ಕೋಲ್ಕತದಲ್ಲಿ ಬಾಂಗ್ಲಾದೇಶದ ಮಾಡೆಲ್ ಶಾಂತಾ ಪಾಲ್ ಅರೆಸ್ಟ್​! ಕಾರಣ ಹೀಗಿದೆ... Bangladeshi actress

Bangladeshi actress : ದೇಶದಲ್ಲಿ ಅಕ್ರಮವಾಗಿ ನೆಲೆಸಿದ್ದ ಬಾಂಗ್ಲಾದೇಶದ ಮಾಡೆಲ್ ಶಾಂತಾ ಪಾಲ್ (28) ಎಂಬಾಕೆಯನ್ನು ಪಶ್ಚಿಮ ಬಂಗಾಳ ಪೊಲೀಸರು ಇತ್ತೀಚೆಗೆ ಬಂಧಿಸಿದ್ದಾರೆ.

ಬಾಂಗ್ಲಾದೇಶ ಮೂಲದ ಮಾಡೆಲ್ ಶಾಂತಾ ಪಾಲ್, ಕೋಲ್ಕತದ ಜಾದವ್‌ಪುರ ಪ್ರದೇಶದಲ್ಲಿ ಅಕ್ರಮವಾಗಿ ವಾಸಿಸುತ್ತಿದ್ದಾಳೆ ಎಂದು ಸ್ಥಳೀಯ ಪೊಲೀಸರಿಗೆ ದೂರು ದಾಖಲಾಗಿತ್ತು. ಇದನ್ನು ಗಂಭೀರವಾಗಿ ಪರಿಗಣಿಸಿದ ಪೊಲೀಸರು ಶಾಂತಾ ಪಾಲ್​ ಉಳಿದುಕೊಂಡಿದ್ದ ಅಪಾರ್ಟ್‌ಮೆಂಟ್‌ಗೆ ಹೋಗಿ ತಪಾಸಣೆ ನಡೆಸಿದರು. ಈ ವೇಳೆ ಆಕೆಯ ಬಳಿ ವಿಭಿನ್ನ ವಿಳಾಸಗಳಿರುವ ಎರಡು ನಕಲಿ ಆಧಾರ್ ಕಾರ್ಡ್‌ಗಳು, ಮತದಾರರ ಕಾರ್ಡ್ ಮತ್ತು ಪಡಿತರ ಚೀಟಿ ಇರುವುದು ಕಂಡುಬಂದಿದೆ.

ಅದೇ ರೀತಿ, ಆಕೆಯ ಹೆಸರಿನಲ್ಲಿ ಹಲವು ಬಾಂಗ್ಲಾದೇಶಿ ಪಾಸ್‌ಪೋರ್ಟ್‌ಗಳು ಇರುವುದು ಕಂಡುಬಂದಿದೆ. ಅವೆಲ್ಲವನ್ನೂ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಇದಲ್ಲದೆ, ಶಾಂತಾ ಪಾಲ್​, ಬಾಂಗ್ಲಾದೇಶದ ರೀಜೆಂಟ್ ಏರ್‌ವೇಸ್‌ನ ಉದ್ಯೋಗಿ ಎಂದು ಬರೆದಿರುವ ಹಾಗೂ ಆಕೆಯ ಹೆಸರಿನಲ್ಲಿರುವ ಗುರುತಿನ ಚೀಟಿ ಮತ್ತು ಢಾಕಾದಲ್ಲಿ ಮಾಧ್ಯಮಿಕ ಶಿಕ್ಷಣ ಪಡೆಯುತ್ತಿರುವುದಾಗಿ ಆಕೆ ನೀಡಿದ ಪ್ರವೇಶ ಪತ್ರವನ್ನು ವಶಪಡಿಸಿಕೊಳ್ಳಲಾಗಿದೆ.

ಈ ವಿಚಾರವಾಗಿ ಕೋಲ್ಕತದ ಜಂಟಿ ಆಯುಕ್ತ (ಅಪರಾಧ) ರೂಪೇಶ್ ಕುಮಾರ್ ಮಾತನಾಡಿದ್ದು, 2024ರ ಅಂತ್ಯದ ವೇಳೆ ಶಾಂತಾ ಪಾಲ್​ ಭಾರತಕ್ಕೆ ಬಂದಿದ್ದಾರೆ ಎಂದು ಹೇಳಿದರು. ಆಕೆ ಒಬ್ಬ ವ್ಯಕ್ತಿಯೊಂದಿಗೆ ಭಾರತಕ್ಕೆ ಬಂದಿದ್ದಾರೆ. ಆದರೆ, ಭಾರತದಲ್ಲಿ ಉಳಿಯಲು ಮಾನ್ಯ ವೀಸಾವನ್ನು ಆಕೆ ತೋರಿಸಲಿಲ್ಲ. ಕೋಲ್ಕತ ಮತ್ತು ಬುಧ್ವಾನ್‌ನ ವಿಳಾಸಗಳೊಂದಿಗೆ ಆಧಾರ್ ಕಾರ್ಡ್‌ಗಳು, ಪಡಿತರ ಚೀಟಿಗಳು ಮತ್ತು ಮತದಾರರ ಗುರುತಿನ ಚೀಟಿಗಳನ್ನು ಆಕೆ ಹೇಗೆ ಪಡೆದಳು ಎಂಬುದನ್ನು ಪ್ರಶ್ನಿಸಲಾಗುತ್ತಿದೆ ಎಂದು ಹೇಳಿದರು.

ಇದನ್ನೂ ಓದಿ: ಇಂಗ್ಲೆಂಡ್​ ಆಟಗಾರರಿಗೆ ಅಂಪೈರ್ ಹೇಳಿದ್ದೇನು? ಆ ಸನ್ನೆಯ ಅರ್ಥವೇನು? ಟೀಮ್​ ಇಂಡಿಯಾ ಅಭಿಮಾನಿಗಳ ಆಕ್ರೋಶ! IND vs ENG

ಆದಾಗ್ಯೂ, ಆಕೆ ತನಿಖೆಗೆ ಸಹಕರಿಸುತ್ತಿಲ್ಲ. ಈ ಸಂದರ್ಭದಲ್ಲಿ, ಆಧಾರ್ ಕಾರ್ಡ್‌ಗಳನ್ನು ಹೇಗೆ ನೀಡಲಾಯಿತು ಎಂಬುದರ ಕುರಿತು ಯುಎಡಿಎಐಗೆ ಮತ್ತು ಮತದಾರರು ಮತ್ತು ಪಡಿತರ ಚೀಟಿಗಳ ಕುರಿತು ಚುನಾವಣಾ ಆಯೋಗ ಮತ್ತು ಬಂಗಾಳ ಆಹಾರ ಸಚಿವಾಲಯಕ್ಕೆ ಪತ್ರಗಳನ್ನು ಬರೆಯಲಾಗಿದೆ ಎಂದು ರೂಪೇಶ್​ ಕುಮಾರ್​ ಅವರು ಹೇಳಿದರು.

ಮತ್ತೊಂದೆಡೆ, ವಿಶ್ವಾಸಾರ್ಹ ಮಾಹಿತಿಯ ಪ್ರಕಾರ, ಶಾಂತಾ ಪಾಲ್ ಬಾಂಗ್ಲಾದೇಶದಲ್ಲಿ ಹಲವಾರು ಚಿತ್ರಗಳಲ್ಲಿ ನಟಿಸಿದ್ದಾರೆ. ಅದೇ ರೀತಿ, ಅವರು ವಿವಿಧ ಟಿವಿ ಚಾನೆಲ್‌ಗಳು ಮತ್ತು ಕಾರ್ಯಕ್ರಮಗಳಿಗೆ ನಿರೂಪಕಿಯಾಗಿ ಹಲವಾರು ಸೌಂದರ್ಯ ಸ್ಪರ್ಧೆಗಳಲ್ಲಿ ಭಾಗವಹಿಸಿದ್ದಾರೆ ಎಂದು ವರದಿಯಾಗಿದೆ. ಸದ್ಯ ಆಕೆಯನ್ನು ಬಂಧಿಸಲಾಗಿದ್ದು, ಆಗಸ್ಟ್ 8 ರವರೆಗೆ ಪೊಲೀಸ್ ಕಸ್ಟಡಿಗೆ ನೀಡಲಾಗಿದೆ. (ಏಜೆನ್ಸೀಸ್​)

https://www.vijayavani.net/donald-trump-unveils-new-reciprocal-tariff-plan-for-over-70-nations-india-faces-25

https://www.vijayavani.net/health-tips-want-to-look-young-and-beautiful-just-include-these-fruits-in-your-diet