ನನಗೆ RCB ಪರ ಆಡಲು ಇಷ್ಟವಿರಲಿಲ್ಲ: ಶಾಕಿಂಗ್ ಸೀಕ್ರೆಟ್ ಬಿಚ್ಚಿಟ್ಟ ನಾಯಕ ರಜತ್ ಪಾಟೀದಾರ್!

ಯೂಟ್ಯೂಬ್ ಚಾನೆಲ್‌ವೊಂದರ ಸಂದರ್ಶನದಲ್ಲಿ ಮಾತನಾಡಿರುವ ಅವರು, "ನನಗೆ ಆರ್‌ಸಿಬಿ ತಂಡವನ್ನು ಸೇರಲು ಮನಸ್ಸಿರಲಿಲ್ಲ. ಏಕೆಂದರೆ ನಾನು ಕೇವಲ ಬದಲಿ ಆಟಗಾರನಾಗಿ ಹೋಗುತ್ತಿರುವುದರಿಂದ ನನಗೆ ಆಡುವ 11ರ ಬಳಗದಲ್ಲಿ (Playing 11) ಅವಕಾಶ ಸಿಗುವುದಿಲ್ಲ ಎಂಬ ಬಲವಾದ ನಂಬಿಕೆ ಇತ್ತು," ಎಂದು ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.

"ನಾನು ಆರ್‌ಸಿಬಿ ಕ್ಯಾಂಪ್ ಸೇರಿದಾಗ ಅಲ್ಲಿನ ಮ್ಯಾನೇಜ್‌ಮೆಂಟ್ ಕೂಡ ನನಗೆ ಅದೇ ಮಾತನ್ನು ಹೇಳಿತ್ತು. ‘ನೀನು ಕೇವಲ ರಿಪ್ಲೇಸ್‌ಮೆಂಟ್ ಆಗಿ ಬಂದಿದ್ದೀಯಾ, ಆರಾಮಾಗಿ ಇರು. ಯಾರಾದರೂ ಗಾಯಗೊಂಡರೆ ಮಾತ್ರ ನಿನಗೆ ಅವಕಾಶ ಸಿಗುತ್ತದೆ’ ಎಂದು ನೇರವಾಗಿ ಹೇಳಿದ್ದರು. ನನಗೆ ಬೆಂಚ್ ಮೇಲೆ ಸುಮ್ಮನೆ ಕೂರಲು ಇಷ್ಟವಿರಲಿಲ್ಲ. ಅದರ ಬದಲು ಹೋಗದೇ ಇರುವುದೇ ಮೇಲು ಎಂಬುದು ನನ್ನ ಯೋಚನೆಯಾಗಿತ್ತು," ಎಂದು ಪಾಟೀದಾರ್ ಹೇಳಿದ್ದಾರೆ.

ಅದೇ ಸಮಯದಲ್ಲಿ ರಜತ್ ಪಾಟೀದಾರ್ ಅವರ ಮದುವೆ ಕೂಡ ಫಿಕ್ಸ್ ಆಗಿತ್ತು. "ನನ್ನ ಮದುವೆ ದಿನಾಂಕ ನಿಗದಿಯಾಗಿತ್ತು. ಸುಮ್ಮನೆ ಹೋಗಿ ಬೆಂಚ್ ಕಾಯುವ ಬದಲು ಮದುವೆಯಾಗುವುದು ಒಳಿತು ಎಂದುಕೊಂಡಿದ್ದೆ. ಆದರೆ ನನ್ನ ಕೋಚ್‌ಗಳು, ಹಿರಿಯ ಆಟಗಾರರು ಮತ್ತು ಕುಟುಂಬದವರು ನನ್ನ ಮನವೊಲಿಸಿದರು. ಸಿಕ್ಕ ಅವಕಾಶವನ್ನು ಕೈಚೆಲ್ಲಬೇಡ, ಮದುವೆಯನ್ನು ಎರಡು ತಿಂಗಳು ಮುಂದೂಡು ಎಂದು ಸಲಹೆ ನೀಡಿದರು. ಅವರ ಮಾತು ಕೇಳಿ ನಾನು ಆರ್‌ಸಿಬಿ ತಂಡ ಸೇರಿಕೊಂಡೆ," ಎಂದು ಪಾಟೀದಾರ್ ತಿಳಿಸಿದ್ದಾರೆ.

ವಿಧಿ ಆಟವೇ ಬೇರೆಯಾಗಿತ್ತು. ಲವ್‌ನೀತ್ ಸಿಸೋಡಿಯಾ ಎಂಬ ಆಟಗಾರ ಗಾಯಗೊಂಡಿದ್ದರಿಂದ ಅನಿವಾರ್ಯವಾಗಿ ಆರ್‌ಸಿಬಿ ಸೇರಿದ ಪಾಟೀದಾರ್, ಸಿಕ್ಕ ಅವಕಾಶದಲ್ಲೇ ಅಬ್ಬರಿಸಿದರು. 2022ರ ಎಲಿಮಿನೇಟರ್ ಪಂದ್ಯದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧ ಕೇವಲ 54 ಎಸೆತಗಳಲ್ಲಿ ಅಜೇಯ 112 ರನ್ ಚಚ್ಚಿ ಇತಿಹಾಸ ನಿರ್ಮಿಸಿದರು.

ಅಲ್ಲಿಂದ ಮುಂದೆ ಆರ್‌ಸಿಬಿ ತಂಡದ ಮಧ್ಯಮ ಕ್ರಮಾಂಕದ ಆಧಾರಸ್ತಂಭವಾದರು. 2024ರಲ್ಲಿ ಭರ್ಜರಿ ಪ್ರದರ್ಶನ ನೀಡಿದ ಇವರನ್ನು, 2025ರಲ್ಲಿ ವಿರಾಟ್ ಕೊಹ್ಲಿ ನಾಯಕತ್ವದಿಂದ ಕೆಳಗಿಳಿದಾಗ ಆರ್‌ಸಿಬಿ ತಂಡದ ಹೊಸ ಕ್ಯಾಪ್ಟನ್ ಆಗಿ ನೇಮಿಸಲಾಯಿತು. ಪಾಟೀದಾರ್ ನಾಯಕನಾದ ಮೊದಲ ವರ್ಷವೇ (2025) ಆರ್‌ಸಿಬಿಯ ಹಲವು ವರ್ಷಗಳ ಟ್ರೋಫಿ ಬರಗಾಲವನ್ನು ನೀಗಿಸಿದರು. ಅಷ್ಟೇ ಅಲ್ಲದೆ, ಪ್ರಸಕ್ತ 2026ರ ಸೀಸನ್‌ನಲ್ಲೂ ತಂಡವನ್ನು ಸತತ ಎರಡನೇ ಬಾರಿಗೆ ಚಾಂಪಿಯನ್ ಪಟ್ಟಕ್ಕೇರಿಸಿ ಸೈ ಎನಿಸಿಕೊಂಡಿದ್ದಾರೆ. ಅಂದು ಬೇಡ ಎಂದಿದ್ದ ಆರ್‌ಸಿಬಿ ತಂಡಕ್ಕೆ ಇಂದು ಇವರೇ ಮಹಾರಾಜನಾಗಿದ್ದಾರೆ,(ಏಜೆನ್ಸೀಸ್​).