ರಾಜ್ಯ ರಾಜಕೀಯ ವಿದ್ಯಮಾನ, ಪಕ್ಷದ ರಾಜ್ಯ ಸಂಘಟನೆ ಕಾರ್ಯವೈಖರಿ ಮೇಲೆ ನಿಗಾ ಜತೆಗೆ ವರಿಷ್ಠರ ಸಂದೇಶ ರಾಜ್ಯ ನಾಯಕತ್ವಕ್ಕೆ ತಲುಪಿಸುವುದು ಮುಕುಂದ ಅವರ ಜವಾಬ್ದಾರಿ ಎಂದು ಹೇಳಲಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಮುಕುಂದ ಮತ್ತು ವಿಜಯೇಂದ್ರ ನೇರ ಮಾತುಕತೆ ಪಕ್ಷದೊಳಗೆ ಕುತೂಹಲ ಹುಟ್ಟುಹಾಕಿದೆ. ಬೆಳಗಾವಿಯಲ್ಲಿ ಪ್ರತ್ಯೇಕ ಸಭೆ, ಕೆಲವು ನಾಯಕರು ಮತ್ತೊಮ್ಮೆ ಅಸಮಾಧಾನ ಹೊರ ಹಾಕಿರುವುದಕ್ಕೂ ‘ಕೇಶವ ಕೃಪಾ’ದ ಮಾತುಕತೆಗೂ ತಳುಕು ಹಾಕಲಾಗುತ್ತಿದೆ. ರಮೇಶ್ ಜಾರಕಿಹೊಳಿ, ಬಸನಗೌಡ ಪಾಟೀಲ ಯತ್ನಾಳ್ ನೇತೃತ್ವದ ಸಭೆಯಲ್ಲಿ ಅರವಿಂದ ಲಿಂಬಾವಳಿ, ಪ್ರತಾಪಸಿಂಹ, ಅಣ್ಣಾಸಾಹೇಬ್ ಜೊಲ್ಲೆ, ಸಿದ್ಧೇಶ್ವರ್ ಸಹಿತ ಹಲವು ಮುಖಂಡರು ಭಾಗವಹಿಸಿದ್ದರು. ವಾಲ್ಮೀಕಿ ನಿಗಮ ಕೂಡಲಸಂಗಮದಿಂದ ಬಳ್ಳಾರಿವರೆಗೆ ಪಾದಯಾತ್ರೆ ಕೈಗೊಳ್ಳಲು ನಿರ್ಧರಿಸಲಾಗಿದೆ. ಸೆ.17ರಂದು ಶುರುವಾಗಲಿದೆ ಎಂಬುದನ್ನು ಮಾಜಿ ಸಂಸದ ಪ್ರತಾಪ್ಸಿಂಹ ಖಚಿತಪಡಿಸಿದ್ದಾರೆ. ಯತ್ನಾಳ್ ನೇತೃತ್ವದ ಈ ಪಾದಯಾತ್ರೆಗೆ ವರಿಷ್ಠರ ಅನುಮತಿ ಸಿಗುತ್ತದೆ, ಪಕ್ಷದ ರಾಜ್ಯಾಧ್ಯಕ್ಷ ಸೇರಿ ಎಲ್ಲರೂ ಭಾಗವಹಿಸಲಿದ್ದಾರೆ ಎಂದೂ ಹೇಳಿಕೊಂಡಿದ್ದಾರೆ.
