ಅತ್ತ ಮ್ಯಾಚ್ ಕೈತಪ್ಪುತ್ತಿದ್ದರೆ ಇತ್ತ ಉಗುರು ಕತ್ತರಿಸುತ್ತಿದ್ದ ನೆಹ್ರಾ! ಗುಜರಾತ್ ಕೋಚ್ ಮುಖಕ್ಕೆ ಫ್ಯಾನ್ಸ್​ ಮಂಗಳಾರತಿ; ವಿಡಿಯೋ ವೈರಲ್​! Ashish Nehra Viral Video

ಅಹಮದಾಬಾದ್​: ಭಾನುವಾರ (ಮೇ.31) ಅಹಮದಾಬಾದ್​ನಲ್ಲಿ ನಡೆದ ಐಪಿಎಲ್​ 2026 ನ ಫೈನಲ್​ ಪಂದ್ಯದಲ್ಲಿ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ಗುಜರಾತ್​ ಟೈಟಾನ್ಸ್ ತಂಡವನ್ನು ಸೋಲಿಸುವ ಮೂಲಕ ಸತತ ಎರಡನೇ ಭಾರಿಗೆ ಚಾಂಪಿಯನ್​ ಪಟ್ಟವನ್ನು ಮುಡಿಗೇರಿಸಿ ಕೊಂಡಿದೆ.

ಐಪಿಎಲ್​ನ ಫೈನಲ್​ ಪಂದ್ಯ ಅದರಲ್ಲೂ ತಾವು ಕೆಲಸ ಮಾಡುತ್ತಿರುವ, ತಮ್ಮ ನೇತೃತ್ವವಿರುವ ತಂಡ ಸೋಲುತ್ತಿದೆ ಎಂದರೆ ಅಲ್ಲಿರುವ ಆಟಗಾರರಿಗೆ ಬೇಸರ ಅಥವಾ ಗಂಭೀರರಾಗಿ ಇರುತ್ತಾರೆ.ಆದರೆ ಗುಜರಾತ್​ ಟೈಟಾನ್ಸ್​ ತಂಡದ ಕೋಚ್​ ಆಶಿಶ್​ ನೆಹ್ರಾ ಫೈನಲ್​ ಪಂದ್ಯದ ವೇಳೆ ಮಾಡಿರುವ ನಿರ್ಲಜ್ಜ ಕೆಲಸವೊಂದು ಈಗ ಸೋಷಿಯಲ್​ ಮೀಡಿಯಾನಲ್ಲಿ ಸಖತ್​ ವೈರಲ್​ (Ashish Nehra Viral Video) ಆಗುತ್ತಿದೆ.

ಒಂದು ಕಡೆ ಫೈನಲ್​ ಪಂದ್ಯದ ಕಾವೇರುತ್ತಾ, ಬಾರಿಸಬೇಕಿದ್ದ ರನ್​ನ್ನು ಗಳಿಸಲು ಸಾಧ್ಯವಾಗಿಲ್ಲ ಎಂಬ ಚಿಂತೆಯಲ್ಲಿ ಗುಜರಾತ್​ ತಂಡವಿದ್ದರೆ ಇತ್ತ, ಅವರ ಕೋಚ್​ ಆಶಿಶ್​ ನೆಹ್ರಾ ಮಾತ್ರ ಯಾವುದೇ ಚಿಂತೆಯೇ ಇಲ್ಲವೆಂಬಂತೆ ಹಾಯಾಗಿ ತಮ್ಮ ಕಾಲಿನ ಉಗುರುಗಳನ್ನು ಕತ್ತರಿಸಿಕೊಳ್ಳುತ್ತಿರುವ ದೃಶ್ಯ ಕ್ಯಾಮರಾದ ಕಣ್ಣಲ್ಲಿ ಸೆರೆಯಾಗಿದೆ. ಈ ದೃಶ್ಯ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿದ್ದಂತೆ ಗುಜರಾತ್​ ಟೈಟಾನ್ಸ್ ಅಭಿಮಾನಿಗಳು ಕೋಚ್​ಗೆ ಛೀಮಾರಿ ಹಾಕುತ್ತಿದ್ದಾರೆ.

ಆಶಿಶ್​ ನೆಹ್ರಾ ಅವರ ಈ ಉಗುರು ಕಟಿಂಗ್​ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ವೈರಲ್​ ಆಗಿದ್ದು, ಈಗಾಗಲೇ ಲಕ್ಷಾಂತರ ವೀಕ್ಷಣೆಯನ್ನು ಪಡೆದುಕೊಂಡಿದೆ. ಇವನಿಗೆ ತನ್ನ ತಂಡದ ಮೇಲೆ, ಆಟಗಾರರ ಮೇಲೆ ಒಂದು ಚೂರು ಜವಾಬ್ದಾರಿಯೇ ಇಲ್ಲ, ಇಂತಹ ನಿರ್ಲಜ್ಜ ಕೋಚ್​ನ್ನು ನಾನು ನೋಡಿಯೇ ಇಲ್ಲ ಎಂದು ಒಬ್ಬ ಬಳಕೆದಾರರು ಕಮೆಂಟ್​ ಮಾಡಿದ್ದಾರೆ.

ಹೇಗೂ ತಂಡ ಸೋಲುತ್ತಿದೆ ಸುಮ್ಮನೆ ಕುರುವ ಬದಲು ಉಗುರನ್ನಾದರೂ ತೆಗೆದುಕೊಂಡರಾಯಿತು ಎಂದು ಕೋಚ್​ ಸಾಹೇಬರು ಲೆಕ್ಕ ಹಾಕಿದ್ದಾರೆ ಎಂದು ಇನ್ನೊಬ್ಬರು ಹೇಳಿದ್ದಾರೆ. ಇಂತಹ ಬೇಜವಾಬ್ದಾರಿ ಕೋಚ್​ ಇಟ್ಟಕೊಂಡು ಈ ತಂಡ ಫೈನಲ್​ವರೆಗೆ ಬಂದಿದ್ದೆ ಒಂದು ಸಾಧನೆ ಎಂದು ಮತ್ತೊಬ್ಬರು ತಮ್ಮ ಅಭಿಪ್ರಾಯವನ್ನು ಬರೆದುಕೊಂಡಿದ್ದಾರೆ.

ಈ ಭಾರಿಯ ಐಪಿಎಲ್​ ಸೀಸನ್ನಿನ ಹಾಟ್​ ಫೇವರೆಟ್​ ಟೀಮ್​ ಆಗಿದ್ದ ಆರ್​ಸಿಬಿ ತಂಡ, ಗುಜರಾತ್​ ಟೈಟಾನ್ಸ್ ತಂಡವನ್ನು ತವರಿನಲ್ಲಿಯೇ ಸೋಲಿಸಿ, ಸತತ ಎರಡನೇ ಭಾರಿಗೆ ಚಾಂಪಿಯನ್​ ಪಟ್ಟವನ್ನು ಅಲಂಕರಿಸಿ, ಈ ಸಲಾನೂ ಕಪ್​ ನಮ್ದೇ ಎಂದು ಬೀಗಿದೆ.

ಟಾಸ್​ ಸೋತು ಮೊದಲು ಬ್ಯಾಟಿಂಗ್​ ಮಾಡಿದ ಗುಜರಾತ್​ ತಂಡ ಉತ್ತಮ ಆರಂಭವನ್ನು ಪಡೆಯುದ ಕಾರಣ ಹಾಗೂ ಬ್ಯಾಟ್ಸ್​ಮನ್​ಗಳ ವಿಫಲ ಪ್ರದರ್ಶನದ ಹಿನ್ನಲೆ ದೊಡ್ಡ ಮೊತ್ತವನ್ನು ಕಲೆಹಾಕುವಲ್ಲಿ ವಿಫಲಾಯಿತು. ಸೀಮಿತ 20 ಓವರ್​ಗಳಲ್ಲಿ 8 ವಿಕೆಟ್​ಗಳ ನಷ್ಟಕ್ಕೆ ಕೇವಲ 155 ಗಳಿಸಿದ ಗುಜರಾತ್​ ಪರ ವಾಷಿಂಗ್​ಟನ್​ ಸುಂದರ್​ ಅಜೇಯ 50 ಗಳಿಸಿದರೆ ಇನ್ಯಾರಿಂದಲೂ ಹೇಳಿಕೊಳ್ಳುವಂತ ಪ್ರದರ್ಶನ ದೊರೆಯಲಿಲ್ಲ.

ಸುಲಭ ಗುರಿಯನ್ನು ಬೆನ್ನತ್ತಿದ್ದ ಬೆಂಗಳೂರು ತಂಡ 18 ಓವರ್​​ಗಳಲ್ಲಿ ಗುರಿಯನ್ನು ತಲುಪಲು ಯಶಸ್ವಿಯಾಯಿತು. ವಿರಾಟ್​ ಕೊಹ್ಲಿ 42 ಎಸೆತಗಳಲ್ಲಿ ಅಜೇಯ 75 ರನ್​ ಗಳಿಸಿದರೆ, ವೆಂಕಟೇಶ್​ ಅಯ್ಯರ್​ 16 ಎಸೆತಗಳಲ್ಲಿ 32 ರನ್​ ಗಳಿಸಿ ತಂಡದ ಗೆಲುವಿಗೆ ಕಾರಣರಾದರು, (ಏಜನ್ಸೀಸ್​).