ನಂಗೇನಾದ್ರೂ ಬೇರೆ ಕೆಲಸ ಇದ್ಯಾ? ನಾ ಮುಂದೇನ್​ ಮಾಡ್ಲಿ?

ಕರೊನಾದಿಂದ ಸುಧಾರಿಸಿಕೊಳ್ಳುತ್ತಿರುವ ಅಮಿತಾಭ್​ ಬಚ್ಚನ್​, ಸದ್ಯದಲ್ಲೇ ಚಿತ್ರೀಕರಣಕ್ಕೆ ಭಾಗವಹಿಸಬೇಕು ಮತ್ತೊಮ್ಮೆ ಅಭಿನಯದಲ್ಲಿ ಸಕ್ರಿಯರಾಗಬೇಕು ಎಂದು ಭಾವಿಸಿದ್ದರು. ಆದರೆ, ಇದೀಗ 65 ವರ್ಷ ಮೇಲ್ಪಟ್ಟವರು ಶೂಟಿಂಗ್​ನಲ್ಲಿ ಭಾಗವಹಿಸಬಾರದು ಎಂಬ ನಿಯಮವೊಂದನ್ನು ರೂಪಿಸುವುದಕ್ಕೆ ಹೊರಟಿರುವಾಗ, ತಾವು ಮುಂದೇನು ಮಾಡಬೇಕು ಎಂದು ಪ್ರಶ್ನಿಸಿದ್ದಾರೆ.

ಇದನ್ನೂ ಓದಿ: ಈ ವಿಚಾರದಲ್ಲಿ ಅಕ್ಷಯ್​ ಕುಮಾರ್ ಅವರನ್ನೇ ಫಾಲೋ ಮಾಡ್ತಿದ್ದಾರೆ ಆಮೀರ್​ ಖಾನ್​!

ಕರೊನಾ ಹಾವಳಿ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ, ಮಹಾರಾಷ್ಟ್ರ ಸರ್ಕಾರವು 65 ವರ್ಷ ಮೇಲ್ಪಟ್ಟವರು ಚಿತ್ರೀಕರಣದಲ್ಲಿ ಭಾಗವಹಿಸಬಾರದು ಎಂಬ ನಿಯಮವೊಂದನ್ನು ತರುವುದಕ್ಕೆ ಮುಂದಾಗಿದೆ. ಈ ವಿಷಯ, ಈಗಾಗಲೇ ಕೋರ್ಟ್​ ಮೆಟ್ಟಿಲೇರಿದ್ದು, ಇದೊಂಥರಾ ತಾರತಮ್ಮ ಎಂದು ನ್ಯಾಯಾಲಯ ಸಹ ಹೇಳಿದೆ.

ಇಂಥದ್ದೊಂದು ನಿಯಮಕ್ಕೆ ಅನುಮೋದನೆ ಸಿಗುತ್ತದೋ, ಇಲ್ಲವೋ ಗೊತ್ತಿಲ್ಲ. ಒಂದು ಪಕ್ಷ ಹಾಗೇನಾದರೂ ಆದರೆ, ತಮ್ಮಂತವರ ಗತಿ ಏನು, ತಾವು ಮುಂದೆ ಏನು ಮಾಡಬೇಕು ಎಂದು ಅಮಿತಾಭ್​ ಪ್ರಶ್ನಿಸಿದ್ದಾರೆ.

ಈ ಕುರಿತು ತಮ್ಮ ಬ್ಲಾಗ್​ನಲ್ಲಿ ಬರೆದುಕೊಂಡಿರುವ ಅವರು, 'ಹಲವು ವಿಷಯಗಳು ಮನಸ್ಸನ್ನು ಕಾಡುತ್ತಿವೆ. ಆ ಪೈಕಿ ಒಂದು, 65 ವರ್ಷಕ್ಕೆ ಮೇಲ್ಪಟ್ಟವರು ಇನ್ನು ಮುಂದಿನ ದಿನಗಳಲ್ಲಿ ಕೆಲಸ ಮಾಡುವಂತಿಲ್ಲ ಎಂಬ ತೀರ್ಮಾನ. ಬೇರೆ ಕೆಲಸಗಳಲ್ಲಾದರೆ ಓಕೆ. ನಮ್ಮ ವೃತ್ತಿಯಲ್ಲಿ ರಿಟೈರ್​ಮೆಂಟ್​ ಎಂಬುದು ಇರಲಿಲ್ಲ. ಈ ತರಹದ ನಿಯಮ ಬಂದರೆ, ಆಗ ನಿವೃತ್ತಿ ಅನಿವಾರ್ಯ ಆಗುತ್ತದೆ' ಎಂದು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ: ಚಿತ್ರರಂಗದಲ್ಲಿ ದರ್ಶನ್​ 23 ವರ್ಷ … ಶುಭ ಕೋರಿದ ಸೆಲೆಬ್ರಿಟಿಗಳು

ಈ ಕುರಿತು ಟ್ವೀಟ್​ ಮಾಡಿರುವ ಅವರು, ತಮಗೇನಾದರೂ ಕೆಲಸಗಳಿವೆಯಾ ಎಂದು ಅಭಿಮಾನಿಗಳನ್ನು ಕೇಳಿದ್ದಾರೆ. 'ನನಗೇನಾದರೂ ಪರ್ಯಾಯ ಕೆಲಸಗಳಿವೆಯಾ ಎಂದು ಗೊತ್ತಿದ್ದರೆ ಹೇಳಿ. ಒಂದು ಪಕ್ಷ ಒಂದು ನಿಯಮ ಬಂದರೆ, ಮುಂದೆ ಏನಾದರೂ ಮಾಡಲೇಬೇಕಲ್ಲ. ಗೊತ್ತಿದ್ದರೆ ಹೇಳಿ' ಎಂದು ಅಮಿತಾಭ್​ ಬಚ್ಚನ್​ ಹೇಳಿಕೊಂಡಿದ್ದಾರೆ.

https://www.vijayavani.net/rajinism-cdp-launched/