2 ಸಾಲು ಹಾಡಿ ಎಂದಿದ್ದಕ್ಕೆ Kailash Kher ಗರಂ; 'ಸಚಿನ್ ಬಳಿ ಸಿಕ್ಸ್ ಹೊಡಿಯೋಕೆ ಕೇಳ್ತೀರಾ?, ನಮ್ಮನ್ನು ಜೋಕರ್​ ಮಾಡ್ಬೇಡಿ' ಎಂದು ಕಿಡಿ

Kailash Kher : ತಮ್ಮದೇ ಶೈಲಿ ಹಾಡುಗಳನ್ನು ಹಾಡಿ ಇಂದಿಗೂ ಪ್ರತಿಯೊಂದನ್ನು ಗುನುಗುವಂತೆ ಮಾಡುವ ಸಾಮರ್ಥ್ಯವುಳ್ಳವರು ಎಂದರೆ ಅದು ಕೈಲಾಶ್​ ಖೇರ್​​. ಜಂಗ್ಲಿಯ ಹಳೆ ಪಾತ್ರೆ ಹಳೆ ಕಬ್ಬುಣ, ತುಂಡು ಬೀಡಿ ಹಚ್ಚಿಕೊಂಡು, ಹಿಂದಿ ಸಿನಿಮಾದ ಬಾಮ್​ ಲಹರಿ, ತೆಲುಗಿನ ಬಾಹುಬಲಿ ಸಿನಿಮಾದ ಹಾಡುಗಳು ಸಖತ್​ ಹಿಟ್​​ ಕಂಡಿದ್ದವು ಏಳು ನೂರಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿರುವ ಇವರು ಸದ್ಯ ನೆಟ್ಟಿಗರ ಸಿಟ್ಟಿಗೆ ಸಿಲುಕಿಕೊಂಡಿದ್ದಾರೆ.

ಹೌದು, ಪ್ರಪಂಚದಲ್ಲಿ ಎಲ್ಲೇ ಪ್ರಯಾಣಿಸಿದರು ಅವರ ಅಭಿಮಾನಿಗಳನ್ನು ಸೆಳೆಯುವ ಇವರು, ಇತ್ತಿಚೆಗೆ ದೆಹಲಿಯಲ್ಲಿ ನಡೆದ 'ಸಿಕ್ಸ್ ಸಿಗ್ಮಾ ಲೀಡರ್ ಶಿಪ್ ಸಮಿಟ್ ಕಾರ್ಯಕ್ರದಲ್ಲಿ ಅವರು ಭಾಗಿಯಾಗಿದ್ದರು. ಈ ವೇಳೆ ನಿರೂಪಕಿಯೊಬ್ಬರು 'ಸರ್​​ ದಯವಿಟ್ಟು ಪ್ರೇಕ್ಷಕರ ಕೋರಿಕೆ ಮೇರೆಗೆ ಎರಡು ಸಾಲು ಹಾಡನ್ನು ಹಾಡಿ, ಮೂಡ್​ ಸರಿ ಮಾಡಿ' ಎಂದು ಕೇಳಿಕೊಂಡಿದ್ದಾರೆ. ನಿರೂಪಕಿಯ ಈ ಮಾತಿಗೆ ಸಿಟ್ಟಾದ ಕೈಲಾಶ್​ ವಿನಮ್ರವಾಗಿಯೇ ಅವರ ಮನವಿ ನಿರಾಕರಿಸಿದ್ದಾರೆ.

ಯಾವುದೇ ಸಿನಿಮಾ ಪ್ರೀ ರಿಲೀಸ್​​, ಪ್ರಶಸ್ತಿ ಕಾರ್ಯಕ್ರಮಗಳ ಸಂದರ್ಭದಲ್ಲಿ ನಟ-ನಟಿಯರಿಗೆ ಡೈಲಾಗ್ ಹೇಳಲು ಮತ್ತು ಸಿಂಗರ್ಸ್​ಗೆ ಹಾಡು ಹೇಳಲು ಕೇಳಲಾಗುತ್ತದೆ. ನಟ-ನಟಿಯರನ್ನು ನಿಲ್ಲಿಸಿ ಡ್ಯಾನ್ಸ್​ ಮಾಡಿಸಲಾಗುತ್ತದೆ. ಈ ಅಭ್ಯಾಸವು ಸರಿಯಿಲ್ಲ ಎಂದು ಪರೋಕ್ಷವಾಗಿ ಮಾತನಾಡಿದ್ದಾರೆ.

'ಸಚಿನ್​ ತೆಂಡೂಲ್ಕರ್​ ಅವರು ಬ್ಯಾಟಿಂಗ್​ಗೆ ಫೇಮಸ್​ ಹಾಗಂತ ಎಲ್ಲೆಂದರಲ್ಲಿ ಸಿಕ್ಸ್​ ಹೊಡೆಯಲು ಜನ ಕೇಳಿಕೊಳ್ಳುತ್ತಾರೆಯೇ, ಇಂತಹ ಅಭ್ಯಾಸವನ್ನು ದಯವಿಟ್ಟು ಫಾಲೋ ಮಾಡಬೇಡಿ. ಈ ಅಭ್ಯಾಸ ನನಗೆ ನಿಜಕ್ಕೂ ಇಷ್ಟವಿಲ್ಲ' ಎಂದು ವಿನಮ್ರವಾಗಿ ವಿನಂತಿಸಿಕೊಂಡರು.

'ಸೇನಾ ಸಿಬ್ಬಂದಿ ಬಳಿ ಶತ್ರುಗಳ ವಿರುದ್ಧ ಗುಂಡು ಹಾರಿಸಿ ತೋರಿಸಿ ಎಂದು ಕೇಳುತ್ತಾರೆಯೇ?, ಸಚಿನ್​ ಕಾಣಿಸಕೊಂಡಲ್ಲೆಲ್ಲ ಸಿಕ್ಸರ್​ ಬಾರಿಸೋಕೆ ಮನವಿ ಮಾಡುತ್ತಾರೆಯೇ? ಕಲಾವಿದರ ಬಳಿ ಹೀಗ್ಯಾಕೆ. ನಮ್ಮನ್ನು ಜೋಕರ್​ಗಳಂತೆ ಕಾಣಬೇಡಿ. ನಮ್ಮ ಬಳಿಯೂ ಹಾಡು ಹೇಳಲು, ಡ್ಯಾನ್ಸ್ ಮಾಡಲು ಕೇಳಬೇಡಿ. ನನಗೆ ಈ ಪದ್ಧತಿ ಫಾಲೋ ಮಾಡಲು ಇಷ್ಟವಿಲ್ಲ' ಎಂದು ಹೇಳಿಕೊಂಡಿದ್ದಾರೆ.

'ಕಲಾವಿದರು ಸಾಧಕರು, ಕೇವಲ ಮನರಂಜನೆ ನೀಡೋಕೆ ಮಾತ್ರ ಸೀಮಿತವಾಗಿಲ್ಲ. ಗಾಯನ ಎನ್ನುವುದು ಮನಸ್ಸಿನ ಆಳದಿಂದ ಬರಬೇಕು, ಬೇಕಾದ ಕಡೆಯಲ್ಲೆಲ್ಲ ಹಾಡಿ ಎಂದ ಕೂಡಲೇ ಹಾಡಲು ಸಾಧ್ಯವಿಲ್ಲ' ಎಂದಿದ್ದಾರೆ.

ಸದ್ಯ ಸೋಶಿಯಲ್​ ಮೀಡಿಯಾದಲ್ಲಿ ಅವರು ಮಾತನಾಡಿರುವ ಈ ಹೇಳಿಕೆಯ ವಿಡಿಯೋ ವೈರಲ್​ ಆಗುತ್ತಿದ್ದು, ಎರಡು ಸಾಲು ಹಾಡಿ ಎಂದಿದ್ದು ಅಪರಾಧವಲ್ಲ. ಹಾಡಿದ್ದರೆ ಗಂಟೇನು ಗೋಗುತ್ತಿರಲಿಲ್ಲ ಎಂದು ಕೆಲವರು ಟೀಕೆ ಮಾಡಿದ್ದಾರೆ, ಇನ್ನು ಕೆಲವರು ಅವರ ವಾದವನ್ನು ಸರಿ ಎಂದು ಒಪ್ಪಿಕೊಂಡಿದ್ದಾರೆ, (ಏಜೆನ್ಸೀಸ್).