ಸಂಧಾನದ ಬಳಿಕ ಒಂದೇ ಕೋಣೆಯಲ್ಲಿ ಮಲಗಿದ್ದ ಪತಿ-ಪತ್ನಿ: ಕಿರುಚಾಟ ಕೇಳಿ ಹತ್ತಿರ ಬಂದವರಿಗೆ ಕಾದಿತ್ತು ಶಾಕ್​! Wife

Wife : ಪತ್ನಿಯ ಮೇಲೆ ಅನುಮಾನಗೊಂಡು ಆಕೆ ಮಲಗಿದ್ದಾಗ ಚಾಕುವಿನಿಂದ ಆಕೆಯ ಕತ್ತು ಕೊಯ್ದು ಕೊಲೆ ಮಾಡಿರುವ ಆಘಾತಕಾರಿ ಘಟನೆ ಹೈದರಾಬಾದ್​ನ ಕುಶೈಗುಡ ಪೊಲೀಸ್ ಠಾಣಾ ವ್ಯಾಪ್ತಿಯ ಅನುಪುರಂನಲ್ಲಿ ನಡೆದಿದೆ.

ಕುಶೈಗುಡ ಠಾಣೆಯ ಎಸ್‌ಐ ಸುಧಾಕರ್ ರೆಡ್ಡಿ ಮಾಹಿತಿ ಪ್ರಕಾರ, ಯಾದದ್ರಿ ಜಿಲ್ಲೆಯ ಅಡ್ಡಗುದೂರು ಗ್ರಾಮದ ನಿವಾಸಿ ಬೋಡಾ ಶಂಕರ್, ಅದೇ ಮಂಡಲದ ಗೋವಿಂದಪುರಂ ಗ್ರಾಮದ ನಿವಾಸಿ ಮಂಜುಳಾ ಅವರನ್ನು 18 ವರ್ಷಗಳ ಹಿಂದೆ ವಿವಾಹವಾದರು.

ಆರೋಪಿ ಶಂಕರ್ ಮದುವೆಗೆ ಮೊದಲು ಮುಂಬೈನಲ್ಲಿ ತನ್ನ ಸಹೋದರಿಯ ಮನೆಯಲ್ಲಿ ವಾಸಿಸುತ್ತಿದ್ದನು. ಆತ ಪ್ಲಂಬರ್ ಆಗಿ ಕೆಲಸ ಮಾಡುತ್ತಿದ್ದನು. ಮದುವೆಯ ನಂತರ, ತಮ್ಮ ಪತ್ನಿ ಮಂಜುಳಾ ಅವರನ್ನು​ ಮುಂಬೈಗೆ ಕರೆದುಕೊಂಡು ಹೋಗಿ ಶಂಕರ್​ ನೆಲೆಸಿದರು. ದಂಪತಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ. ಕಳೆದ ಕೆಲವು ವರ್ಷಗಳಿಂದ, ಶಂಕರ್ ತನ್ನ ಹೆಂಡತಿಯ ನಡವಳಿಕೆಯ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದರಿಂದ ಅವರಿಬ್ಬರ ನಡುವೆ ಆಗಾಗ್ಗೆ ಜಗಳಗಳು ನಡೆಯುತ್ತಿದ್ದವು.

ಈ ಹಿನ್ನೆಲೆಯಲ್ಲಿ ಶಂಕರ್ ಆಗಾಗ್ಗೆ ತನ್ನ ಹೆಂಡತಿಗೆ ದೈಹಿಕ ಮತ್ತು ಮಾನಸಿಕ ಹಿಂಸೆ ನೀಡುತ್ತಿದ್ದ. ಆತನ ಕಿರುಕುಳ ಸಹಿಸಲಾಗದೆ ಮಂಜುಳಾ ಈ ತಿಂಗಳ 14 ರಂದು ಮುಂಬೈನಿಂದ ಅನುಪುರಂ ಕಾಲನಿಯ ಎ.ಎಸ್.ರಾವ್ ನಗರದಲ್ಲಿ ವಾಸಿಸುವ ತನ್ನ ಸಹೋದರಿ ರಾಣಿಯ ಮನೆಗೆ ಬಂದಳು. ಇದರೊಂದಿಗೆ ಶಂಕರ್ ತನ್ನ ಕಿರಿಯ ಮಗನನ್ನು ಸಹ ಕರೆದುಕೊಂಡು ಈ ತಿಂಗಳ 18 ರಂದು ಹೈದರಾಬಾದ್‌ಗೆ ಬಂದು ತನ್ನ ಹೆಂಡತಿಯನ್ನು ಭೇಟಿಯಾದನು.

ಇದನ್ನೂ ಓದಿ: ಜಿಮ್​ ಮಾಡಿದ ನಂತರ ಸ್ನಾನ ಮಾಡುವುದು ಹಾನಿಕಾರಕವೇ? ಸರಿಯಾದ ವಿಧಾನ ಯಾವುದು? ಇಲ್ಲಿದೆ ಉಪಯುಕ್ತ ಮಾಹಿತಿ…Gym

ಶುಕ್ರವಾರ (ಸೆ.19) ರಾತ್ರಿ ಮಂಜುಳಾರ ಸೋದರಸಂಬಂಧಿ ತೋಟಕೂರ ನಾಗೇಶ್ ಎಂಬುವರ ಮನೆಯಲ್ಲಿ ಪಂಚಾಯ್ತಿ ಮಾಡಿದ್ದ ಹಿರಿಯರು ದಂಪತಿ ನಡುವೆ ಸಂಧಾನ ಮಾಡಿದ್ದರು. ನಂತರ, ಎಲ್ಲರೂ ಒಟ್ಟಿಗೆ ರಾಣಿಯ ಮನೆಗೆ ಮರಳಿದರು. ರಾತ್ರಿ ಎಲ್ಲರೂ ಗಾಢ ನಿದ್ರೆಗೆ ಜಾರಿದಾಗ ಮಂಜುಳಾ ಪಕ್ಕದಲ್ಲಿ ಮಲಗಿದ್ದ ಶಂಕರ್, ಆಕೆಯ ಮೇಲೆ ಹಲ್ಲೆ ನಡೆಸಿ, ಚಾಕುವಿನಿಂದ ಕತ್ತು ಕೊಯ್ದು ಕೊಲೆ ಮಾಡಿರುವ ಆರೋಪ ಕೇಳಿಬಂದಿದೆ.

ಮಂಜುಳಾ ಅವರ ಕಿರುಚಾಟ ಕೇಳಿದ ಕುಟುಂಬ ಸದಸ್ಯರು ಎಚ್ಚರಗೊಂಡರು. ಈ ವೇಳೆ ಶಂಕರ್​ ಅಲ್ಲಿಂದ ಪರಾರಿಯಾಗಿದ್ದಾನೆ. ಇತ್ತ ಮಂಜುಳಾ ರಕ್ತದ ಮಡುವಿನಲ್ಲಿ ಬಿದ್ದು ಒದ್ದಾಡಿ ಪ್ರಾಣ ಬಿಟ್ಟಿದ್ದಾಳೆ. ಈ ಕುರಿತು ಮಾಹಿತಿ ಪಡೆದ ಪೊಲೀಸರು, ಸ್ಥಳಕ್ಕೆ ತಲುಪಿ ಸಾಕ್ಷ್ಯಗಳನ್ನು ಸಂಗ್ರಹಿಸಿದರು. ಮೃತರ ಸಹೋದರ ಭಿಕ್ಷಪತಿ ಅವರ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಶವವನ್ನು ಗಾಂಧಿ ಆಸ್ಪತ್ರೆಗೆ ಸ್ಥಳಾಂತರಿಸಿ, ತನಿಖೆ ಕೈಗೊಂಡಿದ್ದಾರೆ.

ಕೊಲೆಯ ನಂತರ ಆರೋಪಿ ಮನೆಯಿಂದ ಪರಾರಿಯಾಗುತ್ತಿರುವುದು ಸಿಸಿಟಿವಿ ಕ್ಯಾಮೆರಾಗಳಲ್ಲಿ ದಾಖಲಾಗಿದೆ. ತಲೆಮರೆಸಿಕೊಂಡಿರುವ ಆರೋಪಿ ಶಂಕರ್‌ಗಾಗಿ ಹುಡುಕಾಟ ಆರಂಭಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/this-dad-is-a-hero-he-saved-the-life-of-his-unconscious-baby-by-giving-him-cpr

https://www.vijayavani.net/do-you-know-who-the-3-zodiac-signs-are-who-spend-money-recklessly