ಈ ಹಂತದಲ್ಲಿ ಇದೆಲ್ಲಾ ಬೇಕಿತ್ತಾ? ಟಿಮ್​ ಡೇವಿಡ್​ ವರ್ತನೆಯಿಂದ RCBಗೆ ದೊಡ್ಡ ಆಘಾತ ಸಾಧ್ಯತೆ! ಏನಿದು ವಿವಾದ? Tim David

Tim David : ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ರೋಚಕ ಗೆಲುವು ದಾಖಲಿಸಿದ ಬೆನ್ನಲ್ಲೇ ಆಕ್ರಮಣಕಾರಿ ಹಾಗೂ ಅಸಭ್ಯ ಸಂಭ್ರಮಾಚರಣೆ ನಡೆಸಿದ ಆರ್‌ಸಿಬಿ ಆಟಗಾರ ಟಿಮ್ ಡೇವಿಡ್ ವಿರುದ್ಧ ಐಪಿಎಲ್ ಶಿಸ್ತು ಸಮಿತಿಯು ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ.

ಟಿಮ್​ ಡೇವಿಡ್ ಅವರ​ ವರ್ತನೆಯು ಐಪಿಎಲ್ ನೀತಿ ಸಂಹಿತೆಯ ಮಿತಿಗಳನ್ನು ಮೀರಿದೆಯೇ ಎಂದು ಪಂದ್ಯದ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದಾರೆ. ಒಂದು ವೇಳೆ ಡೇವಿಡ್​ ಮಾಡಿದ ಸಂಭ್ರಮಾಚರಣೆ ತಪ್ಪು ಎಂದು ಸಾಬೀತಾದರೆ, ಮುಂದಿನ ಎರಡು ಪಂದ್ಯಗಳವರೆಗೆ​ ಅಮಾನತುಗೊಳ್ಳುವ ಸಾಧ್ಯತೆ ಇದೆ. ಇದೇನಾದರೂ ನಡೆದರೆ, ಟೂರ್ನಿಯ ಅತ್ಯಂತ ನಿರ್ಣಾಯಕ ಹಂತದಲ್ಲಿರುವ ಆರ್‌ಸಿಬಿ ತಂಡಕ್ಕೆ ಇದು ದೊಡ್ಡ ಹಿನ್ನಡೆಯಾಗುವ ಸಾಧ್ಯತೆಯಿದೆ.

ನಿನ್ನೆ (ಮೇ 10) ರಾಯ್​ಪುರದಲ್ಲಿ ನಡೆದ ರೋಚಕ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಮುಂಬೈ ಇಂಡಿಯನ್ಸ್ ತಂಡವನ್ನು ಮಣಿಸಿ ಪ್ಲೇ ಆಫ್ ರೇಸ್‌ನಿಂದ ಹೊರಹಾಕಿತು. ಪಂದ್ಯದ ಕೊನೆಯ ಎಸೆತದಲ್ಲಿ ಜಯಗಳಿಸಿದ ಆರ್‌ಸಿಬಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು. ಆದರೆ, ಆರ್‌ಸಿಬಿ ಪರ ಆಡುತ್ತಿರುವ ಟಿಮ್ ಡೇವಿಡ್ ಅವರಿಗೆ ಈ ದಿನ ಸ್ಮರಣೀಯವಾಗಿರಲಿಲ್ಲ ಏಕೆಂದರೆ, ಡೇವಿಡ್​ ಗೋಲ್ಡನ್ ಡಕ್‌ಗೆ (ಶೂನ್ಯಕ್ಕೆ) ಔಟ್ ಆಗುವ ಮೂಲಕ ವೈಫಲ್ಯ ಅನುಭವಿಸಿದರು.

ಕಾರ್ಬಿನ್ ಬಾಷ್ ಎಸೆತದಲ್ಲಿ ಟಿಮ್ ಡೇವಿಡ್ ವಿಕೆಟ್ ಒಪ್ಪಿಸಿದ್ದು ಪಂದ್ಯದ ನಿರ್ಣಾಯಕ ಹಂತವಾಗಿತ್ತು. ಅಂತಿಮವಾಗಿ ರಸಿಖ್ ಸಲಾಮ್ ದಾರ್ ಗೆಲುವಿನ ರನ್ ಬಾರಿಸಿದಾಗ, ಕ್ಯಾಮೆರಾಗಳು ಆರ್‌ಸಿಬಿ ಡಗೌಟ್‌ನತ್ತ ತಿರುಗಿದವು. ಈ ವೇಳೆ ಟಿಮ್ ಡೇವಿಡ್ ಅವರು ಮಧ್ಯದ ಬೆರಳು ತೋರಿಸುವ ಮೂಲಕ ಅಶ್ಲೀಲ ಸನ್ನೆಯೊಂದಿಗೆ ಸಂಭ್ರಮಾಚರಣೆ ಮಾಡಿರುವುದು ಕಂಡುಬಂದಿದೆ. ಮುಂಬೈ ಇಂಡಿಯನ್ಸ್ ವಿರುದ್ಧದ ಈ ಅಸಭ್ಯ ವರ್ತನೆಯ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ಡೇವಿಡ್​ ವಿರುದ್ಧ ಭಾರಿ ಆಕ್ರೋಶ ವ್ಯಕ್ತವಾಗುತ್ತಿದೆ.

ಪ್ರಸಕ್ತ ಸಾಲಿನಲ್ಲಿಯೂ ಆರ್‌ಸಿಬಿ ಸ್ಮರಣೀಯ ಪ್ರದರ್ಶನ ನೀಡುತ್ತಿದ್ದು, ಆಡಿರುವ 11 ಪಂದ್ಯಗಳಲ್ಲಿ 7ರಲ್ಲಿ ಜಯ ಸಾಧಿಸಿದೆ. ಸದ್ಯ ಪ್ಲೇ ಆಫ್ ಪ್ರವೇಶಿಸುವ ಹಾದಿಯಲ್ಲಿರುವ ಬೆಂಗಳೂರು ತಂಡವು ತನ್ನ ಪ್ರಶಸ್ತಿಯನ್ನು ಯಶಸ್ವಿಯಾಗಿ ಉಳಿಸಿಕೊಳ್ಳಲಿದೆಯೇ ಎಂಬ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದೆ. ಆರ್‌ಸಿಬಿ ತಂಡವು ತನ್ನ ಮುಂದಿನ ಪಂದ್ಯದಲ್ಲಿ ಮೇ 13 ರಂದು ಕೋಲ್ಕತ್ತ ನೈಟ್ ರೈಡರ್ಸ್ ತಂಡವನ್ನು ಎದುರಿಸಲಿದೆ, (ಏಜೆನ್ಸೀಸ್​).