ಡಿವೋರ್ಸ್​​​​​ ಬೇಕಾದ್ರೆ ತಿಂಗಳಿಗೆ ಇಷ್ಟು ಜೀವನಾಂಶ ಕೊಡಿ... ಆರತಿ ಬೇಡಿಕೆಯಿಟ್ಟ ಮೊತ್ತ ಕೇಳಿ ಜಯಂ ರವಿ ಶಾಕ್! Jayam Ravi

Jayam Ravi : ದಕ್ಷಿಣ ಭಾರತದ ಖ್ಯಾತ ನಟ ರವಿ ಮೋಹನ್ ತಮ್ಮ ವೈಯಕ್ತಿಕ ಬದುಕಿನ ಕಾರಣದಿಂದಾಗಿ ದೀರ್ಘಕಾಲದಿಂದ ಸುದ್ದಿಯಲ್ಲಿದ್ದು, ಪತ್ನಿ ಆರತಿ ಜೊತೆಗಿನ ವಿಚ್ಛೇದನ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ತನಗೆ ಯಾವುದೇ ಮಾಹಿತಿ ನೀಡದೆ ರವಿ ಸಾಮಾಜಿಕ ಜಾಲತಾಣಗಳಲ್ಲಿ ವಿಚ್ಛೇದನ ಘೋಷಿಸಿದ್ದಾರೆ ಎಂದು ಆರತಿ ಆರೋಪಿಸಿದ್ದಾರೆ. ಇಂದಿಗೂ ಗಂಡ-ಹೆಂಡತಿ ನಡುವೆ ಜಗಳ ಮುಂದುವರಿದೇ ಇದೆ. 2024 ರಲ್ಲಿ ಇಬ್ಬರ ದಾಂಪತ್ಯದಲ್ಲಿ ಬಿರುಗಾಳಿ ಎಬ್ಬಿತು. ಆ ಸಮಯದಲ್ಲಿ ಪತ್ನಿ ಆರತಿ ವಿರುದ್ಧ ಸಂಚಲನ ಮೂಡಿಸುವಂತಹ ಆರೋಪಗಳನ್ನು ಮಾಡಿದ್ದ ಜಯಂ ರವಿ, ಆರತಿ ನನ್ನ ಸಂಪೂರ್ಣ ಹಣವನ್ನು ದೋಚಿದ್ದಾಳೆ, ನನ್ನ ವಯಸ್ಸಾದ ಪೋಷಕರಿಗೆ ತೀವ್ರ ಮುಜುಗರ ಉಂಟುಮಾಡಿದ್ದಾಳೆ ಹಾಗೂ ನನ್ನ ಮಕ್ಕಳನ್ನು ನನ್ನಿಂದ ದೂರ ಇಟ್ಟಿದ್ದಾಳೆ ಎಂದು ದೂರಿದರು. ಇದಕ್ಕೆ ತಿರುಗೇಟು ನೀಡಿದ್ದ ಆರತಿ, ಜಯಂ ರವಿ ಅವರು ಗಾಯಕಿ ಕೆನಿಶಾ ಜತೆ ಸಂಬಂಧ ಇಟ್ಟುಕೊಂಡಿದ್ದಾರೆ ಎಂದು ಗಂಭೀರ ಆರೋಪ ಮಾಡಿದರು. ಹೀಗೆ ನಿರಂತರವಾಗಿ ಸುದ್ದಿಯಲ್ಲಿರುವ ಜಯಂ ರವಿ ಡಿವೋರ್ಸ್ ಕೇಸ್​, ಇತ್ತೀಚೆಗೆ ಮತ್ತೊಮ್ಮೆ ಹೆಚ್ಚು ಸದ್ದು ಮಾಡುತ್ತಿದೆ.

ಕಳೆದ ಎರಡು ವರ್ಷಗಳಿಂದ ಈ ವಿಚ್ಛೇದನ ಪ್ರಕರಣ ನ್ಯಾಯಾಲಯದಲ್ಲಿ ನಡೆಯುತ್ತಿದ್ದು, ಇತ್ತೀಚೆಗೆ ತನ್ನ ವಿರುದ್ಧ ಬರುತ್ತಿರುವ ನಿರಂತರ ಟ್ರೋಲ್‌ಗಳನ್ನು ತಡೆಯಲಾರದೇ ಗಾಯಕಿ ಕೆನಿಶಾ, ಆರತಿ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿ, ತಾನು ಚೆನ್ನೈ ತೊರೆಯುತ್ತಿರುವುದಾಗಿ ಜಯಂ ರವಿಗೆ ತಿಳಿಸಿದ್ದಾರೆ. ಇದರಿಂದ ತೀವ್ರ ಭಾವುಕರಾದ ಜಯಂ ರವಿ ತಕ್ಷಣವೇ ಪತ್ರಿಕಾಗೋಷ್ಠಿ ನಡೆಸಿ, ತಮ್ಮ ಪತ್ನಿಯ ವಿರುದ್ಧ ಆಕ್ರೋಶ ಹೊರಹಾಕಿದರು.

ಪತ್ನಿ ಆರತಿ ಈಗಾಗಲೇ ನನ್ನ ಬ್ಯಾಂಕ್ ಖಾತೆಗಳು, ಆಸ್ತಿ ಮತ್ತು ಮನೆಯನ್ನು ಕಿತ್ತುಕೊಂಡಿದ್ದಾಳೆ, ಪೋಷಕರಿಗೆ ಮುಜುಗರ ಉಂಟುಮಾಡಿ ಮಕ್ಕಳನ್ನು ದೂರ ಮಾಡಿದ್ದಾಳೆ ಹಾಗೂ ತನ್ನ ಮೇಲೆ ಮಾಟಮಂತ್ರ ಮಾಡಿಸಿದ್ದಾಳೆ ಎಂದು ಗಂಭೀರ ಆರೋಪಗಳನ್ನು ಮಾಡಿದರು. ಇದರ ಜೊತೆಗೆ ವಿಚ್ಛೇದನ ಸಿಗುವವರೆಗೂ ನಾನು ಸಿನಿಮಾಗಳನ್ನು ಮಾಡುವುದಿಲ್ಲ ಎಂದು ಶಪಥ ಮಾಡಿದರು. ಇದೀಗ ಈ ಪ್ರಕರಣದಲ್ಲಿ ಮತ್ತೊಂದು ಸ್ಫೋಟಕ ಸುದ್ದಿ ಬೆಳಕಿಗೆ ಬಂದಿದೆ.

ತಮಿಳು ಮಾಧ್ಯಮಗಳ ಇತ್ತೀಚಿನ ವರದಿಗಳ ಪ್ರಕಾರ, ನ್ಯಾಯಾಲಯದಲ್ಲಿ ವಿಚ್ಛೇದನ ಪ್ರಕರಣದ ವಿಚಾರಣೆ ನಡೆಯುತ್ತಿರುವಾಗಲೇ ಪತ್ನಿ ಆರತಿ, ತಮಗೆ ಜಯಂ ರವಿಯವರಿಂದ ಮಾಸಿಕ 40 ಲಕ್ಷ ರೂಪಾಯಿ ಜೀವನಾಂಶ ಬೇಕೆಂದು ಚೆನ್ನೈ ಕೌಟುಂಬಿಕ ನ್ಯಾಯಾಲಯದಲ್ಲಿ ಬೇಡಿಕೆ ಇಟ್ಟಿದ್ದಾರೆ ಎಂದು ತಿಳಿದುಬಂದಿದೆ. ನಮ್ಮಿಬ್ಬರ ಮಧ್ಯೆ ಮೂರನೇ ವ್ಯಕ್ತಿ ಬಂದಿದ್ದರಿಂದಲೇ ನಮ್ಮ ಸುಂದರ ಸಂಬಂಧ ಮುರಿದುಬಿತ್ತು ಎಂದು ಆರತಿ ನ್ಯಾಯಾಲಯದಲ್ಲಿ ಹೇಳಿಕೆ ನೀಡಿದ್ದಾರೆ ಆದರೆ, ಜಯಂ ರವಿ ಮಾತ್ರ ಯಾವುದೇ ಕಾರಣಕ್ಕೂ ರಾಜಿ ಸಾಧ್ಯವೇ ಇಲ್ಲ ಮತ್ತು ತಮಗೆ ವಿಚ್ಛೇದನ ಬೇಕೇ ಬೇಕು ಎಂದು ಪಟ್ಟು ಹಿಡಿದಿದ್ದಾರೆ ಎಂದು ವರದಿಯಾಗಿದೆ. ಇನ್ನು ಆರತಿ ಬೇಡಿಕೆ ಇಟ್ಟಿರುವ ಜೀವನಾಂಶದ ಮೊತ್ತ ಕೇಳಿ ಜಯಂ ರವಿ ಕೂಡ ಒಂದು ಕ್ಷಣ ದಂಗಾಗಿದ್ದಾರೆ ಎಂದು ಹೇಳಲಾಗುತ್ತಿದೆ.

ಪತ್ನಿ ಆರತಿ ಮಾಸಿಕ 40 ಲಕ್ಷ ರೂಪಾಯಿ ಜೀವನಾಂಶ ಕೇಳಿರುವುದರ ವಿರುದ್ಧ ಇದೀಗ ವ್ಯಾಪಕ ಟೀಕೆಗಳು ವ್ಯಕ್ತವಾಗುತ್ತಿವೆ. ಏಕೆಂದರೆ, ಆರತಿ ಈಗಾಗಲೇ ಕೋಟ್ಯಂತರ ರೂಪಾಯಿ ಮೌಲ್ಯದ ಸ್ವಂತ ಆಸ್ತಿಯನ್ನು ಹೊಂದಿದ್ದು, ತಮ್ಮ ತಂದೆಯ ಪರವಾಗಿ ಪ್ರಮುಖ ಉದ್ಯಮಗಳನ್ನು ಅವರೇ ನೋಡಿಕೊಳ್ಳುತ್ತಿದ್ದಾರೆ ಎಂದು ವರದಿಯಾಗಿದೆ. ಇತ್ತ ಜಯಂ ರವಿ ಅವರು ಈಗಾಗಲೇ ಪತ್ನಿ ತನ್ನ ಮನೆ ಮತ್ತು ಕೋಟ್ಯಂತರ ಹಣವನ್ನು ಲೂಟಿ ಮಾಡಿದ್ದಾರೆ ಎಂದು ಆರೋಪಿಸುತ್ತಿರುವಾಗ, ಆರತಿ ಮತ್ತೆ ಇಷ್ಟೊಂದು ಭಾರಿ ಮೊತ್ತದ ಜೀವನಾಂಶಕ್ಕೆ ಬೇಡಿಕೆ ಇಟ್ಟಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಮೂಲತಃ ಬೆಂಗಳೂರಿನವರಾದ ಕೆನಿಶಾ ಫ್ರಾನ್ಸಿಸ್ ಅವರು ವೃತ್ತಿಪರ ಗಾಯಕಿ, ಸಂಗೀತ ನಿರ್ಮಾಪಕಿ ಹಾಗೂ ಅಧ್ಯಾತ್ಮಿಕ ಚಿಕಿತ್ಸಕಿ (ಸ್ಪಿರಿಚುಯಲ್ ಥೆರಪಿಸ್ಟ್) ಆಗಿದ್ದಾರೆ. 'ದಿ ಸ್ಟೇಜ್' (The Stage) ಎಂಬ ಜನಪ್ರಿಯ ಸಂಗೀತ ರಿಯಾಲಿಟಿ ಶೋನಲ್ಲಿ ಫೈನಲಿಸ್ಟ್ ಆಗುವ ಮೂಲಕ ಇವರು ಮೊದಲ ಬಾರಿಗೆ ದೇಶಾದ್ಯಂತ ಬೆಳಕಿಗೆ ಬಂದರು. ತದನಂತರ ಗೋವಾ ಮತ್ತು ಬೆಂಗಳೂರಿನ ಪ್ರಮುಖ ಮ್ಯೂಸಿಕ್ ಸರ್ಕ್ಯೂಟ್‌ಗಳಲ್ಲಿ ಲೈವ್ ಪರ್ಫಾರ್ಮರ್ ಆಗಿ ತಮ್ಮದೇ ಆದ ವೃತ್ತಿಜೀವನವನ್ನು ರೂಪಿಸಿಕೊಂಡರು. ಅಂದಹಾಗೆ, ಗಾಯಕಿ ಕೆನಿಶಾ ಫ್ರಾನ್ಸಿಸ್ ಅವರ ವೈಯಕ್ತಿಕ ಜೀವನವು ಅತ್ಯಂತ ಕಠಿಣ ಮತ್ತು ಆಘಾತಕಾರಿ ಸವಾಲುಗಳಿಂದ ತುಂಬಿದೆ. 2013ರಲ್ಲಿ ತಾಯಿಯನ್ನು ಕಳೆದುಕೊಂಡ ಅವರು, ಕೆಲವೇ ವರ್ಷಗಳ ನಂತರ ತಂದೆಯನ್ನೂ ಕಳೆದುಕೊಂಡರು. ತಂದೆಯ ಕೊನೆಯ ದಿನಗಳಲ್ಲಿ ಅವರೊಬ್ಬರೇ ನಿಂತು ಆರೈಕೆ ಮಾಡಿದ್ದರು. ಕೌಟುಂಬಿಕವಾಗಿ ಪುರುಷರಿಂದ ದೌರ್ಜನ್ಯಕ್ಕೊಳಗಾಗಿದ್ದ ಕೆನಿಶಾ, ಬಾಲ್ಯದಲ್ಲಿ ಚರ್ಚ್‌ಗಳಲ್ಲಿ ಹಾಡಲು ಪ್ರಾರಂಭಿಸಿ, ನಂತರದ ದಿನಗಳಲ್ಲಿ ಕಾಫಿ ಶಾಪ್‌ಗಳಲ್ಲಿ ದಿನಕ್ಕೆ 500 ರೂಪಾಯಿ ದುಡಿಯುತ್ತಾ ಸಣ್ಣ ವಯಸ್ಸಿನಲ್ಲೇ ಗಾಯನದಲ್ಲಿ ಹೆಸರು ಮಾಡಿದರು ಹಾಗೂ 'ದಿ ಸ್ಟೇಜ್' ಶೋ ಮೂಲಕ ಪ್ರಸಿದ್ಧಿ ಪಡೆದರು. ಕೇವಲ 18ನೇ ವಯಸ್ಸಿಗೆ ಮದುವೆಯಾಗಿದ್ದ ಇವರು, 19ರ ಹರೆಯದಲ್ಲೇ ಗರ್ಭಪಾತದ ಭೀಕರ ನೋವು ಅನುಭವಿಸಿದರು. ಪತಿ ದೈಹಿಕವಾಗಿ ಹಲ್ಲೆ ನಡೆಸುತ್ತಿದ್ದ, ಪರಸ್ತ್ರೀ ಸಂಬಂಧ ಹೊಂದಿದ್ದ ಹಾಗೂ ಮಾನಸಿಕವಾಗಿ ಹಿಂಸಿಸುತ್ತಿದ್ದ ಕಾರಣ ಆ ವಿಷಕಾರಿ ಸಂಬಂಧದಿಂದ ಹೊರಬಂದು ಅಂದಿನಿಂದ ಒಂಟಿಯಾಗಿ ಜೀವಿಸುತ್ತಿದ್ದಾರೆ. ಯಾವಾಗ ನಟ ಜಯಂ ರವಿ ಜತೆ ಕೆನಿಶಾ ಹೆಸರು ಕೇಳಿಬಂತೋ ಅಂದಿನಿಂದ ಕೆನಿಶಾ ಅವರು ವಿವಾದದ ಕೇಂದ್ರ ಬಿಂದುವಾಗಿದ್ದಾರೆ.

ನಟ ಜಯಂ ರವಿ ಜೊತೆಗಿನ ಒಡನಾಟದ ಬಗ್ಗೆ ಸ್ಪಷ್ಟನೆ ನೀಡಿರುವ ಕೆನಿಶಾ, ತಾವು ಮೊದಲ ಬಾರಿಗೆ ಆಡಿಯೋ ಲಾಂಚ್ ಒಂದರಲ್ಲಿ ಭೇಟಿಯಾಗಿದ್ದಾಗಿ ಮತ್ತು ನಂತರ ರವಿ ಅವರು ಚಿಕಿತ್ಸೆಗಾಗಿ ತಮ್ಮ ಬಳಿಗೆ ಪೇಷೆಂಟ್ ಆಗಿ ಬಂದಾಗ ಉಂಟಾದ ಸ್ನೇಹವಿದು ಎಂದು ತಿಳಿಸಿದ್ದಾರೆ. ರವಿ ಸಂಕಷ್ಟದಲ್ಲಿದ್ದಾಗ ತಾನು ಸ್ನೇಹಿತೆಯಾಗಿ ಜೊತೆಗಿದ್ದೆ ಎಂದಿರುವ ಅವರು, ತಮ್ಮ ವಿರುದ್ಧ ಬೆಂಗಳೂರಿಗೆ ಡಿಟೆಕ್ಟಿವ್‌ಗಳನ್ನು ಕಳುಹಿಸಿ ತನಿಖೆ ಮಾಡಿಸಲಾಗಿದೆ ಹಾಗೂ ಸೋಶಿಯಲ್ ಮೀಡಿಯಾ ಅಕೌಂಟ್‌ಗಳನ್ನು ಹ್ಯಾಕ್ ಮಾಡಲಾಗಿದೆ ಎಂದು ಆರೋಪಿಸಿದ್ದಾರೆ. ಜೊತೆಗೆ, ಜಯಂ ರವಿಗೆ ಮದುವೆಯಾಗಿ ನಾಲ್ಕು ಮಕ್ಕಳಿದ್ದಾರೆ, ತಂದೆಯನ್ನು ವೃದ್ಧಾಶ್ರಮಕ್ಕೆ ಸೇರಿಸಿದ್ದಾರೆ ಎಂಬಿತ್ಯಾದಿ ಸುಳ್ಳು ವದಂತಿಗಳನ್ನು ಹರಡಿದ್ದಕ್ಕೆ ಆಕ್ರೋಶ ವ್ಯಕ್ತಪಡಿಸಿರುವ ಕೆನಿಶಾ, "ಗರ್ಭದಲ್ಲೇ ಮಗುವನ್ನು ಕಳೆದುಕೊಂಡಿರುವ ನಾನು, ಮತ್ತೊಬ್ಬ ವ್ಯಕ್ತಿಯನ್ನು ಆತನ ಮಕ್ಕಳಿಂದ ದೂರ ಮಾಡಲು ಸಾಧ್ಯವೇ? ಎಂದು ಪ್ರಶ್ನಿಸಿದ್ದಾರೆ. ತಮ್ಮ 34 ವರ್ಷದ ಜೀವನದಲ್ಲಿ ಕಳೆದ ಒಂದು ವರ್ಷದಿಂದ ನೆಮ್ಮದಿಯಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗುತ್ತಿಲ್ಲ ಎಂದು ಬೇಸರ ವ್ಯಕ್ತಪಡಿಸಿರುವ ಅವರು, ಸದ್ಯ ಸಂಗೀತ, ಥೆರಪಿ, ಸೋಶಿಯಲ್ ಮೀಡಿಯಾ ಹಾಗೂ ಜಯಂ ರವಿ ಸೇರಿದಂತೆ ಎಲ್ಲರನ್ನೂ ಮತ್ತು ಎಲ್ಲವನ್ನೂ ತೊರೆದು ದೂರ ಸರಿಯುತ್ತಿರುವುದಾಗಿ ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟಿಸಿದ್ದಾರೆ, (ಏಜೆನ್ಸೀಸ್​).