ದೇಣಿಗೆ ಸಂಗ್ರಹದಲ್ಲಿ ಬಿಜೆಪಿ ನಂಬರ್ 1; 7 ವರ್ಷದಲ್ಲಿ 2,818 ಕೋಟಿ ರೂ. ಸ್ವೀಕಾರ

ನವದೆಹಲಿ: ಕಳೆದ 7 ವರ್ಷಗಳಿಂದ ಕಾರ್ಪೆರೇಟ್ ಸಂಸ್ಥೆಗಳು ಸೇರಿ ಇತರ ಮೂಲಗಳಿಂದ ದೇಣಿಗೆ ಸಂಗ್ರಹಿಸುವಲ್ಲಿ ಬಿಜೆಪಿ ಅಗ್ರ ಸ್ಥಾನದಲ್ಲಿದೆ. 2012-13 ರಿಂದ 2018-19ರ ನಡುವೆ ಎಲ್ಲ ರಾಷ್ಟ್ರೀಯ ಪಕ್ಷಗಳು ಸಂಗ್ರಹಿಸಿದ ಒಟ್ಟು ದೇಣಿಗೆ  2,818.05 ಕೋಟಿ ರೂ. ಆಗಿದೆ. ಇದರಲ್ಲಿ ಶೇಕಡ 82.3 ಅಂದರೆ 2,319.48 ಕೋಟಿ ರೂ.ನ್ನು ಬಿಜೆಪಿ ಪಡೆದುಕೊಂಡಿದೆ ಎಂದು ಅಸೋಸಿಯೇಷನ್ ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್​​ (ಎಡಿಆರ್) ವರದಿಯಲ್ಲಿ ತಿಳಿಸಿದೆ. ರಾಜಕೀಯ ಪಕ್ಷಗಳು ಪ್ರತಿವರ್ಷ ಪಡೆದ ದೇಣಿಗೆ ವಿವರಗಳನ್ನು ಚುನಾವಣಾ ಆಯೋಗಕ್ಕೆ ಸಲ್ಲಿಸುತ್ತವೆ.

ಬಿಜೆಪಿಗೆ ಹೋಲಿಸಿದರೆ ಕಾಂಗ್ರೆಸ್​ನ ದೇಣಿಗೆ ಸಂಗ್ರಹ ಕಡಿಮೆ ಇದೆ. ಕಳೆದ 7 ವರ್ಷಗಳಲ್ಲಿ 376.02 ಕೋಟಿ ರೂ.ದೇಣಿಗೆ ಪಡೆದಿದೆ. ಎನ್​ಸಿಪಿ  69.81 ಕೋಟಿ ರೂ., ತೃಣಮೂಲ ಕಾಂಗ್ರೆಸ್  45.01 ಕೋಟಿ ರೂ., ಸಿಪಿಐ-ಎಂ  7.5 ಕೋಟಿ  ರೂ. ಮತ್ತು ಸಿಪಿಐ  22 ಲಕ್ಷ ರೂ. ದೇಣಿಗೆ ಪಡೆದಿವೆ. ಕಾಂಗ್ರೆಸ್ ನೇತೃತ್ವದ ಯುಪಿಎ ಸರ್ಕಾರ ಅಧಿಕಾರದಲ್ಲಿದ್ದಾಗ 2012-13ರಲ್ಲಿ ಬಿಜೆಪಿಗೆ  72.99 ಕೋಟಿ ರೂ. ದೇಣಿಗೆ ಹರಿದುಬಂದಿತ್ತು. ಅದು ಮುಂದಿನ ಹಣಕಾಸು ವರ್ಷಕ್ಕೆ 156.98 ಕೋಟಿ ರೂ.ಗೆ ಏರಿಕೆಯಾಗಿತ್ತು. ಮತ್ತೊಂದೆಡೆ ಕಾಂಗ್ರೆಸ್ ಆ ವರ್ಷ ಕೇವಲ 7.54 ಕೋಟಿ ರೂ.ದೇಣಿಗೆ ಸಂಗ್ರಹಿಸಿತ್ತು.

ಕಾರ್ಪೋರೇಟ್ ದೇಣಿಗೆ ಏರಿಕೆ

ರಾಷ್ಟ್ರೀಯ ಪಕ್ಷಗಳು ಕಾರ್ಪೆರೇಟ್ ಸಂಸ್ಥೆಗಳಿಂದ ದೇಣಿಗೆ ಪಡೆಯುವ ಪ್ರಮಾಣ ಶೇಕಡ 131ರಷ್ಟು ಹೆಚ್ಚಾಗಿದೆ ಎಂದು ಎಡಿಆರ್ ತಿಳಿಸಿದೆ. 2018-19ರ ಹಣಕಾಸು ವರ್ಷದಲ್ಲಿ 1,573 ಕಾಪೋರೇಟ್ ಕಂಪನಿಗಳಿಂದ ಬಿಜೆಪಿಗೆ  698.08 ಕೋಟಿ ರೂ. ದೇಣಿಗೆ ಹರಿದುಬಂದಿದೆ. ಕಾಂಗ್ರೆಸ್  122.5 ಕೋಟಿ ರೂ. ದೇಣಿಗೆ ಪಡೆದಿದೆ. 2018-19ರಲ್ಲಿ ಬಿಜೆಪಿ, ಕಾಂಗ್ರೆಸ್ ಮತ್ತು ಟಿಎಂಸಿಗೆ ಟಾಟಾ ಸಮೂಹದ ಪ್ರೊಗ್ರೆಸ್ಸಿವ್ ಎಲೆಕ್ಟ್ರಾಲ್ ಟ್ರಸ್ಟ್ ಪ್ರಮುಖ ದೇಣಿಗೆದಾರ ಸಂಸ್ಥೆಯಾಗಿದ್ದು, ಒಂದೇ ವರ್ಷದಲ್ಲಿ ಮೂರು ಪಕ್ಷಗಳಿಗೆ ಮೂರು ಬಾರಿಗಳಲ್ಲಿ ಒಟ್ಟು  455.15 ಕೋಟಿ ರೂ. ದೇಣಿಗೆ ನೀಡಿದೆ.

https://www.vijayavani.net/s-punjab-shootpur-yodha-death/