ಐಪಿಎಲ್​ಗೆ ಹಮ್ಜಾ ಪತ್ನಿ ಯಲೀನಾ ಎಂಟ್ರಿ: ವಾಂಖಡೆಯಲ್ಲಿ ಸಾರಾ ಅರ್ಜುನ್​ ಮೇಲೆ ಮುಗಿಬಿದ್ದ ಅಭಿಮಾನಿಗಳು! Sara Arjun in Wankhede

ಮುಂಬೈ: ಮಾರ್ಚ್​ 19 ರಂದು ಬಿಡುಗಡೆಯಾಗಿ ಬಾಕ್ಸ್​ ಆಫೀಸ್​ನಲ್ಲಿ ಧೂಳೆಬ್ಬಿಸುತ್ತಿರುವ ಸಿನಿಮಾ ಯಾವುದೆಂದರೆ ಅದು ಧುರಂಧರ್​ 2. ಬಿಡುಗಡೆಯಾದ ಹತ್ತೇ ದಿನದಲ್ಲಿ ಸುಮಾರು 1,250 ಕೋಟಿ ಗಳಿಸುವ ಮೂಲಕ ಕೆ.ಜಿ.ಎಫ್​ 2 ಮತ್ತು ಆರ್​.ಆರ್.ಆರ್​ ನ ಕಲೆಕ್ಷನ್​ನ್ನು ಇದು ಹಿಂದಿಕ್ಕಿದೆ.

ಮಾರ್ಚ್​ 28 ರಿಂದ ಭಾರತದ ಕ್ರಿಕೆಟ್​ ಉತ್ಸವವಾದ ಐಪಿಎಲ್​ ಆರಂಭವಾಗಿದ್ದು ನಿನ್ನೆ (ಮರ್ಚ್​ 29 ) ಮುಂಬೈನ ವಾಂಖಡೆ ಕ್ರೀಡಾಂಗಣದಲ್ಲಿ ಮುಂಬೈ ಇಂಡಿಯನ್ಸ್​ ಹಾಗೂ ಕಲ್ಕತ್ತಾ ನೈಟ್​ ರೈಡರ್ಸ್ ನಡುವಿನ ಪಂದ್ಯವನ್ನು ವೀಕ್ಷಿಸಲು ಧುರಂಧರ್​ನ ಯಲೀನಾ ಖ್ಯಾತಿಯ ಸಾರಾ ಅರ್ಜುನ್​ (Sara Arjun in Wankhede) ಆಗಮಿಸಿದ್ದರು.

ವಾಂಖಡೆಯಲ್ಲಿ ನಡೆದ ಪಂದ್ಯದಲ್ಲಿ ಮುಂಬೈ ತಂಡ ಜಯಭೇರಿ ಬಾರಿಸಿದ ನಂತರ ಸ್ಟೇಡಿಯಂನಿಂದ ಸಾರಾ ಹೊರಬರುತ್ತಿದ್ದಂತೆ ಅಭಿಮಾನಿಗಳ ದಂಡು ಅವರನ್ನು ಮುತ್ತಿಗೆ ಹಾಕಿದೆ. ಮೇಡಂ ಫೋಟೊ, ಮೇಡಂ ಸೆಲ್ಫಿ, ಯಲೀನಾ.. ಯಲೀನಾ.. ಎನ್ನುತ್ತಾ ಜನ ಸಾರಾ ಅರ್ಜುನ್​ ಮೇಲೆ ಮುಗಿಬಿದ್ದಿದ್ದಾರೆ. ಆದರೆ ಸಾರಾ ಜೊತೆಗಿದ್ದ ಭದ್ರತಾ ಸಿಬ್ಬಂದಿಗಳು ಪರಿಸ್ಥಿತಿ ಕೈಮೀರದಂತೆ ನೋಡಿಕೊಂಡಿದ್ದಾರೆ.

ನಿನ್ನೆ ವಾಂಖಡೆಯಲ್ಲಿ ನಡೆದ ಐಪಿಎಲ್​ ಪಂದ್ಯವನ್ನು ನೋಡಲು ಮುಂಬೈ ಇಂಡಿಯನ್ಸ್​ ಜರ್ಸಿ ಧರಿಸಿ ಬಂದಿದ್ದ ಸಾರಾ ಅರ್ಜುನ್​ ಫೋಟೊಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿವೆ. ಮುಂಬೈ ತಂಡ ಪಂದ್ಯವನ್ನು ಗೆದ್ದ ಸಂತಸವನ್ನು ಹಂಚಿಕೊಂಡಿರುವ ಸಾರಾ, ವಾವ್.. ವಾಟ್​ ಅ ಮ್ಯಾಚ್​ ಎಂದು ತಮ್ಮ ಇನ್​ಸ್ಟಾಗ್ರಾಮ್​ನಲ್ಲಿ ಬರದುಕೊಂಡಿದ್ದಾರೆ.

ಆದಿತ್ಯ ಧರ್​ ನಿರ್ದೇಶನದ ಹಾಗೂ ರಣವೀರ್​ ಸಿಂಗ್​ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ ಧುರಂಧರ್​ ಸಿನಿಮಾದಲ್ಲಿ ಸಾರಾ ಅರ್ಜುನ್​ ಯಲೀನಾ ಜಮೇಲಿ ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಯಲೀನಾ ಪಾತ್ರವು ಈ ಸಿನಿಮಾದಲ್ಲಿ ಬರುವ ಬಹುಮುಖ್ಯ ಪಾತ್ರಗಳಲ್ಲಿ ಒಂದಾಗಿದ್ದು, ಒಂದರ್ಥದಲ್ಲಿ ಸಾರಾ ಈ ಸಿನಿಮಾದಲ್ಲಿ ನಾಯಕನಟಿಯ ಪಾತ್ರದಲ್ಲೇ ಕಾಣಸಿಕೊಂಡಿದ್ದಾರೆ. ಹಮ್ಜಾ ಅಲಿ ಮಜಾರಿ (ರಣವೀರ್​ ಸಿಂಗ್​) ಯ ಪತ್ನಿಯ ಪಾತ್ರವನ್ನು ಅದ್ಭುತವಾಗಿ ನಿರ್ವಹಿಸಿರುವ ಸಾರಾಗೆ ಸಿನಿಮಾ ವಿಮರ್ಶಕರು ಫುಲ್​ ಮಾರ್ಕ್ಸ ಕೊಟ್ಟಿದ್ದಾರೆ.

ಸಾರಾ ಅರ್ಜುನ್ ಭಾರತೀಯ ಚಿತ್ರರಂಗದ ಅತ್ಯಂತ ಪ್ರತಿಭಾವಂತ ಮತ್ತು ಜನಪ್ರಿಯ ಬಾಲನಟಿ ಹಾಗೂ ಯುವ ನಟಿಯಾಗಿದ್ದಾರೆ. ಸಾರಾ 2005 ರಲ್ಲಿ ಮುಂಬೈನಲ್ಲಿ ಜನಿಸಿದ್ದು, ಕೇವಲ ಆರು ವರ್ಷದವರಿದ್ದಾಗಲೇ ಜಾಹೀರಾತುಗಳ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟರು.

ತಮಿಳು ಚಿತ್ರ ದೈವ ತಿರುಮಗಳ್ (Deiva Thirumagal) ನಲ್ಲಿ ವಿಕ್ರಮ್ ಅವರ ಮಗಳಾಗಿ ನಟಿಸಿದ 'ನಿಲಾ' ಪಾತ್ರ ಇವರಿಗೆ ಅಪಾರ ಖ್ಯಾತಿ ತಂದುಕೊಟ್ಟಿತು. ನಂತರ ಇವರು ಕನ್ನಡ, ತೆಲುಗು, ಹಿಂದಿ ಮತ್ತು ಮಲಯಾಳಂ ಚಿತ್ರಗಳಲ್ಲೂ ನಟಿಸಿದ್ದಾರೆ. ವಿಶೇಷವಾಗಿ ಮಣಿರತ್ನಂ ಅವರ ಮಹತ್ವಾಕಾಂಕ್ಷೆಯ ಸಿನಿಮಾ ಪೊನ್ನಿಯಿನ್ ಸೆಲ್ವನ್ (Ponniyin Selvan) ನಲ್ಲಿ ನಟಿ ಐಶ್ವರ್ಯ ರೈ ಅವರ ಬಾಲ್ಯದ ಪಾತ್ರವಾದ 'ನಂದಿನಿ'ಯಾಗಿ ನಟಿಸಿ ವಿಮರ್ಶಕರಿಂದ ಅಪಾರ ಮೆಚ್ಚುಗೆ ಪಡೆದಿದ್ದರು,(ಏಜನ್ಸೀಸ್​).