ಕಂಗನಾ ಮೇಲೆ ಕಳ್ಳತನದ ಆರೋಪ ಹೊರಿಸಿದ ಲೇಖಕ

ಮುಂಬೈ: ಕಂಗನಾಗೂ ವಿವಾದಗಳಿಗೂ ಅದೇನೋ ನಂಟು. ಕಂಗನಾ ಹೆಸರು ಪ್ರತಿನಿತ್ಯ ಒಂದಲ್ಲ ಒಂದು ವಿವಾದದಲ್ಲಿ ಕೇಳಿ ಬರುತ್ತಲೇ ಇರುತ್ತದೆ. ಈಗ ಆ ಸಾಲಿಗೆ ಇನ್ನೊಂದು ಹೊಸ ಸೇರ್ಪಡೆಯಾಗಿದೆ. ಆಶೀಶ್​ ಕೌಲ್​ ಎಂಬ ಲೇಖಕ ಇದೀಗ ಕಂಗನಾ ಮೇಲೆ ಕಳ್ಳತನದ ಆರೋಪ ಹೊರಿಸಿದ್ದಾರೆ.

ಇದನ್ನೂ ಓದಿ: ತಲ್ವಾರ್​ನಿಂದ ಕೇಕ್​ ಕತ್ತರಿಸಿ ಛೀಮಾರಿ ಹಾಕಿಸಿಕೊಂಡ ಸ್ಟಾರ್​ ನಟ- ತಪ್ಪಿನ ಅರಿವಾಗಿ ಕ್ಷಮೆ

ಕಂಗನಾ ಇತ್ತೀಚೆಗಷ್ಟೇ ಹೊಸ ಚಿತ್ರವೊಂದರಲ್ಲಿ ನಟಿಸುವುದಾಗಿ ಘೋಷಿಸಿದ್ದರು. 'ಮಣಿಕರ್ಣಿಕಾ: ದಿ ಲೆಜೆಂಡ್​ ಆಫ್​ ದಿಡ್ಡಾ' ಎಂಬ ಹೆಸರಿನ ಈ ಚಿತ್ರದಲ್ಲಿ ಕಾಶ್ಮೀರದಾ ರಾಣಿಯಾಗಿ ನಟಿಸುತ್ತಿರುವುದಾಗಿ ಅವರು ಹೇಳಿದ್ದಾರೆ. ಕಾಶ್ಮೀರದ ಕ್ಲಿಯೋಪಾತ್ರ ಎಂಬ ಖ್ಯಾತಿ ಪಡೆದಿದ್ದ ಈ ರಾಣಿಯ ಜೀವನ ಮತ್ತು ಕಾಲಘಟ್ಟವನ್ನು ಆಧರಿಸಿ ಈ ಚಿತ್ರ ಮಾಡಲಾಗುತ್ತಿದೆ.

ಆದರೆ, ಕಂಗನಾ ತಮ್ಮ ಕಥೆಯನ್ನು ಕದ್ದಿದ್ದಾರೆ ಎಂದು ಲೇಖಕ ಆಶೀಶ್​ ಕೌಲ್​ ಆರೋಪಿಸಿದ್ದಾರೆ. ರಾಣಿ ದಿಡ್ಡಾ ಕುರಿತು ಅವರು ಪುಸ್ತಕ ಬರೆದಿದ್ದು, ಕಳೆದ ವರ್ಷ ಸೆಪ್ಟೆಂಬರ್​ 11ರಂದು ತಮ್ಮ 'ದಿಡ್ಡಾ - ಕಾಶ್ಮೀರ್​ ಕೀ ಯೋಧಾ ರಾಣಿ' ಎಂಬ ಪುಸ್ತಕಕ್ಕೆ ಮುನ್ನುಡಿ ಬರೆದುಕೊಡುವಂತೆ, ಕಂಗನಾಗೆ ಮೇಲ್​ ಮಾಡಿದ್ದರಂತೆ. ಅದರಲ್ಲಿ ರಾಣಿಯ ಕಥೆ ಬರೆದಿದ್ದರಂತೆ. ಆದರೆ, ಕಂಗನಾ ಅಥವಾ ಆಕೆಯ ಸಹೋದರಿಯಿಂದ ಯಾವುದೇ ಪ್ರತಿಕ್ರಿಯೆ ಬರಲಿಲ್ಲವಂತೆ. ಮುನ್ನುಡಿಯ ಬದಲು, ಕಂಗನಾ ಅವರೇ ಆ ಚಿತ್ರ ಮಾಡುತ್ತಿರುವ ಬಗ್ಗೆ ಕೌಲ್​ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

'ದಿಡ್ಡಾ ರಾಣಿಯ ಜೀವನಚರಿತ್ರೆಯ ಕುರಿತಾಗಿ ನನ್ನ ಹತ್ತಿರ ಹಕ್ಕುಗಳಿವೆ. ಆದರೆ, ಕಂಗನಾ ನನ್ನನ್ನು ಒಂದು ಮಾತು ಕೇಳದೆಯೇ, ಆ ಕಥೆಯನ್ನು ಕದ್ದಿದ್ದಾರೆ. ಆ ಪುಸ್ತಕ ಬರೆಯುವುದಕ್ಕೆ ನಾನು ಸಾಕಷ್ಟು ಕಷ್ಟಪಟ್ಟಿದ್ದೇನೆ. ಇತಿಹಾಸ ಕೆದಕಿದರೆ ಆ ರಾಣಿಯ ಸಾಹಸಗಳ ಬಗ್ಗೆ ಹೆಚ್ಚು ವಿಷಯ ಸಿಗುವುದಿಲ್ಲ. ಆದರೆ, ನಾನು ಆರು ವರ್ಷಗಳ ಕಾಲ ರೀಸರ್ಚ್​ ಮಾಡಿ, ಪುಸ್ತಕ ಬರೆದಿದ್ದೇನೆ. ಆದರೆ, ನನ್ನ ಕೇಳದೆಯೇ ಕಂಗನಾ ಕಥೆ ಕದ್ದು ಸಿನಿಮಾ ಮಾಡುತ್ತಿರುವುದು ಸರಿಯಲ್ಲ' ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: ಚಿತ್ರರಂಗದಲ್ಲಿ ಸಂಕ್ರಾಂತಿ; ಹಳೇ ಲಯದತ್ತ ಚಿತ್ರೋದ್ಯಮ..

ಈ ಕುರಿತು ಪ್ರತಿಕ್ರಿಯಿಸಿರುವ ಚಿತ್ರದ ನಿರ್ಮಾಪಕ ಕಮಲ್​ ಜೈನ್​, 'ನಾವು ಕೌಲ್​ ಅವರ ಪುಸ್ತಕದಿಂದ ಕಥೆ ಕದ್ದು ಚಿತ್ರ ಮಾಡುತ್ತಿಲ್ಲ. ಇದು ಸಾವಿರ ವರ್ಷಗಳ ಹಿಂದಿನ ಕಥೆ ಮತ್ತು ಎಲ್ಲರಿಗೂ ಗೊತ್ತಿರುವಂತಹ ಕಥೆಯೇ. ಸಾರ್ವಜನಿಕ ವಲಯದಲ್ಲಿ ಪ್ರಚಲಿತದಲ್ಲಿರುವ ಕಥೆಯನ್ನು ಸಿನಿಮಾ ಮಾಡುವುದಕ್ಕೆ ಯಾರ ಅನುಮತಿಯೂ ಬೇಕಾಗಿಲ್ಲ. ಇನ್ನು ಕೌಲ್​ ಅವರ ಪುಸ್ತಕದ ಬಗ್ಗೆ ನನಗೆ ಗೊತ್ತಿಲ್ಲ. ಓದುವುದಿರಲಿ, ಆ ಪುಸ್ತಕದ ಬಗ್ಗೆ ಎಲ್ಲಿಯೂ ನಾನು ಕೇಳಿಲ್ಲ. ಗೂಗಲ್​ನಲ್ಲಿ ಹುಡುಕಿದರೆ ರಾಣಿಯ ಕುರಿತಾಗಿ ಹಲವು ವಿಷಯಗಳು ಸಿಗುತ್ತವೆ. ಅದನ್ನು ಕೌಲ್​ ಅವರ ಪುಸ್ತಕದಿಂದಲೇ ಕದಿಯುವ ಅವಶ್ಯಕತೆ ಇಲ್ಲ' ಎಂದು ಅವರು ಹೇಳಿಕೊಂಡಿದ್ದಾರೆ.