ರಾಂಚಿ ಟೆಸ್ಟ್​ನಲ್ಲಿ ಅನಿಲ್ ಕುಂಬ್ಳೆ ದಾಖಲೆ ಮುರಿದ ಆರ್​. ಅಶ್ವಿನ್​! ಏನಿದರ ವಿಶೇಷತೆ?

ರಾಂಚಿ: ಆರ್​. ಅಶ್ವಿನ್ ಇಂಗ್ಲೆಂಡ್​ ವಿರುದ್ಧದ 4ನೇ ಟೆಸ್ಟ್​ನ 2ನೇ ಇನಿಂಗ್ಸ್​ನಲ್ಲಿ 5 ವಿಕೆಟ್​ ಕಬಳಿಸುವ ಮೂಲಕ​ ಭಾರತದಲ್ಲಿ ನಡೆದ ಟೆಸ್ಟ್​ ಪಂದ್ಯಗಳಲ್ಲಿ ಗರಿಷ್ಠ ವಿಕೆಟ್​ ಕಬಳಿಸಿದ ಬೌಲರ್​ ಎನಿಸಿದರು. ಅವರು ಕನ್ನಡಿಗ ಅನಿಲ್​ ಕುಂಬ್ಳೆ ಸಾಧನೆಯನ್ನು ಹಿಂದಿಕ್ಕಿದರು.

ಕುಂಬ್ಳೆ 63 ಟೆಸ್ಟ್​ಗಳಲ್ಲಿ 350 ವಿಕೆಟ್​ ಕಬಳಿಸಿದ್ದರೆ, ಅಶ್ವಿನ್​ (354) 59 ಟೆಸ್ಟ್​ಗಳಲ್ಲೇ ಇದನ್ನು ಮೀರಿಸಿದ್ದಾರೆ. ಹರ್ಭಜನ್​ ಸಿಂಗ್​ 265 ಮತ್ತು ಕಪಿಲ್​ ದೇವ್​ 219 ವಿಕೆಟ್​ ಕಬಳಿಸಿರುವುದು ನಂತರದ ಉತ್ತಮ ಸಾಧನೆಗಳಾಗಿವೆ. ಇದೇ ವೇಳೆ ಅಶ್ವಿನ್​ ಟೆಸ್ಟ್​ ಕ್ರಿಕೆಟ್​ನಲ್ಲಿ ಭಾರತ ಪರ ಗರಿಷ್ಠ 35 ಬಾರಿ 5 ವಿಕೆಟ್​ ಗೊಂಚಲು ಪಡೆದ ಅನಿಲ್​ ಕುಂಬ್ಳೆ ಸಾಧನೆಯನ್ನೂ ಸರಿಗಟ್ಟಿದರು. ಅಶ್ವಿನ್​ಗೆ ಭಾರತದಲ್ಲಿ ಇದು 27ನೇ 5 ವಿಕೆಟ್​ ಗೊಂಚಲು ಆಗಿದೆ.

ಆರ್​. ಅಶ್ವಿನ್​ (37 ವರ್ಷ 159 ದಿನ) ಭಾರತ ಪರ ಟೆಸ್ಟ್​ನಲ್ಲಿ 5 ವಿಕೆಟ್​ ಗೊಂಚಲು ಪಡೆದ 2ನೇ ಹಿರಿಯ ಬೌಲರ್​ ಎನಿಸಿದರು. ವಿನೂ ಮಂಕಡ್​ (37 ವರ್ಷ, 306 ದಿನ) ಅತಿ ಹಿರಿಯರೆನಿಸಿದ್ದಾರೆ.

ಅಶ್ವಿನ್​ ಭಾರತದಲ್ಲಿ 5 ವಿಕೆಟ್​ ಗೊಂಚಲು ಪಡೆದ ಭಾರತದ 12ನೇ ತಾಣ ರಾಂಚಿ. ಒಟ್ಟಾರೆಯಾಗಿ ಇದು ಅವರು 5 ವಿಕೆಟ್​ ಗೊಂಚಲು ಪಡೆದ 19ನೇ ಸ್ಟೇಡಿಯಂ ಆಗಿದೆ. ಮುರಳೀಧರನ್​ (25), ಶೇನ್​ ವಾರ್ನ್​ (20) ಮತ್ತು ವಾಸಿಂ ಅಕ್ರಮ್​ (20) ಮಾತ್ರ ಇದಕ್ಕಿಂತ ಹೆಚ್ಚು ತಾಣದಲ್ಲಿ 5 ವಿಕೆಟ್​ ಗೊಂಚಲು ಪಡೆದಿದ್ದಾರೆ.

https://www.vijayavani.net/jasprit-bumrah-cheers-on-wife-sanjana-ganesan-as-she-resumes-broadcasting-duties