ತ್ರೇತಾಯುಗದ ಕಥೆಗೆ ಮಾಡರ್ನ್​ ಲುಕ್​? ಬ್ರಹ್ಮ ಮುಹೂರ್ತದಲ್ಲಿ 'ರಾಮಾಯಣ' ಟ್ರೇಲರ್​ ರಿಲೀಸ್​; ಲಾರಾ, ಸಾಯಿ ಡ್ರೆಸ್ಸಿಂಗ್​ಗೆ ಮುನಿಸಿಕೊಂಡ ನೆಟ್ಟಿಗ! Ramayan Trailer Controversy

ಮುಂಬೈ: ಸಿನಿಮಾ ಪ್ರಿಯರು ಕಳೆದ ಹಲವು ಸಮಯದಲ್ಲಿ ಕಾಯುತ್ತಿದ್ದ ಅತಿ ದೊಡ್ಡ ಬಜೆಟ್​ ಹಾಗೂ ಅತ್ಯಂತ ಹೆಚ್ಚಿನ ನೀರಿಕ್ಷೆಯಿಟ್ಟಿರುವ ಪೌರಾಣಿಕ ಸಿನಿಮಾ ಭಾಗ 1 ರ ಟ್ರೇಲರ್​ (Ramayan Trailer Controversy) ಗುರುವಾರ (ಜು.30) ಮುಂಜಾನೆ 4.00 ಕ್ಕೆ ಬಿಡುಗಡೆಯಾಗಿದೆ.

ಈ ಸಿನಿಮಾದಲ್ಲಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿರುವ ರಣಬೀರ್ ಕಪೂರ್, ಸಾಯಿ ಪಲ್ಲವಿ ಮತ್ತು ರಾಕಿಂಗ್ ಸ್ಟಾರ್ ಯಶ್ ಮೇಲೆ ಲೆಕ್ಕಕ್ಕೆ ನಿಲುಕದ ನೀರಿಕ್ಷೆಯನ್ನು ಸಿನಿ ಪ್ರೇಕ್ಷಕರು ಹೊಂದಿದ್ದಾರೆ. ಹಾಗೂ ಈ ಟ್ರೇಲರ್​ ಹಿಂದೂ ಸಂಪ್ರದಾಯದಲ್ಲಿ ಅತ್ಯಂತ ಪವಿತ್ರವೆಂದು ನಂಬಲಾಗುವ 'ಬ್ರಹ್ಮ ಮುಹೂರ್ತ' ದ ಸಮಯದಲ್ಲಿ (ಬೆಳಿಗ್ಗೆ 4:00 ಗಂಟೆಗೆ) ರಿಲೀಸ್ ಮಾಡಿ ಚಿತ್ರತಂಡ ಹೊಸ ಇತಿಹಾಸ ಸೃಷ್ಟಿಸಿದೆ.

ಸಿನಿಮಾದ ದೃಶ್ಯ ವೈಭವ ಮತ್ತು ಗ್ರಾಫಿಕ್ಸ್ ಕಂಡು ಫ್ಯಾನ್ಸ್ ಫಿದಾ ಆಗಿದ್ದಾರೆ. ಆದರೆ, ಟ್ರೇಲರ್ ರಿಲೀಸ್ ಆದ ಕೆಲವೇ ಗಂಟೆಗಳಲ್ಲಿ ಪಾತ್ರಧಾರಿಗಳ ವೇಶಭೂಷಣದ ಕುರಿತು ನೆಟ್ಟಿಗರಲ್ಲಿ ಅಸಮಾಧಾನ ವ್ಯಕ್ತವಾಗುತ್ತಿದ್ದು, ಸೋಷಿಯಲ್​ ಮೀಡಿಯಾನಲ್ಲಿ ಭಾರಿ ಚರ್ಚೆಗೆ ಗುರಿಯಾಗಿದೆ.

ರಾಮಾಯಣ ಮಹಾಕಾವ್ಯವು 'ತ್ರೇತಾಯುಗ'ದಲ್ಲಿ ನಡೆದ ಕಥೆಯಾಗಿದೆ. ಆದರೆ ಈ ಸಿನಿಮಾದಲ್ಲಿ ನಟಿಯರ ವೇಷಭೂಷಣಗಳು ತುಂಬಾ ಮಾಡರ್ನ್ ಆಗಿವೆ, ಇಂದಿನ ಕಾಲದ ಫ್ಯಾಷನ್ ತರ ಇದೆ ಎಂದು ಪ್ರೇಕ್ಷಕರು ಅಸಮಾಧಾನ ಹೊರಹಾಕಿದ್ದಾರೆ. ಪ್ರಾಚೀನ ಕಾಲದ ಸಂಸ್ಕೃತಿಯನ್ನು ಬಿಂಬಿಸುವಲ್ಲಿ ನಿರ್ದೇಶಕರು ಮತ್ತು ಕಾಸ್ಟ್ಯೂಮ್ ಡಿಸೈನರ್‌ಗಳು ಎಡವಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿದೆ.

ಈ ವೇಷಭೂಷಣದ ಚರ್ಚೆಗೆ ಮುಖ್ಯವಾಗಿ ಕೈಕೇಯಿ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಲಾರಾ ದತ್ತಾ ಅರ್ಧ ತೋಳಿನ ಬ್ಲೌಸ್ ಧರಿಸಿರುವುದು ನೆಟ್ಟಿಗರ ಕೋಪಕ್ಕೆ ಕಾರಣವಾಗಿದೆ. ಅಲ್ಲದೆ ಕೇಶ ವಿನ್ಯಾಸ ಕೂಡ ಪೌರಾಣಿಕದ ಬದಲು ಮಾ​ಡರ್ನ್​​ ಲುಕ್​ನಲ್ಲಿದೆ ಎಂದು ಕಿಡಿಕಾರುತ್ತಿದ್ದಾರೆ.

ಒಂದೆಡೆ ಚಿತ್ರದ ಮೇಕಿಂಗ್, ರಾಮ-ರಾವಣರ ನಡುವಿನ ಸಂಘರ್ಷವನ್ನು ತೋರಿಸುವ ದೃಶ್ಯಗಳು ಮತ್ತು ಬ್ರಹ್ಮ ಮುಹೂರ್ತದ ಟ್ರೇಲರ್ ಲಾಂಚ್ ಎಲ್ಲರಿಗೂ ಸಖತ್ ಇಷ್ಟವಾಗಿದೆ. ಆದರೆ ಇನ್ನೊಂದೆಡೆ, ಪೌರಾಣಿಕ ಚಿತ್ರಗಳಲ್ಲಿ ಇತಿಹಾಸಕ್ಕೆ ತಕ್ಕಂತೆ ವೇಷಭೂಷಣ, ಕೇಶ ವಿನ್ಯಾಸ ಇರಬೇಕು ಎಂಬುದು ಸಿನಿಪ್ರಿಯರ ವಾದವಾಗಿದೆ.

ಈ ವಿವಾದಗಳ ಹೊರತಾಗಿಯೂ, ಟ್ರೇಲರ್ ಬಿಡುಗಡೆಯಾದ ಕೆಲವೇ ನಿಮಿಷಗಳಲ್ಲಿ ಲಕ್ಷಾಂತರ ವೀವ್ಸ್ ಪಡೆದುಕೊಂಡು ಸಾಮಾಜಿಕ ಜಾಲತಾಣಗಳಲ್ಲಿ ನಂಬರ್ 1 ಟ್ರೆಂಡಿಂಗ್‌ನಲ್ಲಿದೆ. ಬಾಕ್ಸ್‌ಆಫೀಸ್‌ನಲ್ಲಿ ಬಿರುಗಾಳಿ ಎಬ್ಬಿಸಲು ಬರುತ್ತಿರುವ ಈ ಸಿನಿಮಾ ಮುಂದಿನ ದಿನಗಳಲ್ಲಿ ಯಾವೆಲ್ಲಾ ಹೊಸ ದಾಖಲೆಗಳನ್ನು ಬರೆಯಲಿದೆ ಎಂಬುದನ್ನು ಕಾದು ನೋಡಬೇಕಿದೆ, (ಏಜನ್ಸೀಸ್​).