ಹಾಗೇನಾದರೂ ಆದ್ರೆ, ಅವತ್ತೇ ಸಿನಿಮಾ ಮಾಡೋದು ನಿಲ್ಲಿಸ್ತೀನಿ! 'ಧುರಂಧರ್'​ ನಿರ್ದೇಶಕ 'ಧರ್'​ ಕಾಮೆಂಟ್ಸ್​ ವೈರಲ್​

ಮುಂಬೈ: 'ಧುರಂಧರ್ 2' ಸದ್ಯ ಭಾರತೀಯ ಚಿತ್ರೋದ್ಯಮ ಮಾತ್ರವಲ್ಲ, ಇಡೀ ಜಗತ್ತಿನ ಮೂಲೆ ಮೂಲೆಯಲ್ಲೂ ಸದ್ದು ಮಾಡುತ್ತಿರುವ ಹಿಂದಿ ಸಿನಿಮಾ. ಅತ್ತ, ಇಸ್ರೇಲ್​-ಇರಾನ್​ ಯುದ್ಧದ ವಿಷಯಗಳು ಭಾರೀ ಚರ್ಚೆಗೆ ಗ್ರಾಸವಾಗಿದ್ದರೆ, ಇತ್ತ ಆದಿತ್ಯ ಧರ್ ನಿರ್ದೇಶನದ ಮತ್ತು ರಣವೀರ್ ಸಿಂಗ್ ಅಭಿನಯದ ಧುರಂಧರ್ 2 ಒಂದಷ್ಟು ವಿಷಯಗಳಿಂದ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗುತ್ತಿದೆ.

ಭಾರಿ ನಿರೀಕ್ಷೆಗಳ ನಡುವೆಯೇ ಬಿಡುಗಡೆಗೊಂಡ ಚಿತ್ರದ ಎರಡನೇ ಭಾಗವು ಇದೀಗ ಭಾರತೀಯ ಬಾಕ್ಸ್ ಆಫೀಸ್​ನಲ್ಲಿ ಧೂಳೆಬ್ಬಿಸುತ್ತಿದೆ. ರಿಲೀಸ್ ಆದ ಕೇವಲ ಮೂರೇ ದಿನಕ್ಕೆ ಜಾಗತಿಕವಾಗಿ 500 ಕೋಟಿ ರೂ. ಕಲೆಕ್ಷನ್ ಕಂಡಿದೆ. ಭಾರತದಲ್ಲಿ 300 ಕೋಟಿ ರೂ. ತಲುಪಿದೆ. ಈ ಮೂಲಕ ಹಳೆಯ ದಾಖಲೆಗಳನ್ನು ಮುರಿದು, ತನ್ನದೇ ಹೊಸ ದಾಖಲೆಗಳನ್ನು ಸೃಷ್ಟಿಸಿರುವ ಧುರಂಧರ್​ ಯಶಸ್ಸಿನ ಜೊತೆಗೆ ಕೆಲವು ಟೀಕೆಗಳು ಸಹ ಕೇಳಿಬಂದಿವೆ.

ಕೆಲವರು ಸೋಷಿಯಲ್ ಮೀಡಿಯಾದಲ್ಲಿ ಚಿತ್ರದ ವಿರುದ್ಧ ನೆಗೆಟಿವ್ ಕಾಮೆಂಟ್‌ಗಳನ್ನು ಮಾಡುತ್ತಿದ್ದು, ಇದೊಂದು ಪ್ರಚಾರಮಯ ಸಿನಿಮಾ ಎಂದು ಕರೆದಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರನ್ನು ತೆರೆ ಮೇಲೆ ತಂದಿರುವ ನಿರ್ದೇಶಕರ ಅಜೆಂಡಾ ಬೇರೆಯೇ ಇದೆ ಎಂದು ಕಿಡಿಕಾರಿದ್ದಾರೆ. ಈ ವಿಷಯಕ್ಕೆ ಖಡಕ್ ಉತ್ತರ ನೀಡಿರುವ ಆದಿತ್ಯ ಧರ್, ಆ ರೀತಿ ಎಲ್ಲ ಕಮೆಂಟ್ ಮಾಡುವವರ ಬಗ್ಗೆ ನಾನು ಕಿಂಚಿತ್ತು ತಲೆಕೆಡಿಸಿಕೊಳ್ಳುವುದಿಲ್ಲ ಎಂದಿದ್ದಾರೆ.

"ಯಾರು ಏನು ಬೇಕಾದರೂ ಹೇಳಬಹುದು, ಹೇಳಲಿ. ಆದರೆ, ನಾನು ಅವರೆಲ್ಲರಿಗೂ ಉತ್ತರಿಸುವ ಅಗತ್ಯವಿಲ್ಲ. ಭಾರತೀಯ ಸಿನಿ ಪ್ರೇಕ್ಷಕರು ತುಂಬಾ ಬುದ್ಧಿವಂತರು. ಒಳ್ಳೆಯ ಚಿತ್ರ ಯಾವುದು ಮತ್ತು ಪ್ರಚಾರಕ್ಕೆಂದೇ ಮಾಡಿರುವ ಸಿನಿಮಾ ಯಾವುದು ಎಂಬುದನ್ನು ಸ್ಪಷ್ಟವಾಗಿ ಅರ್ಥೈಸಿಕೊಳ್ಳುವುದು ಅವರಿಗೆ ಗೊತ್ತಿದೆ. ನಾನು ಈ ಕಥೆಯನ್ನು ಕೇವಲ ಸಿನಿಮಾ ದಾಖಲೆಗಳು ಅಥವಾ ವಿವಾದಗಳಿಗೋಸ್ಕರ ಮಾಡಿಲ್ಲ. ಸರಿಯಾದ ಉದ್ದೇಶದಿಂದ ಮಾಡಿದ್ದೇನೆ" ಎಂದು ತಿರುಗೇಟು ನೀಡಿದರು.

"ನಾನು ನಿರ್ದೇಶಕನಾಗಿ ನನ್ನ ಜವಾಬ್ದಾರಿಯನ್ನು ಪ್ರಾಮಾಣಿಕತೆಯಿಂದ ಪೂರೈಸಿದ್ದೇನೆ ಮತ್ತು ನನ್ನ ಆಲೋಚನೆಗಳಲ್ಲಿ ಅಥವಾ ಸಿನಿಮಾಗಳನ್ನು ಮಾಡುವ ರೀತಿಯಲ್ಲಿ ಯಾವುದೇ ತಪ್ಪು ಉದ್ದೇಶವಿದೆ ಅಂತ ನನಗೆ ಅನಿಸಿದ್ದೇ ಆದರೆ, ಖಂಡಿತ ಆ ದಿನವೇ ನಾನು ಸಿನಿಮಾ ಮಾಡೋದನ್ನು ನಿಲ್ಲಿಸುತ್ತೇನೆ" ಎಂದು ಆದಿತ್ಯ ಬಹಳ ಗಟ್ಟಿಯಾಗಿ ಹೇಳಿದ್ದಾರೆ. ನಿರ್ದೇಶಕನ ಈ ಹೇಳಿಕೆಗಳು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ,(ಏಜೆನ್ಸೀಸ್).