ಇತ್ತೀಚೆಗಷ್ಟೆ ಚಿತ್ರದ ಟ್ರೇಲರ್ ಬಿಡುಗಡೆ ಮಾಡಲಾಗಿದ್ದು, ಇದೇ 22ಕ್ಕೆ ಚಿತ್ರ ರಿಲೀಸ್ ಆಗಲಿದೆ. ನಾಯಕ ಉಮೇಶ್, ‘ನಾನು ಮೂಲತಃ ವಕೀಲ. ಈ ಸಿನಿಮಾದ ಕಥೆ ಹಾಗೂ ಇದರಲ್ಲಿರುವ ಸಂದೇಶ ಇಷ್ಟವಾಗಿ ಪಾತ್ರ ಮಾಡಲು ಒಪ್ಪಿಕೊಂಡೆ. ನನ್ನ ಪಾತ್ರ ಚಿತ್ರದುದ್ದಕ್ಕೂ ಸ್ಲಂನಲ್ಲಿಯೇ ಇರುತ್ತದೆ’ ಎಂದು ಹೇಳಿಕೊಂಡರು. ಉಮೇಶ್ಗೆ ನಾಯಕಿಯಾಗಿರುವ ಶ್ರೀವಿದ್ಯಾ, ‘ನಾನು ಸ್ಲಂ ಮಹಿಳೆಯ ಪಾತ್ರವನ್ನು ಮಾಡುತ್ತಿದ್ದೇನೆ. ಚಿತ್ರೀಕರಣವನ್ನು ಸ್ಲಂನಲ್ಲೇ ಮಾಡಿದ್ದು, ಆ ಜೀವನದ ಹೊಸ ಅನುಭವ ಸಿಕ್ಕಿತು’ ಎಂದರು. ನಿರ್ದೇಶಕ ಉದಯ್, ‘ನನ್ನ ಗೆಳೆಯನ ಜೀವನದಲ್ಲಿ ನಡೆದ ನೈಜ ಘಟನೆ ಇದು. ಶಿಕ್ಷಣ ಎನ್ನುವುದು ಯಾಕೆ ಕಮರ್ಷಿಯಲ್ ಆಗಿದೆ? ಜೀವನದಲ್ಲಿ ಮಾರ್ಕ್ಸ್ ಮಾತ್ರ ಮುಖ್ಯವೇ? ಹೀಗೆ ಈಗಿನ ಶಿಕ್ಷಣ ಪದ್ಧತಿಯ ಹಲವು ಅಂಶಗಳ ಕುರಿತ ಸಿನಿಮಾ. ಸೆಟ್ ಹಾಕದೇ, ಸ್ಲಂ ಹಾಗೂ ಮಾರುಕಟ್ಟೆಯಲ್ಲಿ ನೈಜವಾಗಿ ಶೂಟಿಂಗ್ ಮಾಡಿದ್ದೇವೆ’ ಎಂದು ಮಾಹಿತಿ ನೀಡಿದರು.
