ಮುಂಬೈ: ಬಾಲಿವುಡ್ ಸುಲ್ತಾನ್ ಸಲ್ಮಾನ್ ಖಾನ್ ( Salman Khan ) ಹೆಸರು ಕೇಳಿದರೆ ಸಾಕು, ಅಭಿಮಾನಿಗಳಲ್ಲಿ ಒಂದು ವಿಶೇಷ ಸಂಭ್ರಮ. ಅವರ ವಿಶಿಷ್ಟ ಅಭಿನಯ, ಆಕರ್ಷಕ ವ್ಯಕ್ತಿತ್ವ ಮತ್ತು ತೆರೆಯ ಮೇಲಿನ ಸೂಪರ್ ಸ್ಟೈಲಿಶ್ ಅವತಾರಕ್ಕೆ ದೊಡ್ಡ ಅಭಿಮಾನಿ ಬಳಗವೇ ಇದೆ. ಇದೀಗ ಅವರ ಬಹುನಿರೀಕ್ಷಿತ ಮಾತೃಭೂಮಿ ಮೇ ವಾರ್ ರೆಸ್ಟ್ ಇನ್ ಪೀಸ್ ಚಿತ್ರದ ಹೊಸ ಹಾಡೊಂದು ಅಭಿಮಾನಿಗಳ ಗಮನ ಸೆಳೆದಿದೆ. ಅದಕ್ಕೆ ಕಾರಣ, ಈ ಬಾರಿ ಸಲ್ಮಾನ್ ಖಾನ್ ನಟನೆಯ ಜತೆಗೆ ಗಾಯಕರಾಗಿಯೂ ಕಾಣಿಸಿಕೊಂಡಿದ್ದಾರೆ.
ಹೌದು, ತೆರಿ ಸೆಕ್ಸಿ ಬ್ಯೂಟಿ ಎಂಬ ಹೊಸ ಹಾಡಿಗೆ ಸಲ್ಮಾನ್ ಖಾನ್ ತಮ್ಮ ಧ್ವನಿ ನೀಡಿದ್ದಾರೆ. ಬರೋಬ್ಬರಿ 11 ವರ್ಷಗಳ ಬಳಿಕ ಅವರು ಮತ್ತೆ ಹಿನ್ನೆಲೆ ಗಾಯನಕ್ಕೆ ಮರಳಿರುವುದು ಈ ಹಾಡಿನ ವಿಶೇಷ. ಅಂದಹಾಗೆ, ಸಲ್ಮಾನ್ ಖಾನ್ ಕೊನೆಯದಾಗಿ 2025ರಲ್ಲಿ ಬಿಡುಗಡೆಯಾದ ಸಿಕಂದರ್ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಅವರ ಮುಂದಿನ ಸಿನಿಮಾಗಾಗಿ ಅಭಿಮಾನಿಗಳು ಕಾಯುತ್ತಿರುವ ನಡುವೆಯೇ ಈ ಹಾಡಿನ ಮೂಲಕ ಮತ್ತೊಂದು ಅಚ್ಚರಿ ನೀಡಿದ್ದಾರೆ.
ಹ್ಯಾಂಗೋವರ್ ಬಳಿಕ ಮತ್ತೆ ಮೈಕ್ ಹಿಡಿದ ಸಲ್ಮಾನ್
ಸಲ್ಮಾನ್ ಖಾನ್ ಈ ಹಿಂದೆ ಕಿಕ್ ಚಿತ್ರದ ಹ್ಯಾಂಗೋವರ್ (2014) ಮತ್ತು ಹೀರೋ ಚಿತ್ರದ ಮೈ ಹೂಂ ಹೀರೋ ತೇರಾ (2015) ಸೇರಿದಂತೆ ಹಲವು ಹಾಡುಗಳಿಗೆ ಧ್ವನಿಯಾಗಿದ್ದರು. ಇದೀಗ ತೆರಿ ಸೆಕ್ಸಿ ಬ್ಯೂಟಿ ಮೂಲಕ ಸುಮಾರು 11 ವರ್ಷಗಳ ನಂತರ ಮತ್ತೆ ಹಿನ್ನೆಲೆ ಗಾಯನಕ್ಕೆ ಮರಳಿದ್ದಾರೆ.
