾಸಗಳು ಕಾರ್ಯಕರ್ತರಲ್ಲಿ ಹೊಸ ಉತ್ಸಾಹ ತುಂಬಿವೆ,(ಏಜೆನ್ಸೀಸ್).