ನಾವು ನಮ್ಮ ಜವಾಬ್ದಾರಿಯಿಂದ ತಪ್ಪಿಸಿಕೊಳ್ಳಲು ಇಲ್ಲಸಲ್ಲದ ನೆಪಗಳನ್ನು ಹುಡುಕಲು ಹಾತೊರೆಯುತ್ತಲೇ ಇರುತ್ತೇವೆ. ಒಂದೊಮ್ಮೆ ಯಾವುದಾದರೂ ಕೆಲಸ ಮಾಡಬೇಕೆಂದುಕೊಂಡರೂ ಅದರ ಪ್ರತಿಫಲದಲ್ಲಿ ಹೊಗಳಿಕೆಯನ್ನೋ, ಆರ್ಥಿಕ ಲಾಭವನ್ನೋ ಹುಡುಕುವ ಲೆಕ್ಕಾಚಾರದಲ್ಲಿರುತ್ತೇವೆ. ನಮ್ಮ ಅಹಂಕಾರವನ್ನು ತಣಿಸಿಕೊಳ್ಳಲು, ಯಾವುದೋ ಅಧಿಕಾರದ ಗದ್ದುಗೆ ಹಿಡಿಯಲು, ಇತರರ ಮೇಲೆ ಪ್ರಭುತ್ವ ಸಾಧಿಸಲು, ಜನರು ಹೊಗಳಲೆಂದು ಒಂದಷ್ಟು ಒಳ್ಳೆಯ ಕೆಲಸವನ್ನು ಮಾಡಲು ಮುಂದಾಗುತ್ತೇವೆ. ಇವು ಯಾವುಗಳೂ ಲಭಿಸಲು ಸಾಧ್ಯವಿಲ್ಲವೆಂದರಿತರೆ ಅವುಗಳಿಂದ ತಪ್ಪಿಸಿಕೊಳ್ಳಲು ಮುಂದಾಗುತ್ತೇವೆ. ಆದರೆ, ಇಂತಹ ಪ್ರಯತ್ನಗಳು ಕ್ಷಣಿಕವಾದ ಸುಖದ ಅನುಭೂತಿ ತಂದುಕೊಡಬಹುದು ವಿನಃ ಆತ್ಮತೃಪ್ತಿಯನ್ನಲ್ಲ. ಮಾಡುವ ಮನಸ್ಸಿದ್ದರೆ ಯಾವುದೇ ಕೆಲಸ ಅಸಾಧ್ಯವಲ್ಲ. ನೂರೆಂಟು ಕಷ್ಟಗಳು, ಸಂದಿಗ್ಧತೆಗಳ ನಡುವೆಯೂ ಸದಾವಕಾಶಗಳ ಸಾವಿರಾರು ಹಾದಿ ಗೋಚರಿಸುತ್ತಲೇ ಇರುತ್ತವೆ. ನಾವು ಸತ್ಕರ್ಮಗಳನ್ನು ಮಾಡುವುದಾದರೆ ಅದು ಎಲ್ಲರ ಮೆಚ್ಚುಗೆಗೆ ಖಂಡಿತವಾಗಿಯೂ ಕಾರಣವಾಗಬಲ್ಲದು. ಇದು ವ್ಯಕ್ತಿತ್ವಕ್ಕೆ ಮೆರುಗು ತಂದುಕೊಡುತ್ತದೆ. ಆತ್ಮತೃಪ್ತಿಗೂ ಕಾರಣವಾಗುತ್ತದೆ.
