ನೀನು ಹಿರೋಯಿನ್ ಮೆಟೀರಿಯಲ್ ಎಂದ ನಿರ್ದೇಶಕ ಆಡಿಷನ್ ನೆಪದಲ್ಲಿ ಮಾಡಿದ್ದೇನು? ಸಿನಿಮಾ ರಂಗದ ಕರಾಳ ಮುಖ ಬಿಚ್ಚಿಟ್ಟ ಶಿಖಾ ಸಿಂಗ್​! Shikha Singh

ಬಾಲಿವುಡ್​: ಕಿರುತೆರೆಯ ಜನಪ್ರಿಯ ಧಾರಾವಾಹಿ ಕುಂಕುಮ ಭಾಗ್ಯ ಖ್ಯಾತಿಯ ನಟಿ ಶಿಖಾ ಸಿಂಗ್ (Shikha Singh) ಚಿತ್ರರಂಗದ ಕರಾಳ ಸತ್ಯವೊಂದನ್ನು ಬಹಿರಂಗಪಡಿಸಿದ್ದಾರೆ. ಗ್ಲಾಮರ್ ಪ್ರಪಂಚದ ಹಿನ್ನೆಲೆಯಲ್ಲಿ ನಡೆಯುವ ಕಾಸ್ಟಿಂಗ್ ಕೌಚ್ ಹಾವಳಿಗೆ ತಾವೂ ಒಮ್ಮೆ ಬಲಿಯಾಗಿದ್ದ ಘಟನೆಯನ್ನು ವಿವರಿಸಿದ್ದಾರೆ.

ಇತ್ತೀಚಿಗೆ ನೀಡಿದ್ದ ಸಂದರ್ಶನವೊಂದರಲ್ಲಿ ಪ್ರಸಿದ್ಧ ಚಲನಚಿತ್ರ ನಿರ್ಮಾಪಕಿಯೊಬ್ಬರು ತಮಗೆ ಸಿನಿಮಾ ಆಫರ್ ನೀಡುವ ಆಸೆಗೆ ಒಡ್ಡಿ, ಅಸಭ್ಯವಾಗಿ ಮುಟ್ಟಲು ಯತ್ನಿಸಿದ ಕಹಿ ಘಟನೆಯನ್ನು ಅವರು ಬಿಚ್ಚಿಟ್ಟಿದ್ದಾರೆ.

ಸಂದರ್ಶನದಲ್ಲಿ ಮಾತನಾಡಿದ ಶಿಖಾ ಸಿಂಗ್, ನನ್ನ ಇಡೀ ಜೀವನದಲ್ಲಿ ಆ ಘಟನೆ ನಡೆದಿದ್ದು ಒಂದೇ ಬಾರಿ. ಅದೇ ನನ್ನ ಮೊದಲ ಮತ್ತು ಕೊನೆಯ ಸಿನಿಮಾ ಆಡಿಷನ್ ಎಂದು ಹೇಳುವ ಮೂಲಕ ಚಿತ್ರರಂಗದ ಮೇಲಿನ ತಮ್ಮ ಕಹಿ ಅನುಭವವನ್ನು ಹಂಚಿಕೊಂಡಿದ್ದಾರೆ.

ತಮಗಾದ ಕಹಿ ಅನುಭವವನ್ನು ನೆನಪಿಸಿಕೊಂಡ ಶಿಖಾ, ನಾನು ಮೊದಲ ಬಾರಿಗೆ ಸಿನಿಮಾವೊಂದರ ಆಡಿಷನ್‌ಗಾಗಿ ಆ ಕಚೇರಿಗೆ ಹೋಗಿದ್ದೆ. ಅಲ್ಲಿ ನಿರ್ದೇಶಕ ಸೋಫಾದಲ್ಲಿ ಕುಳಿತಿದ್ದರು. ನನ್ನೊಂದಿಗೆ ಸಿನಿಮಾ ಬಗ್ಗೆ ಮಾತನಾಡುತ್ತಾ, ಅವರು ನಿಧಾನವಾಗಿ ನನ್ನ ಹತ್ತಿರ ಬರಲು ಶುರು ಮಾಡಿದರು. ಅಷ್ಟೇ ಅಲ್ಲದೆ, ಮಾತನಾಡುತ್ತಲೇ ನನ್ನ ಮೇಲೆ ಕೈ ಹಾಕಿ, ಅನುಚಿತವಾಗಿ ಸ್ಪರ್ಶಿಸಲು ಯತ್ನಿಸಿದರು. ನಾನು ತಕ್ಷಣವೇ ಅಲ್ಲಿಂದ ಎದ್ದು ನಿಂತುಬಿಟ್ಟೆ ಎಂದಿದ್ದಾರೆ.

ಈ ಘಟನೆಯಿಂದ ತೀವ್ರ ಆಘಾತಕ್ಕೊಳಗಾದ ಶಿಖಾ ಸಿಂಗ್, ಆನಂತರ ಬೇರೆ ಯಾವುದೇ ಸಿನಿಮಾಗಳಿಗೆ ಆಡಿಷನ್ ನೀಡದಿರಲು ನಿರ್ಧರಿಸಿದರು. ಬೆಳ್ಳಿ ತೆರೆಯ ಸಹವಾಸವೇ ಬೇಡ ಎಂದು ಟಿವಿ ಉದ್ಯಮದಲ್ಲಿ ತಮ್ಮ ವೃತ್ತಿಜೀವನವನ್ನು ಮುಂದುವರಿಸಲು ತೀರ್ಮಾನಿಸಿದರು. ತಮಗೆ ಕೆಟ್ಟ ಅನುಭವ ನೀಡಿದ ಆ ವ್ಯಕ್ತಿ ಬಾಲಿವುಡ್‌ನ ಅತ್ಯಂತ ಪ್ರಸಿದ್ಧ ನಿರ್ಮಾಪಕ ಎಂದು ಹೇಳಿರುವ ನಟಿ, ಅವರ ಹೆಸರನ್ನು ಬಹಿರಂಗಪಡಿಸಲು ಮಾತ್ರ ನಿರಾಕರಿಸಿದ್ದಾರೆ.

ಸಿನಿಮಾದಿಂದ ದೂರ ಸರಿದರೂ ಶಿಖಾ ಸಿಂಗ್ ಕಿರುತೆರೆಯಲ್ಲಿ ದೊಡ್ಡ ಮಟ್ಟದ ಯಶಸ್ಸು ಕಂಡರು. ಲೆಫ್ಟ್ ರೈಟ್ ಲೆಫ್ಟ್ ಶೋ ಮೂಲಕ ನಟನಾ ವೃತ್ತಿ ಆರಂಭಿಸಿದ ಅವರು, ಮೇರಿ ಡೋಲಿ ತೇರೆ ಅಂಗ್ನಾ ಮತ್ತು ಘರ್ ಕಿ ಲಕ್ಷ್ಮಿ ಬೇಟಿಯಾನ್ ನಂತಹ ಸೀರಿಯಲ್‌ಗಳಲ್ಲಿ ಮಿಂಚಿದರು. 2010ರಲ್ಲಿ ನಾ ಆನಾ ಇಸ್ ದೇಸ್ ಲಾಡೋ ಧಾರಾವಾಹಿಯ ಅಂಬಾ ಸಾಂಗ್ವಾನ್ ಪಾತ್ರ ಇವರಿಗೆ ದೊಡ್ಡ ಬ್ರೇಕ್ ನೀಡಿತು. ಆನಂತರ ಫುಲ್ವಾ, ಆದಾಲತ್, ಮಹಾಭಾರತ, ಮತ್ತು ನಾಗಿನ್ 6 ಸೀರಿಯಲ್‌ಗಳಲ್ಲೂ ನಟಿಸಿದರು.

ವಿಶೇಷವಾಗಿ ಕುಂಕುಮ ಭಾಗ್ಯ ಧಾರಾವಾಹಿಯ ಆಲಿಯಾ ಮೆಹ್ರಾ ಎಂಬ ನೆಗೆಟಿವ್ ಪಾತ್ರ ಇವರಿಗೆ ಮನೆಮಾತಾಗುವಂತೆ ಮಾಡಿತು. ಪ್ರಸ್ತುತ ಅವರು ಜಗಧಾತ್ರಿ ಸೀರಿಯಲ್‌ನಲ್ಲಿ ಸಾಕ್ಷಿ ಮಿತ್ತಲ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ, (ಏಜನ್ಸೀಸ್​).