ತನ್ನ ಚಿತ್ತವನ್ನ ಸಮಾಧಿಯೋಗದಿಂದ ಮುಕ್ತವಾಗಿಸಿಕೊಂಡರೆ, ಪ್ರಾರಬ್ಧ ಭೋಗ ಮುಗಿದ ನಂತರ, ದೇಹದ ತ್ಯಾಗವಾದ ಮೇಲೆ, ಪರಮಾತ್ಮನ ಅನುಗ್ರಹದಿಂದ ಪ್ರಾಪ್ತಿಯಾಗಬಹುದಾದ ಮುಕ್ತಿಯು ಸಾಧಕನಿಗೆ ದೊರಕುವುದು. ‘ಶ್ರೀನಿವಾಸ ನೀನೇ ಪಾಲಿಸೋ’ ಎಂಬ ಪುರಂದರದಾಸರ ಕೀರ್ತನೆಯಲ್ಲಿ ‘ಧ್ಯಾನಮಾಳ್ಪ ಸಜ್ಜನರ ಮಾನದಿಂದ ಪರಿಪಾಲಿಸುವ’ ಎಂದು ಹೇಳಿದ್ದಾರೆ. ಇನ್ನೊಂದೆಡೆ ‘ನಿನ್ನ ಪಾದಾರವಿಂದದ ಸೇವೆಯನು ಮಾಡಿ ನಿನ್ನ ಧ್ಯಾನದಲ್ಲಿರುವ ಹಾಗೆ ಮಾಡು’ ಎಂದು ಪ್ರಾರ್ಥಿಸಿ ಸದಾ ಸಮಾಧಿಸ್ಥನಾಗುವ ಭಾಗ್ಯ ಕರುಣಿಸೆಂದು ಬೇಡಿದ್ದಾರೆ. ಆ ಸಮಾಧಿ ಸ್ಥಿತಿಯಲ್ಲಿ ಅನುಭವಿಸಬೇಕಾದ ಒಳಗಣ್ಣಿನಿಂದ ಶ್ರೀ ಹರಿಯನ್ನು ನೋಡಬೇಕಾದ ಯೋಗಾಭ್ಯಾಸ ಮಾಡಿದ ಉಪದೇಶದಂತಿರುವ ಅನುಭವಾಮೃತವನ್ನು ಹರಿದಾಸರ ಕೀರ್ತನೆಯಲ್ಲಿ ಕಾಣುತ್ತೇವೆ.
