ಈರುಳ್ಳಿ, ಸಕ್ಕರೆ ಬಳಿಕ ಮೊಟ್ಟೆ ಬೆಲೆ ಏರಿಕೆ? 20 ರಿಂದ 25 ರೂ. ಹೆಚ್ಚಳ ಸಾಧ್ಯತೆ; ಇ-20 ಗೂ ಮೊಟ್ಟೆ ಬೆಲೆಗೂ ಏನೀ ಸಂಬಂಧ? Egg Price Hike

ನವದೆಹಲಿ: ದೇಶದಲ್ಲಿ ಈರುಳ್ಳಿ, ಸಕ್ಕರೆ, ಸಿರಿಧಾನ್ಯಗಳ ನಂತರ ಈಗ ಮೊಟ್ಟೆಗಳ ಬೆಲೆ (Egg Price Hike) ಕೂಡ ಗಣನೀಯವಾಗಿ ಏರಿಕೆ ಕಾಣಲಿದೆ ಎಂಬ ಶಾಕಿಂಗ್​ ಸುದ್ದಿ ಹೊರಬಿದ್ದಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಮೊಟ್ಟೆ ಬೆಲೆ ಈಗಾಗಲೇ ಶೇ. 35-40 ರಷ್ಟು ಏರಿಕೆ ಕಂಡಿದ್ದು, ಮುಂದಿನ ದಿನಗಳಲ್ಲಿ ಈ ಬೆಲೆ ಮತ್ತಷ್ಟು ದುಬಾರಿಯಾಗಲಿದೆ ಎಂದು ತಿಳಿದು ಬಂದಿದೆ. 

ರಾಷ್ಟ್ರೀಯ ಮೊಟ್ಟೆ ಸಮನ್ವಯ ಸಮಿತಿ (NECC) ಅಂಕಿ-ಅಂಶಗಳ ಪ್ರಕಾರ, ಈಗ ಒಂದು ಫಾರ್ಮ್​ ಮೊಟ್ಟೆ ಬೆಲೆ 7 ರೂಪಾಯಿ ಇದೆ. ಇದನ್ನು ಮಾರುಕಟ್ಟೆಯಲ್ಲಿ  8 ರಿಂ 9 ರೂಪಾಯಿಗೆ ಮಾರಾಟ ಮಾಡಲಾಗುತ್ತಿದೆ. ಆದರೆ ಈಗ ಬೆಲೆ ಏರಿಕೆ ಎಷ್ಟರ ಮಟ್ಟೆಗೆ ಆಗಲಿದೆ ಎಂದರೆ ಒಂದು ಮೊಟ್ಟೆ ಬೆಲೆ 20 ರ ಗಡಿ ದಾಟಲಿದೆ ಎಂದು ಹೇಳಲಾಗುತ್ತಿದೆ. 

ಆದರೆ, ಜನರು ಅನಗತ್ಯ ಆತಂಕಕ್ಕೆ ಬೀಳುವ ಅಗತ್ಯವಿಲ್ಲ. ಏಕೆಂದರೆ ಏರಿಕೆಯಾಗಲಿರುವ ಮೊಟ್ಟೆ ಕೇವಲ ಕೆಲವೇ ಕೆಲವು ಉನ್ನತ ದರ್ಜೆಯ ದೊಡ್ಡ ಬ್ರಾಂಡ್​ಗಳ ಮೊಟ್ಟೆಗಳು ಮಾತ್ರ ಏರಿಕೆ ಕಾಣಲಿದ್ದು, ದಿನನಿತ್ಯ ಬಳಕೆ ಮಾಡುವ ಮೊಟ್ಟೆಗಳ ಬೆಲೆ ಏರಿಕೆ ಕಂಡರೂ ಕೂಡ ಅಷ್ಟೇನು ಗಾಬರಿ ಪಡುವ ಅಗತ್ಯವಿಲ್ಲ ಎಂದು ಹೇಳಲಾಗುತ್ತಿದೆ.

ಆದರೆ, ಮೊಟ್ಟೆಗಳ ಬೆಲೆ ಏಕೆ ಏರಿಕೆ ಕಾಣಲಿದೆ ಎಂಬ ಪ್ರಶ್ನೆಗೆ ಉತ್ತರ ಇಲ್ಲಿದೆ. ಈ ಕೋಳಿ ಫಾರ್ಮ್​ ಅಥವಾ ಯಾವುದೇ ಪಕ್ಷಿಗಳ ಫಾರ್ಮ್​ ನಡೆಸಬೇಕಾದರೆ ಅಲ್ಲಿ ಆ ಪಕ್ಷಿಗಳಿಗೆ ಸರಿಯಾದ ಆಹಾರ ನೀಡುವುದು ಅಗತ್ಯವಾಗಿರುತ್ತದೆ. 

ಹಾಗೂ ಈ ಮೊಟ್ಟೆ ಫಾರ್ಮ್​ಗಳಲ್ಲಿ ಪಕ್ಷಿಗಳಿಕೆ ಅಧಿಕವಾಗಿ ಮೆಕ್ಕೆಜೋಳವನ್ನು ಪ್ರಮುಖ ಆಹಾರವನ್ನಾಗಿ ನೀಡಲಾಗುತ್ತದೆ. ಸುಮಾರು ಶೇ. 60 ರಿಂದ 70 ರಷ್ಟು ಫಾರ್ಮ್​ಗಳಲ್ಲಿ ಮೆಕ್ಕೆಜೋಳವೇ ಬಹುಮುಖ್ಯ ಆಹಾರ ಮೂಲವಾಗಿದೆ.

ಆದರೆ ಭಾರತದಲ್ಲಿ ಇ-20 ಇಂಧನ ನೀತಿಯಿಂದಾಗಿ ಈ ಮೆಕ್ಕೆಜೋಳವನ್ನು ಇಥೆನಾಲ್​ ತಯಾರಿಕೆಗೆ ಸಾಗಣೆ ಮಾಡುತ್ತಿರುವ ಹಿನ್ನಲೆ ಫಾರ್ಮ್​ಗಳಲ್ಲಿನ ಪಕ್ಷಿಗಳಿಗೆ ಆಹಾರದ ಕೊರತೆ ಉಂಟಾಗಲಿದ್ದು, ಇದರಿಂದ ಮೊಟ್ಟೆ ಉತ್ಪಾದನೆ ಕಡಿಮೆ ಆಗುವ ಆತಂಕವಿರುವ ಕಾರಣ ಮೊಟ್ಟೆಗಳ ಬೆಲೆ ಏರಿಕೆ ಆಗಲಿದೆ ಎಂಬ ಮಾತು ಕೇಳಿ ಬರುತ್ತಿದೆ. 

ಒಂದು ವೇಳೆ ಮೆಕ್ಕೆಜೋಳದ ಬದಲು ಸೋಯಾಬೀನ್​ ಅನ್ನು ಆಹಾರ ಉತ್ಪನ್ನವಾಗಿ ಫಾರ್ಮ್​ಗಳು ಬಳಸಲು ಮುಂದಾದರೆ ಸೋಯಾಬೀನ್​ ಕೂಡ ದುಬಾರಿ ಪದಾರ್ಥವಾಗಿರುವ ಹಿನ್ನಲೆ ಮೊಟ್ಟೆ ಬೆಲೆ ಏನು ಮಾಡಿದರೂ ಹೆಚ್ಚಳವಾಗುವುದು ಖಾತರಿಯಾದಂತಾಗಿದೆ. ಇನ್ನೂ ಚಳಿಗಾಲದಲ್ಲಿ ಮೊಟ್ಟೆ ಬೇಡಿಕೆ ಹೆಚ್ಚಾಗಲಿದ್ದು, ಬೇಡಿಕೆಗೆ ತಕ್ಕಂತೆ ಉತ್ಪಾದನೆ ಮತ್ತು ದಾಸ್ತಾನು ಸಾಧ್ಯವಾಗದ ಪಕ್ಷದಲ್ಲಿ ಕೂಡ ಬೆಲೆ ಏರಿಕೆ ನಿಶ್ಚಿತ ಎನ್ನಲಾಗುತ್ತಿದೆ, (ಏಜನ್ಸೀಸ್​).