ಫ್ರಾನ್ಸ್ ವಿರುದ್ಧ 2-0 ಅಂತರದ ಗೆಲುವು ಸಾಧಿಸಿ ಫೈನಲ್​ಗೆ ಲಗ್ಗೆಯಿಟ್ಟ ಸ್ಪೇನ್ | FIFA World Cup 2026

FIFA World Cup 2026: ಫಿಫಾ ವಿಶ್ವಕಪ್ 2026ರಲ್ಲಿ ಡಲ್ಲಾಸ್‌ನಲ್ಲಿ ನಡೆದ ಬ್ಲಾಕ್‌ಬಸ್ಟರ್ ಸೆಮಿಫೈನಲ್ ಪಂದ್ಯದಲ್ಲಿ ಮೂರನೇ ವಿಶ್ವಕಪ್ ಗೆಲ್ಲುವ ಫ್ರಾನ್ಸ್ ಕನಸನ್ನು ಭಗ್ನಗೊಳಿಸಿದ ಸ್ಪೇನ್ 2-0 ಅಂತರದಿಂದ ಗೆಲುವು ಸಾಧಿಸುವ ಮೂಲಕ ಫೈನಲ್​ಗೆ ಲಗ್ಗೆಯಿಟ್ಟಿದೆ.

ಡಲ್ಲಾಸ್ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ, ಸ್ಪೇನ್ ಆರಂಭದಿಂದಲೂ ಪ್ರಾಬಲ್ಯ ಸಾಧಿಸಿತು ಮತ್ತು ಎದುರಾಳಿಗೆ ಯಾವುದೇ ಅವಕಾಶಗಳನ್ನು ನೀಡಲಿಲ್ಲ. ಪಂದ್ಯದ 22ನೇ ನಿಮಿಷದಲ್ಲಿ ಮೈಕೆಲ್ ಒಯರ್ಜಬಲ್ ಗೋಲು ಗಳಿಸಿ ಸ್ಪೇನ್ ತಂಡಕ್ಕೆ 1-0 ಮುನ್ನಡೆ ಒದಗಿಸಿದರು.

ಆ ನಂತರ ಸ್ಪೇನ್ ನಿಧಾನಗತಿಯಲ್ಲಿ ಸಾಗದೆ ದಾಳಿ ಮುಂದುವರಿಸಿತು. ದ್ವಿತೀಯಾರ್ಧದಲ್ಲಿ, ಪೆಡ್ರೊ ಪೊರೊ 58ನೇ ನಿಮಿಷದಲ್ಲಿ ಅದ್ಭುತ ಗೋಲು ಗಳಿಸಿ ಮುನ್ನಡೆಯನ್ನು 2-0ಕ್ಕೆ ಹೆಚ್ಚಿಸಿದರು. ಫ್ರಾನ್ಸ್ ಕೂಡ ಗೋಲು ಗಳಿಸಲು ಶ್ರಮಿಸಿತು, ಆದರೆ ಸ್ಪ್ಯಾನಿಷ್ ತಂಡವನ್ನು ಭೇದಿಸಲು ಸಾಧ್ಯವಾಗಲಿಲ್ಲ.

ಈ ಗೆಲುವಿನೊಂದಿಗೆ ಸ್ಪೇನ್ ಫೈನಲ್ ಪ್ರವೇಶಿಸಿದೆ. ಇಂದು ಅಟ್ಲಾಂಟಾದಲ್ಲಿ ನಡೆಯಲಿರುವ ಎರಡನೇ ಸೆಮಿಫೈನಲ್‌ನಲ್ಲಿ ಇಂಗ್ಲೆಂಡ್ ಮತ್ತು ಅರ್ಜೆಂಟೀನಾ ತಂಡಗಳು ಸೆಣಸಲಿವೆ. ಇಂದಿನ ಪಂದ್ಯದಲ್ಲಿ ಗೆದ್ದ ತಂಡವನ್ನು ಸ್ಪೇನ್​ ಫೈನಲ್​ನಲ್ಲಿ ಎದುರಿಸಲಿದೆ.

ಕೇಪ್ ವರ್ಡೆ (0-0) ಜೊತೆ ಡ್ರಾ ಹೊರತುಪಡಿಸಿ, ಈ ಪಂದ್ಯಾವಳಿಯಲ್ಲಿ ಸ್ಪೇನ್ ತನ್ನ ಆರು ಪಂದ್ಯಗಳಲ್ಲಿಯೂ ಗೆದ್ದಿದೆ. ಐದು ಪಂದ್ಯಗಳಲ್ಲಿ ಎದುರಾಳಿ ತಂಡಕ್ಕೆ ಒಂದೇ ಒಂದು ಗೋಲು ಗಳಿಸಲು ಅವಕಾಶ ನೀಡಿಲ್ಲ. ಏತನ್ಮಧ್ಯೆ, ಸ್ಪೇನ್ ಫಿಫಾ ವಿಶ್ವಕಪ್‌ನ ಫೈನಲ್ ತಲುಪಿರುವುದು ಇದು ಎರಡನೇ ಬಾರಿಯಾಗಿದೆ (ಏಜೆನ್ಸೀಸ್).