ನಿಮಗೆ ಪದೇ ಪದೇ ಜಂಕ್ ಫುಡ್ ತಿನ್ನಬೇಕೆನಿಸುತ್ತಿದೆಯೇ? ನಾಲಿಗೆ ಚಪಲಕ್ಕೆ ಇಲ್ಲಿದೆ ಸಿಂಪಲ್ ಮದ್ದು..! Junk Food

ನಮ್ಮ ಮಿದುಳು ಸಕ್ಕರೆ, ಉಪ್ಪು ಮತ್ತು ಕೊಬ್ಬಿನಂಶವಿರುವ ಆಹಾರಕ್ಕೆ ಬೇಗನೆ ಮಾರುಹೋಗುತ್ತದೆ. ಜಂಕ್ ಫುಡ್ ತಿಂದಾಗ ಮಿದುಳಿನಲ್ಲಿ ಡೋಪಮೈನ್ ಎಂಬ ಹಾರ್ಮೋನ್ ಬಿಡುಗಡೆಯಾಗಿ ನಮಗೆ ಸಂತೋಷ ನೀಡುತ್ತದೆ. ಇದೇ ಕಾರಣಕ್ಕೆ ನಾವು ಪದೇ ಪದೇ ಅಂತಹ ಆಹಾರಗಳನ್ನೇ ಹುಡುಕುತ್ತೇವೆ. ಆದರೆ ಇದು ದೀರ್ಘಕಾಲದವರೆಗೆ ಮಧುಮೇಹ, ಬೊಜ್ಜು ಮತ್ತು ಹೃದಯ ಸಂಬಂಧಿ ಕಾಯಿಲೆಗಳಿಗೆ ದಾರಿ ಮಾಡಿಕೊಡುತ್ತದೆ.

ಹಲವು ಬಾರಿ ನಮ್ಮ ಮಿದುಳು ಬಾಯಾರಿಕೆ ಮತ್ತು ಹಸಿವಿನ ನಡುವಿನ ವ್ಯತ್ಯಾಸವನ್ನು ಗುರುತಿಸಲು ವಿಫಲವಾಗುತ್ತದೆ. ನಿಮಗೆ ಜಂಕ್ ಫುಡ್ ತಿನ್ನಬೇಕೆನಿಸಿದಾಗ ಮೊದಲು ಒಂದು ಲೋಟ ನೀರು ಕುಡಿಯಿರಿ. 10 ನಿಮಿಷಗಳ ನಂತರವೂ ಹಸಿವಿದ್ದರೆ ಮಾತ್ರ ಆರೋಗ್ಯಕರ ಆಹಾರ ಸೇವಿಸಿ.

ನಿಮ್ಮ ಆಹಾರದಲ್ಲಿ ಪ್ರೋಟೀನ್ ಪ್ರಮಾಣ ಹೆಚ್ಚಿದ್ದರೆ, ಹೊಟ್ಟೆ ದೀರ್ಘಕಾಲ ತುಂಬಿದ ಅನುಭವ ನೀಡುತ್ತದೆ. ಇದು ಹಸಿವನ್ನು ಉಂಟುಮಾಡುವ ಗ್ರೆಲಿನ್ ಹಾರ್ಮೋನ್ ಅನ್ನು ನಿಯಂತ್ರಿಸುತ್ತದೆ. ಮೊಟ್ಟೆ, ಪನೀರ್, ಧಾನ್ಯಗಳು ಅಥವಾ ನಟ್ಸ್ ಸೇವಿಸುವುದು ಉತ್ತಮವಾಗುತ್ತದೆ.

ನಿದ್ರೆಯ ಕೊರತೆಯಾದರೆ ದೇಹದಲ್ಲಿ ಹಾರ್ಮೋನ್‌ಗಳ ಏರುಪೇರಾಗಿ ನಮಗೆ ಅತಿ ಹೆಚ್ಚು ಸಕ್ಕರೆ ಮತ್ತು ಎಣ್ಣೆಯುಕ್ತ ಆಹಾರ ಬೇಕೆನಿಸುತ್ತದೆ. ದಿನಕ್ಕೆ ಕನಿಷ್ಠ 7-8 ಗಂಟೆಗಳ ಕಾಲ ಚೆನ್ನಾಗಿ ನಿದ್ರೆ ಮಾಡಿ ಮತ್ತು ಮಾನಸಿಕ ಒತ್ತಡ ಕಡಿಮೆ ಮಾಡಲು ಯೋಗ ಅಥವಾ ಧ್ಯಾನ ಮಾಡಿ.

ಸಿಹಿ ತಿನ್ನಬೇಕೆನಿಸಿದರೆ: ಚಾಕೊಲೇಟ್ ಬದಲಿಗೆ ಹಣ್ಣುಗಳು ಅಥವಾ ಖರ್ಜೂರ ತಿನ್ನಿರಿ.

ಕುರುಕಲು ತಿಂಡಿ ಬೇಕೆನಿಸಿದರೆ: ಚಿಪ್ಸ್ ಬದಲಿಗೆ ಹುರಿದ ಕಡಲೆ ಅಥವಾ ಮಖಾನಾ ಸೇವಿಸಿ.

ಕೋಲ್ಡ್ ಡ್ರಿಂಕ್ಸ್ ಬದಲಿಗೆ: ಎಳನೀರು ಅಥವಾ ಮಜ್ಜಿಗೆ ಕುಡಿಯಿರಿ.

ನೀವು ಅತಿಯಾದ ಹಸಿವಿನಲ್ಲಿದ್ದಾಗ ಸೂಪರ್ ಮಾರ್ಕೆಟ್‌ಗೆ ಹೋದರೆ, ನಿಮ್ಮ ಕಣ್ಣಿಗೆ ಮೊದಲು ಬೀಳುವುದು ಜಂಕ್ ಫುಡ್‌ಗಳೇ. ಹಸಿವಿಲ್ಲದಿದ್ದಾಗ ಮಾತ್ರ ದಿನಸಿ ಖರೀದಿಗೆ ಹೋಗುವ ಅಭ್ಯಾಸ ಮಾಡಿಕೊಳ್ಳಿ.

ಆರೋಗ್ಯವೇ ಭಾಗ್ಯ ಎಂಬ ಮಾತಿನಂತೆ, ನಾವು ಸೇವಿಸುವ ಆಹಾರವೇ ನಮ್ಮ ಭವಿಷ್ಯವನ್ನು ನಿರ್ಧರಿಸುತ್ತದೆ. ಇಂದೇ ಜಂಕ್ ಫುಡ್‌ಗೆ ಗುಡ್ ಬೈ ಹೇಳಿ, ಮನೆಯ ಮೃದು ಆಹಾರಕ್ಕೆ ಮರಳೋಣ,(ಏಜೆನ್ಸೀಸ್).