ಯೋಗವು ಸರಿಯಾಗಿ ಬದುಕುವುದಕ್ಕೆ ಸಂಬಂಧಿಸಿದ ವಿಜ್ಞಾನ. ಆದ್ದರಿಂದ ದಿನನಿತ್ಯದ ಬದುಕಿನಲ್ಲಿ ಅಳವಡಿಸಿ ಕೊಳ್ಳಬೇಕೆಂಬುದೇ ಅದರ ಉದ್ದೇಶ. ಅದು ವ್ಯಕ್ತಿಯ ಶಾರೀರಿಕ, ಜೈವಿಕ, ಮಾನಸಿಕ, ಭಾವನಾತ್ಮಕ, ಅಭೌತಿಕ ಹಾಗೂ ಆಧ್ಯಾತ್ಮಿಕ ಮೊದಲಾದ ಎಲ್ಲ ಅಂಶಗಳ ಮೇಲೂ ಪ್ರಭಾವ ಬೀರುವಂಥದ್ದಾಗಿದೆ. ಯೋಗ ಎಂಬ ಪದಕ್ಕೆ ಐಕ್ಯತೆ ಅಥವಾ ಏಕೀಭವಿಸು ಎಂಬ ಅರ್ಥವಿದೆ. ಇದು ಸಂಸ್ಕೃತದ ಯುಜ್ ಎಂಬ ಮೂಲಪದದಿಂದ ನಿಷ್ಪತ್ತಿಯಾಗಿದ್ದು, ಸೇರಿಸು ಅಥವಾ ಕೂಡಿಸು ಎಂಬುದು ಇದರ ಅರ್ಥ. ಆತ್ಮವು ಪರಮಾತ್ಮನಲ್ಲಿ ಲೀನವಾಗುವುದು ಎಂಬುದು ಈ ಪದದ ಆಧ್ಯಾತ್ಮಿಕ ಅರ್ಥ. ವಾಸ್ತವಿಕ ದೃಷ್ಟಿಯಿಂದ ನೋಡಿದಾಗ ದೇಹ, ಮನಸ್ಸು ಹಾಗೂ ಭಾವನೆ ನಡುವೆ ಸಮತೋಲನ ಅಥವಾ ಸಾಮರಸ್ಯ ಸಾಧಿಸುವುದಕ್ಕೆ ಯೋಗವು ಒಂದು ಸಾಧನ. ಇದನ್ನು ಆಸನ, ಪ್ರಾಣಾಯಾಮ, ಮುದ್ರಾ, ಬಂಧ, ಷಟ್ಕರ್ಮ ಹಾಗೂ ಧ್ಯಾನಗಳ ಮೂಲಕ ಸಾಧಿಸಲಾಗುತ್ತದೆ. ಪರಮಾತ್ಮನಲ್ಲಿ ಲೀನವಾಗುವ ಮೊದಲು ಈ ಸಿದ್ದಿಯನ್ನು ಗಳಿಸಿಕೊಳ್ಳಬೇಕಾಗುತ್ತದೆ.
