ನೀನು ಸತ್ತಿದ್ರೆ... ಐಪಿಎಲ್​ಗೆ ಈ ಮಟ್ಟಿಗಿನ ಕ್ರೇಜಾ? ಶಾಕಿಂಗ್ ಸಂಗತಿ ಹಂಚಿಕೊಂಡ ಮಿಸ್ಟರಿ ಸ್ಪಿನ್ನರ್​

IPL 2026: ಮಾ.28ರಿಂದ ಐಪಿಎಲ್​ 19ನೇ ಸೀಸನ್ ಆರಂಭವಾಗಲಿದ್ದು, ಎಲ್ಲ ತಂಡದ ಆಟಗಾರರು ತಮ್ಮ ತಮ್ಮ ಪ್ರದರ್ಶನದ ಬಗ್ಗೆ ಹೆಚ್ಚು ಗಮನ ಹರಿಸುತ್ತಿದ್ದಾರೆ. ಕಳೆದ ವರ್ಷ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಚೊಚ್ಚಲ ಪ್ರಶಸ್ತಿಗೆ ಮುತ್ತಿಟ್ಟಿತು. ಈ ಬಾರಿ ಯಾವ ತಂಡಗಳು ಚಾಂಪಿಯನ್ಸ್ ಪಟ್ಟಕ್ಕೆ ಭರ್ಜರಿ ಪೈಪೋಟಿ ನೀಡಲಿದೆ ಎಂಬ ಕುತೂಹಲಕಾರಿ ಪ್ರಶ್ನೆಗಳು ಸದ್ಯ ಕ್ರಿಕೆಟ್ ಅಭಿಮಾನಿಗಳಲ್ಲಿ ಮೂಡಿದೆ.

ಈ ಮಧ್ಯೆ ಐಪಿಎಲ್​ನಲ್ಲಿ ಆದ ಕಹಿ ಘಟನೆಯೊಂದರ ಬಗ್ಗೆ ಮನಬಿಚ್ಚಿ ಮಾತನಾಡಿರುವ ಟೀಮ್ ಇಂಡಿಯಾದ ಮಿಸ್ಟರಿ ಸ್ಪಿನ್ನರ್ ವರುಣ್ ಚಕ್ರವರ್ತಿ, 2021ರ ಐಪಿಎಲ್​ ಸಮಯದಲ್ಲಿ ನನಗೆ ಕೋವಿಡ್ 19 ಪಾಸಿಟಿವ್ ಆಯಿತು. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧದ ಪಂದ್ಯವದು. ಪಾಸಿಟಿವ್ ಆದವರಲ್ಲಿ ನನ್ನನ್ನು ಸೇರಿಸಿ ಒಟ್ಟು ಇಬ್ಬರು ಆಟಗಾರರಿದ್ದರು. ಕೋವಿಡ್​ ರೋಗಲಕ್ಷಣಗಳು ಕಾಣಿಸಿಕೊಂಡ ಬೆನ್ನಲ್ಲೇ ಪಂದ್ಯವನ್ನು ಆರಂಭದಲ್ಲಿ ಮುಂದೂಡಲಾಯಿತು ಎಂದರು. 

ನನಗೆ ಪಾಸಿಟಿವ್ ಇರುವುದು ಮೊದಲು ದೃಢವಾಯಿತು. ಆ ನಂತರ ವೇಗಿ ಸಂದೀಪ್ ವಾರಿಯರ್ ಅವರಿಗೂ ಪಾಸಿಟಿವ್ ಬಂದಿತು. ಇದರಿಂದ ಲೀಗ್​ ಅನ್ನು ಅರ್ಧಕ್ಕೆ ನಿಲ್ಲಿಸಲಾಯಿತು. ಪಾಸಿಟಿವ್ ಬಂದ ಮೊದಲ ವ್ಯಕ್ತಿ ನಾನೇ ಆಗಿದ್ದೆ. ಹಾಗಾಗಿ, ಇಡೀ ಐಪಿಎಲ್ ನಿಂತುಹೋಯಿತು. ನನ್ನ ವಿರುದ್ಧ ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೋಲಿಂಗ್ ಶುರುವಾಯಿತು. ಅನೇಕರು ನನ್ನಿಂದ ಐಪಿಎಲ್​ ನಿಂತಿತು ಎಂದು ವಿಪರೀತ ನಿಂದಿಸಿದರು ಎಂದರು.

ಕೋವಿಡ್​ನಿಂದ ಮನೆಯಲ್ಲಿಯೇ ಇರುವಂತ ಪರಿಸ್ಥಿತಿಯಲ್ಲಿ ಸಮಯ ಕಳೆಯಲು ಐಪಿಎಲ್ ಉತ್ತಮ ಮಾರ್ಗವಾಗಿತ್ತು. ಹೀಗಿರುವಾಗಲೇ, ಐಪಿಎಲ್​ ಇಲ್ಲ ಎಂಬ ಸಂಗತಿ ಅವರನ್ನು ಇನ್ನಷ್ಟು ಕೆರಳಿಸಿತು. ಇದರಿಂದ ಸಿಟ್ಟಿಗೆದ್ದ ಅನೇಕ ಕ್ರಿಕೆಟ್​ ಪ್ರೇಮಿಗಳು, ನೀನು ಯಾಕೆ ಬದುಕಿದ್ದೀಯಾ? ಸಾಯಬಾರದಿತ್ತೇ ಎಂದು ಕಮೆಂಟ್​ ಮಾಡಿದ್ದನ್ನು ನಾನು ನೋಡಿದ್ದೇನೆ. ಅವೆಲ್ಲವೂ ಮನಸ್ಸಿಗೆ ತುಂಬ ನೋವುಂಟು ಮಾಡಿತು" ಎಂದು ಯೂಟ್ಯೂಬ್ ಶೋ 'ಜರ್ನಿ ಟು ಜೆರ್ಸಿ'ಯಲ್ಲಿ ಚಕ್ರವರ್ತಿ ಹೇಳಿಕೊಂಡಿದ್ದಾರೆ,(ಏಜೆನ್ಸೀಸ್).