ಇಡೀ ಪ್ರಪಂಚದಲ್ಲಿ ಕರೊನಾ ರೋಗಕ್ಕೆ ಹಲವಾರು ಆಧುನಿಕ ಔಷಧಿಗಳನ್ನು ಬಳಸುತ್ತಿದ್ದಾರೆ. ಆಧುನಿಕ ವೈದ್ಯರೇ ಹೇಳುವಂತೆ ಈ ರೋಗಕ್ಕೆ ಸೂಕ್ತ ಚಿಕಿತ್ಸೆ ಇಲ್ಲ. ಆದರೂ ರೆಮಿಡಿಸಿವಿರ್, ಕಾರ್ಟಿಜೋನ್ ಮುಂತಾದ ಔಷಧಿಗಳನ್ನು ಪ್ರಯೋಗಿಸುತ್ತಿದ್ದಾರೆ. ಇದು ಮೆಚ್ಚುವಂಥದ್ದೇ. ಆದರೆ ಇವುಗಳಿಂದ ರೋಗಿಗಳಿಗೆ ಮಧುಮೇಹ, ಶ್ವಾಸಕೋಶದ ಕಾಯಿಲೆಗಳು ಉಪದ್ರವಗಳಾಗಿ ಬರುತ್ತಿವೆ. ಎಷ್ಟೋ ಜನರು ಶ್ವಾಸಕೋಶದ ರೋಗಗಳಿಂದ ಮರಣ ಹೊಂದುತ್ತಿದ್ದಾರೆ. ಋಷಿಗಳ ಮೂಲಕ ಗ್ರಂಥಗಳ ರೂಪದಲ್ಲಿರುವ ಆಯುರ್ವೆದವನ್ನು ಭಾರತೀಯರು ಸುಮಾರು ಐದು ಸಾವಿರ ವರ್ಷಗಳಿಂದ ಬಳಸುತ್ತಿದ್ದಾರೆ. ಅಂಥ ಆಯುರ್ವೆದದ ಔಷಧಿಗಳಿಂದ ಬಾಬಾ ರಾಮದೇವ್ ಅವರು 200 ರಿಂದ 300 ಕರೊನಾ ರೋಗಿಗಳನ್ನು ಗುಣಪಡಿಸಿರುವುದಾಗಿ ಹೇಳಿಕೊಂಡಿದ್ದರು. ರಾಜ್ಯದಲ್ಲಿಯೂ ಡಾ. ಗಿರಿಧರ ಕಜೆ ಅವರು ಬೆಂಗಳೂರಿನ ವಿಕ್ಟೋರಿಯ ಆಸ್ಪತ್ರೆಯಲ್ಲಿ 10 ರೋಗಿಗಳನ್ನು ಗುಣಪಡಿಸಿರುವುದಾಗಿ ಹೇಳಲಾಗುತ್ತಿದೆ. ಹೀಗಿದ್ದರೂ ಇನ್ನೂ ಹೆಚ್ಚಿನ ರೋಗಿಗಳನ್ನು ಗುಣಪಡಿಸುವ ಅವಕಾಶವನ್ನು ಅವರಿಗೆ ಏಕೆ ಕೊಡಲಿಲ್ಲ ಎಂಬುದು ಅರ್ಥವಾಗುತ್ತಿಲ್ಲ.
