ಸಂಖ್ಯಾಶಾಸ್ತ್ರೀಯವಾಗಿ ಮತ್ತು ಆಧ್ಯಾತ್ಮಿಕವಾಗಿ 2026ರ ನವೆಂಬರ್ ತಿಂಗಳು ಅಪರೂಪದ ಯೋಗವನ್ನು ಹೊಂದಿದೆ. 2026ನೇ ವರ್ಷದ ಅಂಕೆಗಳನ್ನು ಕೂಡಿಸಿದಾಗ (2+0+2+6 = 10, 1+0 = 1) ಸಂಖ್ಯೆ 1 ಬರುತ್ತದೆ, ಇದು ಸೂರ್ಯನಿಗೆ ಸಂಬಂಧಿಸಿದೆ. ಅದೇ ರೀತಿ ನವೆಂಬರ್ ವರ್ಷದ 11ನೇ ತಿಂಗಳಾಗಿದ್ದರೂ, ಇದರ 'ಯೂನಿವರ್ಸಲ್ ಮಂತ್ ನಂಬರ್' 3 ಆಗುತ್ತದೆ (11+1=12, 1+2=3). ಸಂಖ್ಯೆ 11 ಮತ್ತು 3ರ ಈ ಅಪರೂಪದ ಸಂಯೋಜನೆಯು ಜ್ಞಾನ, ದೂರದೃಷ್ಟಿ ಹಾಗೂ ಹೊಸ ಅವಕಾಶಗಳ ಬಾಗಿಲನ್ನು ತೆರೆಯುತ್ತದೆ.
ಸಂಖ್ಯಾಶಾಸ್ತ್ರದ ಪ್ರಕಾರ, ಸಂಖ್ಯೆ 11 ಮತ್ತು 3 ಸಂಪೂರ್ಣವಾಗಿ ಭಿನ್ನವಾದ ಆದರೆ ಪರಸ್ಪರ ಪೂರಕವಾದ ಶಕ್ತಿಯನ್ನು ಹೊಂದಿವೆ. ಸಂಖ್ಯೆ 11 ಆಂತರಿಕ ಜಾಗೃತಿ, ಇಷ್ಟಾರ್ಥ ಸಿದ್ಧಿ ಮತ್ತು ಆಧ್ಯಾತ್ಮಿಕ ಅರಿವನ್ನು ಪ್ರತಿನಿಧಿಸಿದರೆ, ಸಂಖ್ಯೆ 3 ಜ್ಞಾನ, ಮಾರ್ಗದರ್ಶನ, ಸಂವಹನ ಹಾಗೂ ಪ್ರಗತಿಯನ್ನು ಸೂಚಿಸುತ್ತದೆ. ಉದಾಹರಣೆಗೆ, ಹೊಸ ಉದ್ಯಮ ಅಥವಾ ಯೋಜನೆ ಆರಂಭಿಸಲು ಕಾಯುತ್ತಿರುವವರಿಗೆ ಸೂಕ್ತ ಮಾರ್ಗದರ್ಶಕರು ಅಥವಾ ಪಲುಕುದಾರರು ಸಿಗಲು ಈ ಅವಧಿ ಅತ್ಯಂತ ಅನುಕೂಲಕರವಾಗಿದೆ. ಈ ಸಮಯದಲ್ಲಿ 10 ಹೊಸ ಕೆಲಸಗಳನ್ನು ಒಟ್ಟಿಗೆ ಆರಂಭಿಸುವ ಬದಲು, ಜನವರಿಯಲ್ಲಿ ಆರಂಭಿಸಿ ಅರ್ಧಕ್ಕೆ ನಿಂತಿರುವ ಕೆಲಸಗಳನ್ನು ಪೂರ್ಣಗೊಳಿಸುವುದು ಸೂಕ್ತವಾಗಿದೆ.
ಮ್ಯಾನಿಫೆಸ್ಟೇಷನ್ ಅಥವಾ ಇಷ್ಟಾರ್ಥ ಸಿದ್ಧಿಯ ಮೂಲ ಕೀಲಿ ಎಂದರೆ ಸಂಪೂರ್ಣ ನಂಬಿಕೆ. ನಾವು ಏನನ್ನು ಬಯಸುತ್ತೇವೆಯೋ ಅದನ್ನು ನಮ್ಮತ್ತ ಆಕರ್ಷಿಸುವ ಪ್ರಕ್ರಿಯೆಯೇ ಈ 'ಲಾ ಆಫ್ ಅಟ್ರಾಕ್ಷನ್'. 11:11, 10:10, 8:8 ನಂತಹ ಸಮಯಗಳು ಹಾಗೂ ಅಮಾವಾಸ್ಯೆ, ಹುಣ್ಣಿಮೆಯ ದಿನಗಳನ್ನು ಬ್ರಹ್ಮಾಂಡದ 'ಪೋರ್ಟಲ್' ಎಂದು ಪರಿಗಣಿಸಲಾಗುತ್ತದೆ. ಈ ಸಮಯದಲ್ಲಿ ಬ್ರಹ್ಮಾಂಡದ ಶಕ್ತಿ ಹೆಚ್ಚಿರುವುದರಿಂದ, ನಮಗೆ ಬೇಕಾದ ಸಕಾರಾತ್ಮಕ ಗುರಿಗಳನ್ನು ಕಲ್ಪಿಸಿಕೊಂಡಾಗ ಅವು ವೇಗವಾಗಿ ನನಸಾಗುತ್ತವೆ. ಇದರ ಜತೆಗೆ ನಮಗೆ ಸಿಕ್ಕಿರುವ ಉತ್ತಮ ಜೀವನ, ಕುಟುಂಬ ಹಾಗೂ ಆರೋಗ್ಯಕ್ಕಾಗಿ ಬ್ರಹ್ಮಾಂಡಕ್ಕೆ ಕೃತಜ್ಞತೆ ಸಲ್ಲಿಸುವುದು ಕೂಡ ಅಷ್ಟೇ ಮುಖ್ಯವಾಗಿದೆ.
