33 ವರ್ಷದ ಯುವಕನ ಜತೆ ಬಾಲಿವುಡ್​ ಬೋಲ್ಡ್​ ಬ್ಯೂಟಿಯ ಡೇಟಿಂಗ್​: ಇಟಲಿಯಲ್ಲಿ ಸಿಕ್ಕಿಬಿದ್ದ ನಟಿ! Bollywood Actress

Bollywood Actress : ಬಾಲಿವುಡ್ ಬೋಲ್ಡ್​ ಬ್ಯೂಟಿ ಮಲೈಕಾ ಅರೋರಾ, ಈ ಹಿಂದೆ ಯುವ ನಟ ಅರ್ಜುನ್ ಕಪೂರ್ ಜತೆ ಡೇಟಿಂಗ್ ಮಾಡಿದ್ದು ಗೊತ್ತೇ ಇದೆ. ಕೆಲ ಸಮಯದವರೆಗೆ ಈ ಜೋಡಿಯ ಪ್ರೇಮಕತೆ ಬಹಳ ಸದ್ದು ಮಾಡಿತು. ಅಲ್ಲದೆ, ಇಬ್ಬರ ನಡುವಿನ ವಯಸ್ಸಿನ ವ್ಯತ್ಯಾಸವು ಕೂಡ ಎಲ್ಲರ ಗಮನ ಸೆಳೆಯಿತು. ಏಕೆಂದರೆ, ಅರ್ಜುನ್ ಅವರು ಮಲೈಕಾಗಿಂತ ಹತ್ತು ವರ್ಷ ಚಿಕ್ಕವರು. 

ಅದೇನಾಯಿತೋ ಕಾಣೆ, ಇದ್ದಕ್ಕಿಂತ ಈ ಜೋಡಿ ದೂರವಾಯಿತು. 2024 ರಲ್ಲಿ ಇಬ್ಬರೂ ಅನಿರೀಕ್ಷಿತವಾಗಿ ಬೇರ್ಪಟ್ಟರು. ಇದರ ಹಿಂದಿನ ಕಾರಣ ಇಂದಿಗೂ ನಿಗೂಢವಾಗಿಯೇ ಉಳಿದಿದೆ. ಅಂದಹಾಗೆ, ಮಲೈಕಾ ಅವರು ಈ ಮೊದಲು ನಟ ಹಾಗೂ ಸಲ್ಮಾನ್​ ಖಾನ್​ ಸಹೋದರ ಅರ್ಬಾಜ್ ಖಾನ್ ಅವರನ್ನು ವಿವಾಹವಾದರು. 1998 ರಲ್ಲಿ ಇಬ್ಬರ ವಿವಾಹ ನಡೆದಿತ್ತು. ಆದರೆ, 2017 ರಲ್ಲಿ ಅರ್ಬಾಜ್ ಜೊತೆಗಿನ ಸಂಬಂಧ ಮುರಿದುಕೊಂಡ ಬಳಿಕ ಅರ್ಜುನ್​ಗೆ ಹತ್ತಿರವಾದರು.

ಇದೀಗ, ಮಲೈಕಾ ಅವರ ಹೊಸ ಪ್ರೇಮಕತೆ ಬಾಲಿವುಡ್ ಪಾಪರಾಜಿಗಳಿಂದಾಗಿ ಬಹಳ ಚರ್ಚೆಯಲ್ಲಿದೆ. ಸಾಮಾಜಿಕ ಜಾಲತಾಣದಲ್ಲೂ ಮಲೈಕಾರ ಹೊಸ ಲವ್​ ಸ್ಟೋರಿ ಸದ್ದು ಮಾಡುತ್ತಿದೆ. ವಜ್ರದ ವ್ಯಾಪಾರಿ ಹರ್ಷ್ ಮೆಹ್ತಾ ಅವರ ಜತೆ ಮಲೈಕಾ ಡೇಟಿಂಗ್​ ಮಾಡುತ್ತಿದ್ದಾರೆ ಎಂಬ ಚರ್ಚೆ ಶುರುವಾಗಿದೆ. ಇಟಲಿಯ ಪ್ರವಾಸಿ ತಾಣವೊಂದರಲ್ಲಿ ಹರ್ಷ್ ಮೆಹ್ತಾ ಜತೆಗೆ ಮಲೈಕಾ ಸಮಯ ಕಳೆಯುತ್ತಿರುವುದು ಕ್ಯಾಮೆರಾ ಕಣ್ಣಲ್ಲಿ ಸೆರೆಯಾಗಿದೆ.

ಫೋಟೋ ನೋಡಿದವರು ಮಲೈಕಾ ಜತೆಗಿರುವ ಹರ್ಷಾ ಮೆಹ್ತಾ ಅವರ ಹಿನ್ನೆಲೆಯನ್ನು ತಿಳಿದುಕೊಳ್ಳಲು ಹುಡುಕಾಡುತ್ತಿದ್ದಾರೆ. ಅಂದಹಾಗೆ, ಪ್ರೇಮಿಗಳ ದಿನವನ್ನು ಆಚರಿಸಲು ಇಬ್ಬರೂ ಇಟಲಿ ಪ್ರವಾಸ ಮಾಡಿದ್ದಾರೆ ಎಂಬ ವದಂತಿ ಇದೆ. ಇಟಲಿಯ ಟ್ರೆವಿ ಕಾರಂಜಿ ಬ್ಯಾಕ್​ಗ್ರೌಂಡ್​ನಲ್ಲಿ ತೆಗೆದ ಫೋಟೋ, ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಈ ಬಗ್ಗೆ ಮಲೈಕಾ ಅಥವಾ ಹರ್ಷ್ ಮೆಹ್ತಾ ಅವರಿಂದ ಯಾವುದೇ ಪ್ರತಿಕ್ರಿಯೆ ಬಾರದಿರುವುದು ಊಹಾಪೋಹಗಳಿಗೆ ರೆಕ್ಕೆ ಕಟ್ಟಿದಂತಾಗಿದೆ. 

ಕಪ್ಪು ಬಣ್ಣದ ಉದ್ದನೆಯ ಟ್ರೆಂಚ್ ಕೋಟ್ ಧರಿಸಿರುವ ಮಲೈಕಾ ಅರೋರಾ, ಕೂದಲನ್ನು ಬನ್​ನಲ್ಲಿ ಕಟ್ಟಿಕೊಂಡಿದ್ದಾರೆ. ಕೈಯಲ್ಲಿ ಚರ್ಮದ ಕೈಚೀಲ ಕೂಡ ಇದೆ. ಮತ್ತೊಂದೆಡೆ, ಹರ್ಷ್ ಮೆಹ್ತಾ ಉದ್ದನೆಯ ಬೂದು ಬಣ್ಣದ ಕೋಟ್ ಧರಿಸಿದ್ದಾರೆ. ಹರ್ಷ್ ತೆಗೆದ ಸೆಲ್ಫಿಯಲ್ಲಿ ಮಲೈಕಾ ಅರೋರಾ ಅವರ ಪಕ್ಕದಲ್ಲಿ ನಿಂತಿರುವುದನ್ನು ಕಾಣಬಹುದು. ಈ ಫೋಟೋ ನೋಡಿದ ಅಭಿಮಾನಿಗಳು, ಮಲೈಕಾ ಮತ್ತೆ ಪ್ರೀತಿಯಲ್ಲಿ ಬಿದ್ದಿರುವುದು ನಿಜವೆಂದು ಮಾತನಾಡಿಕೊಳ್ಳುತ್ತಿದ್ದಾರೆ. ಹರ್ಷ್ ಮೆಹ್ತಾಗೆ 33 ವರ್ಷ. ಮಲೈಕಾಗೆ 52 ವರ್ಷ. ಈ ಹಿಂದೆಯೂ ಇಬ್ಬರಿಬ್ಬರು ಒಟ್ಟಿಗೆ ಕಾಣಿಸಿಕೊಂಡಿದ್ದಾರೆ.