ಜೂನ್ 14ಕ್ಕೆ ಧುರಂಧರ್ 3: ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಫೋಟೊದ ಅಸಲಿಯತ್ತೇನು? Dhurandhar 3

ಮುಂಬೈ: ಬಾಕ್ಸ್​ ಆಫೀಸ್​ನಲ್ಲಿ ಸದ್ಯ ಧೂಳೆಬ್ಬಿಸುತ್ತಿರುವ ಸಿನಿಮಾ ಯಾವುದೆಂದರೆ ಅದು ಧುರಂದರ್​ 2: ದಿ ರಿವೆಂಜ್​ ಆಗಿದೆ. ಬಿಡುಗಡೆಯಾದ ನಾಲ್ಕೇ ದಿನಗಳಲ್ಲಿ 500 ಕೋಟಿಗಳಿಸಿರುವ ಇದು ಇನ್ನು ಕೆಲವೇ ದಿನಗಳಲ್ಲಿ ಸಾವಿರ ಕೋಟಿಯನ್ನು ದಾಟಲಿದೆ.

ಈದೀಗ ಈ ಸಿನಿಮಾವನ್ನು ವೀಕ್ಷಿಸಿದ ಅಭಿಮಾನಿಗಳಲ್ಲಿ ಮಿಲಿಯನ್​ ಡಾಲರ್​ ಪ್ರಶ್ನೆಯೊಂದು ಮೂಡಿದೆ. ಅದೇನೆಂದರೆ, ಈ ಸಿನಿಮಾದ ಮೂರನೇ ಭಾಗ (Dhurandhar 3) ಬರುತ್ತದೆಯೇ? ಅದು ಯಾವಾಗ ಬಿಡುಗಡೆಯಾಗಲಿದೆ? ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಸಹಜವಾಗಿ ಮೂಡಿದೆ.

ಈ ಪ್ರಶ್ನೆ ಜನರ ಮನಸ್ಸಿನಲ್ಲಿ ಮೂಡುತ್ತಿದ್ದಂತೆ ಧುರಂಧರ್​ 2 ಸಿನಿಮಾದ ಕ್ಲೈಮಾಕ್ಸಿನಲ್ಲಿ ಧುರಂಧರ್​ 3: ದಿ ಫೈನಲ್​ ಚಾಪ್ಟರ್​ ಸಿನಿಮಾ ಜೂನ್​ 14 ಕ್ಕೆ ತೆರೆಕಾಣಲಿದೆ ಎಂದು ಬರೆದಿರುವ ಫೋಟೊ ಸಖತ್ ವೈರಲ್​ ಆಗುತ್ತಿದೆ.

ಧುರಂಧರ್​ ಸಿನಿಮಾದ ಮೊದಲ ಭಾಗ ತೆರೆಕಂಡಿದ್ದ ದಿನವೇ ಸಿನಿಮಾ ತಂಡ ಈ ಸಿನಿಮಾದ ಎರಡನೇ ಭಾಗ 2026 ರ ಮಾರ್ಚ್​ 19 ರಂದು ತೆರೆ ಕಾಣಲಿದೆ ಎಂದು ಹೇಳಿದ್ದರು. ಆದರೆ, ಧುರಂಧರ್​ 2: ದಿ ರಿವೆಂಜ್​ ಸಿನಿಮಾದ ಕ್ಲೈಮಾಕ್ಸ್​ನಲ್ಲಿ ಸಿನಿಮಾಗೆ ಪೂರ್ಣವಿರಾಮ ಇಡುವ ಬದಲು ಪ್ರೇಕ್ಷಕರ ಮನದಲ್ಲಿ ಹಲವು ಪ್ರಶ್ನೆಗಳು ಮೂಡುವಂತೆ ಮಾಡಿದ್ದಾರೆ.

ಇದೊಂದು ಕಥೆ ಹೇಳುವ ಪ್ರಕಾರವಾಗಿದ್ದರೂ ಸಹ ಜನರಿಗೆ ಈ ಸಿನಿಮಾದ ಕಥೆ ಇಲ್ಲಿಗೆ ಮುಗಿದಿಲ್ಲ, ಇದರ ಮುಂದಿನ ಭಾಗ ಮತ್ತೆ ಬಿಡುಗಡೆಯಾಗಲಿದೆ ಎಂದು ಅನ್ನಿಸಿದೆ. ಆದರೆ ಈ ಪ್ರಶ್ನೆಗೆ ಉತ್ತರವನ್ನು ಕೇವಲ ನಿರ್ದೇಶಕ ಆದಿತ್ಯ ಧರ್​ ನೀಡಲು ಸಾಧ್ಯವಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುವ ಫೋಟೊಗಳನ್ನು ನಂಬಬೇಡಿ.

ಧುರಂಧರ್​ 2 ಇದು ಧುರಂಧರ್​ ಸಿನಿಮಾದ ಎರಡನೇ ಭಾಗವಾಗಿದೆ. ಈ ಸಿನಿಮಾವು ಕರಾಚಿಯ ಲಿಯಾರಿಗೆ ತೆರಳಿರುವ ಭಾರತದ ಗುಪ್ತಚರನ ಕುರಿತು ನಿರ್ಮಿಸಲಾಗಿರುವ ಒಂದು ಕಾಲ್ಪನಿಕ ಕಥೆಯಾಗಿದೆ. ಅದರೆ ಈ ಸಿನಿಮಾದಲ್ಲಿ ಹಲವು ನೈಜ ಘಟನೆಗಳ ಸನ್ನಿವೇಶಗಳನ್ನು ಸೇರಿಸಿಕೊಂಡಿರುವ ಕಾರಣ ಜನರ ಮೆಚ್ಚುಗೆಗೆ ಪಾತ್ರವಾಗಿದೆ.

ಈ ಸಿನಿಮಾದಲ್ಲಿ ರಣವೀರ್ ಸಿಂಗ್​, ರಾಕೇಶ್​ ಬೇಡಿ, ಆರ್​.ಮಾಧವನ್​, ಅರ್ಜುನ್​ ರಾಂಪಾಲ್​, ಡ್ಯಾನಿಶ್​ ಇಕ್ಬಾಲ್​, ಸಾರಾ ಅರ್ಜುನ್​ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಉರಿ: ದಿ ಸರ್ಜಿಕಲ್​ ಸ್ಟ್ರೈಕ್​ ಸಿನಿಮಾದ ನಿರ್ದೇಶಕ ಆದಿತ್ಯ ಧರ್​ ಈ ಸಿನಿಮಾದ ನಿರ್ದೇಶಕರಾಗಿದ್ದಾರೆ,(ಏಜನ್ಸೀಸ್​).