ದೇವರನ್ನು ಪೂಜಿಸುವಾಗ ದೇವರು ನೋಡುತ್ತಿದ್ದಾನೆ ಎಂದು ಭಾವನೆ ಇರುತ್ತದೆ, ಆದರೆ ತಪ್ಪುಗಳನ್ನು ಮಾಡುವಾಗ ಕೂಡ ದೇವರು ನೋಡುತ್ತಿರುತ್ತಾನೆ ಎಂಬ ಎಚ್ಚರ ಇರಬೇಕು. ಕೆಲವರು ದೇವರನ್ನು ಚಿನ್ನದಲ್ಲಿಟ್ಟು ನೋಡಿದರು, ಇನ್ನು ಕೆಲವರು ಬೆಳ್ಳಿಯಲ್ಲಿಟ್ಟು ನೋಡಿದರು, ಮತ್ತೆ ಕೆಲವರು ಕಲ್ಲಿನಲ್ಲಿ ಭಗವಂತನನ್ನು ಕಂಡರು. ಆದರೆ ಭಗವಂತ ಒಲಿಯುವುದು ಮನಸ್ಸಿನಲ್ಲಿಟ್ಟು ಪೂಜಿಸಿದಾಗ ಮಾತ್ರ. ದೇವರು ನಮಗೆ ಬೇಕಾದುದೆಲ್ಲವನ್ನು ಕೊಡದಿದ್ದರೂ ಅಗತ್ಯವಾದುದನ್ನು ಕೊಡುವುದನ್ನು ಎಂದೂ ಮರೆಯುವುದಿಲ್ಲ. ಹಾಲಿನಲ್ಲಿ ಬೆಣ್ಣೆ ಇದೆ. ಆದರೆ ಅದು ಕಾಣಬೇಕಾದರೆ ಹಾಲನ್ನು ಕಾಯಿಸಿ ಹೆಪ್ಪು ಹಾಕಿದ ನಂತರ ಮೊಸರಾದ ನಂತರ ಅದನ್ನು ಕಡೆಯಬೇಕು. ಹಾಗೆಯೇ ದೇವರು ಸರ್ವವ್ಯಾಪಿಯಾಗಿದ್ದರೂ ಕಣ್ಣಿಗೆ ಕಾಣಿಸುವುದಿಲ್ಲ, ಭಕ್ತಿ-ಉಪಾಸನೆ ಎಂಬ ಹೆಪ್ಪು ಹಾಕಿ ಜ್ಞಾನವೆಂಬ ಕಡೆಗೋಲಿನಿಂದ ಮಥಿಸಿದಾಗ ಪರಮಾತ್ಮನ ಸಾಕ್ಷಾತ್ಕಾರವಾಗುವುದು. ನಾವು ಮಾಡುವ ಪ್ರತಿಯೊಂದು ಕೆಲಸಕಾರ್ಯಗಳಲ್ಲಿ ದೇವರನ್ನು ಕಾಣುವ ಮನೋಭಾವ ಬೆಳೆಸಿಕೊಳ್ಳೋಣ.
