ಐಪಿಎಲ್​ ಆಟಗಾರರ ರಿಟೇನ್​ ನಿಯಮಾವಳಿ ಬಿಡುಗಡೆಗೊಳಿಸಿದ ಬಿಸಿಸಿಐ; ಇಲ್ಲಿದೆ ವಿವರ...

ಬೆಂಗಳೂರು: ಐಪಿಎಲ್​ 18ನೇ ಆವೃತ್ತಿಯ ಹರಾಜು ಪ್ರಕ್ರಿಯೆಗೆ ಮುನ್ನ ಪ್ರತಿ ತಂಡ ಗರಿಷ್ಠ ಐವರು ಆಟಗಾರರನ್ನು ರಿಟೇನ್​ ಮಾಡಿಕೊಳ್ಳುವ ಅವಕಾಶ ನೀಡಲು ಬೆಂಗಳೂರಿನಲ್ಲಿ ಶನಿವಾರ ನಡೆದ ಐಪಿಎಲ್​ ಆಡಳಿತ ಮಂಡಳಿ ಸಭೆಯಲ್ಲಿ ನಿರ್ಧಾರ ಕೈಗೊಳ್ಳಲಾಗಿದೆ. ಕಳೆದ ಜುಲೈನಲ್ಲಿ ನಡೆದ ಸಭೆಯಲ್ಲಿ ಐಪಿಎಲ್​ ತಂಡಗಳ ಮಾಲೀಕರು ನೀಡಿದ ಸಲಹೆಗಳ ಆಧಾರದಲ್ಲಿ 5 ಆಟಗಾರರ ರಿಟೇನ್​ ಜತೆಗೆ ಹರಾಜಿನಲ್ಲಿ ಒಂದು ರೈಟ್​ ಟು ಮ್ಯಾಚ್​ (ಆರ್​ಟಿಎಂ) ಕಾರ್ಡ್​ ಬಳಕೆಗೂ ಅವಕಾಶ ನೀಡಲಾಗುತ್ತದೆ. ಐವರು ಆಟಗಾರರ ರಿಟೇನ್​ ವೇಳೆ ಇಂತಿಷ್ಟೇ ಭಾರತೀಯ ಅಥವಾ ವಿದೇಶಿ ಆಟಗಾರರು ಇರಬೇಕೆಂಬ ನಿರ್ಬಂಧವನ್ನೂ ಹೇರಲಾಗಿಲ್ಲ.

ಪ್ರತಿ ತಂಡಗಳ ಬಜೆಟ್​ ಮಿತಿ 120 ಕೋಟಿ ರೂ.ಗೆ ಏರಿಸಲಾಗಿದೆ. ಆದರೆ ಗರಿಷ್ಠ 5 ಆಟಗಾರರನ್ನು ರಿಟೇನ್​ ಮಾಡಿದರೆ ಒಟ್ಟು 75 ಕೋಟಿ ರೂ. ವ್ಯಯಿಸಬೇಕಾಗುತ್ತದೆ. ಯಾಕೆಂದರೆ 5 ಆಟಗಾರರ ರಿಟೇನ್​ಗೆ ಕ್ರಮವಾಗಿ 18, 14, 11, 18, 14 ಕೋಟಿ ರೂ. ನೀಡಬೇಕಾಗುತ್ತದೆ. ಇನ್ನು 3 ಆಟಗಾರರನ್ನಷ್ಟೇ ರಿಟೇನ್​ ಮಾಡಿದರೆ, ಹರಾಜಿನಲ್ಲಿ 3 ಆರ್​ಟಿಎಂ ಬಳಸಬಹುದಾಗಿದೆ. 4 ಆಟಗಾರರ ರಿಟೇನ್​ ಮಾಡಿದರೆ 2 ಆರ್​ಟಿಎಂ ಬಳಸಬಹುದು. ಆರ್​ಟಿಎಂ ಪ್ರಕಾರ ಹರಾಜಿನಲ್ಲಿ ಆಟಗಾರನೊಬ್ಬನಿಗೆ ತಂಡವೊಂದು ಗರಿಷ್ಠ ಮೊತ್ತದ ಬಿಡ್​ ಸಲ್ಲಿಸಿದಾಗ ಆತನ ಮೂಲ ತಂಡ ಆರ್​ಟಿಎಂ ಮೂಲಕ ಅದೇ ಮೊತ್ತಕ್ಕೆ ತನ್ನಲ್ಲಿಯೇ ಉಳಿಸಿಕೊಳ್ಳಬಹುದಾಗಿದೆ.

5+1 ಆಟಗಾರರ ರಿಟೇನ್​ಗೆ ಬಿಸಿಸಿಐ ಅವಕಾಶ ಕಲ್ಪಿಸಿರುವುದರಿಂದ, ಇದು ಐಪಿಎಲ್​ ಇತಿಹಾಸದಲ್ಲೇ ಗರಿಷ್ಠ ಆಟಗಾರರ ರಿಟೇನ್​ ಅವಕಾಶವಾಗಿದೆ. 2018ರ ಮೆಗಾ ಹರಾಜಿಗೆ ಮುನ್ನ 5 ಆಟಗಾರರ ರಿಟೇನ್​ಗೆ ಅವಕಾಶ ನೀಡಿದ್ದು ಇದುವರೆಗಿನ ಗರಿಷ್ಠವಾಗಿತ್ತು. ಆಟಗಾರರ ಹರಾಜು ಪ್ರಕ್ರಿಯೆ ನವೆಂಬರ್​ 2ನೇ ವಾರ ನಡೆಯುವ ನಿರೀಕ್ಷೆ ಇದೆ.

ಬಾಂಬ್​ ಬೆದರಿಕೆಯಿಂದ ಐಪಿಎಲ್​ ಸಭೆ ವಿಳಂಬ!

ಐಪಿಎಲ್​ ಆಡಳಿತ ಮಂಡಳಿಯ ಸಭೆ ಬೆಂಗಳೂರಿನ ಫೋರ್​ ಸೀಸನ್ಸ್​ ಹೋಟೆಲ್​ನಲ್ಲಿ ಶನಿವಾರ ಬೆಳಗ್ಗೆ 11.30ರಿಂದ ನಿಗದಿಯಾಗಿತ್ತು. ಆದರೆ ಬೆಂಗಳೂರಿನ ತಾಜ್​ ವೆಸ್ಟೆಂಡ್​ ಹೋಟೆಲ್​ಗೆ ಬಾಂಬ್​ ಬೆದರಿಕೆ ಬಂದ ಹಿನ್ನೆಲೆಯಲ್ಲಿ ಸಭೆಯನ್ನು ಸಂಜೆ 6.30ಕ್ಕೆ ಮುಂದೂಡಲಾಯಿತು. ಎರಡು ಹೋಟೆಲ್​ಗಳು ಸುಮಾರು 5 ಕಿಲೋಮೀಟರ್​ ಅಂತರದಲ್ಲಿವೆ. ಇದೊಂದು ಹುಸಿ ಬಾಂಬ್​ ಕರೆ ಆಗಿದ್ದರೂ, ಮುನ್ನೆಚ್ಚರಿಕೆಯ ಕ್ರಮವಾಗಿ ಐಪಿಎಲ್​ ಆಡಳಿತ ಮಂಡಳಿ ಸಭೆಯನ್ನು ಮುಂದೂಡಲಾಗಿತ್ತು.

https://www.vijayavani.net/use-of-langur-to-avoid-monkey-attack-in-kanpur-cricket-stadium