ದೃಢ ಮನಸ್ಸು, ಇಚ್ಛಾಶಕ್ತಿ, ಗುರಿ ಇದ್ದರೆ ನಾವು ಜೀವನದಲ್ಲಿ ಏನನ್ನೂ ಬೇಕಾದರೂ ಸಾಧಿಸಬಹುದು. ಯಾರ ಕೊಂಕು ಮಾತುಗಳಿಗೆ ಕುಗ್ಗದೆ, ಆ ಮಾತುಗಳನ್ನೇ ಸಾಧನೆಯ ಅಡಿಪಾಯವಾಗಿಸಿಕೊಂಡು ಗೆಲುವು ಕಾಣುವುದೇ ಅದ್ಭುತ ಯಶಸ್ಸು ಎಂಬುದನ್ನು ಪ್ಯಾರಿಸ್ ಪ್ಯಾರಾಲಿಂಪಿಕ್ಸ್ 2024ರಲ್ಲಿ ಕಂಚು ಗೆದ್ದ ದೀಪ್ತಿ ಇಡೀ ಜಗತ್ತಿಗೆ ಸಾರಿದ್ದಾರೆ. ಹುಟ್ಟಿದ್ದೇ ತಪ್ಪಾಯ್ತು ಎನ್ನುವ ಕಷ್ಟದಲ್ಲಿ ಬೆಳೆದ ದೀಪ್ತಿಯ ಹಾದಿ ಅಂದುಕೊಂಡಷ್ಟು ಸುಲಭ ಇರಲಿಲ್ಲ. ಹುಟ್ಟಿನಿಂದಲೇ ಅಪಸ್ವರ, ನೋಡಲು ವಿಕಾರ, ವಿಚಿತ್ರ, ಕೋತಿ, ಹುಚ್ಚಿ ಎಂಬ ಚುಚ್ಚು ಮಾತುಗಳನ್ನೇ ಕೇಳುತ ಬೆಳೆದ ಪದಕ ಸಾಧಕಿ, ಅವಮಾನ, ಅಪಮಾನ ಬಿಟ್ಟರೇ ಬೇರೇನೂ ಕೇಳಲೇ ಇಲ್ವಂತೆ. ಈ ಬಗ್ಗೆ ಸ್ವತಃ ದೀಪ್ತಿ ಅವರ ಪೋಷಕರೇ ಮಾತನಾಡಿದ್ದು, ಮಗಳ ಬಾಲ್ಯದ ಪರಿಸ್ಥಿತಿ, ಎದುರಿಸಿದ ಕಠಿಣ ಸವಾಲುಗಳ ಕುರಿತು ಮನಬಿಚ್ಚಿ ಒಂದಷ್ಟು ವಿಷಯಗಳನ್ನು ಹಂಚಿಕೊಂಡಿದ್ದಾರೆ.
