ಚೆನ್ನೈ: ‘ಮಾರಿ’ ಖ್ಯಾತಿಯ ನಿರ್ದೇಶಕ ಬಾಲಾಜಿ ಮೋಹನ್, ನಟಿ ಧನ್ಯಾ ಬಾಲಕೃಷ್ಣ ಅವರನ್ನು ಸದ್ದಿಲ್ಲದೆ ಮದುವೆಯಾಗಿದ್ದಾರೆ ಎಂದು ನಟಿ ಕಲ್ಪಿಕಾ ಗಣೇಶ್ ಆರೋಪಿಸಿದ್ದರು. ಆದರೆ, ಧನ್ಯಾ ಆಗಲೀ, ಬಾಲಾಜಿ ಮೋಹನ್ ಆಗಲೀ ಈ ಕುರಿತು ಬಾಯಿಬಿಟ್ಟಿರಲಿಲ್ಲ. ಈಗ ಬಾಲಾಜಿ ಮೋಹನ್ ತಾವು ಧನ್ಯಾ ಅವರನ್ನು ಎರಡನೆಯ ಮದುವೆಯಾಗಿರುವುದಾಗಿ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಇದು ಕ್ರಿಕೆಟ್ ಆಟಗಾರ್ತಿಯ ಸಾಧನೆಯ ಕಥೆ … ಅತಿಥಿ ಪಾತ್ರಗಳಲ್ಲಿ ರಣಜಿ ಆಟಗಾರರು
ಬಾಲಾಜಿ ಮೋಹನ್, ತಮಿಳಿನಲ್ಲಿ ‘ಮಾರಿ’ ಮುಂತಾದ ಚಿತ್ರಗಳನ್ನು ನಿರ್ದೇಶಿಸಿದ್ದಾರೆ. ಈ ಹಿಂದೆ ಅವರಿಗೆ ಒಂದು ಮದುವೆಯಾಗಿತ್ತು. ಡೈವೋರ್ಸ್ ಸಹ ಆಗಿತ್ತು. ಆ ನಂತರ ಅವರು ಧನ್ಯಾ ಜತೆಗೆ ಮದುವೆಯಾಗಿದ್ದಾರೆ ಎಂದು ಇತ್ತೀಚೆಗೆ ಕಲ್ಪಿಕಾ ಹೇಳಿದ್ದರು. ಈ ಸಂಬಂಧ ಕಲ್ಪಿಕಾ ಮೇಲೆ ಮಾನನಷ್ಟು ಮೊಕದ್ದಮೆ ಹೂಡಿದ್ದಾರೆ ಬಾಲಾಜಿ. ಕಲ್ಪಿಕಾ ತಮ್ಮ ಬಗ್ಗೆ ಅಪಪ್ರಚಾರ ಮಾಡುವುದುನ್ನು ತಡೆಯಬೇಕು ಎಂದು ಕೋರಿದ್ದಾರೆ. ಹಾಗೆಯೇ, ಅರ್ಜಿಯಲ್ಲಿ ಧನ್ಯಾ ಅವರನ್ನು ಒಂದು ವರ್ಷದ ಹಿಂದೆ ಮದುವೆಯಾಗಿರುವುದಾಗಿಯೂ ತಿಳಿಸಿದ್ದಾರೆ. ಈ ಸಂಬಂಧ ಯಾವುದೇ ಅಪಪ್ರಚಾರ ಮಾಡಬಾರದು ಎಂದು ನ್ಯಾಯಾಲಯವು ಕಲ್ಪಿಕಾಗೆ ಸೂಚಿಸಿರುವುದರರ ಜತೆಗೆ, ಪ್ರಕರಣವನ್ನು ಜನವರಿ 20ಕ್ಕೆ ಮುಂದೂಡಿದೆ.
ಇದನ್ನೂ ಓದಿ: ಈ ತ್ರಿಕೋನ ಪ್ರೇಮಕಥೆಯಲ್ಲಿ ಹೀರೋ ಯಾರು? ವಿಲನ್ ಯಾರು?
ಧನ್ಯಾ ಮೂಲತಃ ಬೆಂಗಳೂರಿನವರು. ಕಾಲಿವುಡ್ನಲ್ಲಿ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರಾದರೂ, ಕನ್ನಡದ ‘ಸಾರ್ವಜನಿಕರಿಗೆ ಸುವರ್ಣಾವಕಾಶ’ ಮತ್ತು ‘ನೋಡಿ ಸ್ವಾಮಿ ಇವ್ನು ಇರೋದೇ ಹೀಗೇ’ ಎಂಬ ಎರಡು ಚಿತ್ರಗಳಲ್ಲಿ ನಟಿಸಿದ್ದಾರೆ. ಕೋಮಲ್ ಜತೆಗೆ ಅಭಿನಯಿಸಿರುವ ‘ಟ್ವೆಂಟಿ ಟ್ವೆಂಟಿ’ ಇನ್ನಷ್ಟೇ ಬಿಡುಗಡೆಯಾಗಬೇಕಿದೆ. ಹೀಗಿರುವಾಗಲೇ ಅವರು ಸದ್ದಿಲ್ಲದೆ ಬಾಲಾಜಿ ಅವರನ್ನು ಮದುವೆಯಾಗಿದ್ದಾರೆ.