ಚಳಿಗಾಲದಲ್ಲಿ ನೊ0ೕವು ಹೆಚ್ಚಾಗಲು ಸ್ಪಷ್ಟ ಕಾರಣವನ್ನು ಆಧುನಿಕ ವಿಜ್ಞಾನ ಹೇಳಿಲ್ಲ. ಆದರೂ ರಕ್ತ ಸಂಚಾರ ಮಿದುಳು, ಹೃದಯ ಮುಂತಾದ ಅಂಗಗಳಿಗೆ ಹೆಚ್ಚಾಗಿ ಸಂಧಿಗಳು ಮತ್ತು ಮಾಂಸ ಖಂಡಗಳಿಗೆ ರಕ್ತ ಸಂಚಾರ ಕಡಿಮೆಯಾಗಿ ನೋವು ಹೆಚ್ಚಾಗುತ್ತದೆ ಎಂದು ನಂಬಲಾಗಿದೆ. ಆಯುರ್ವೆದದ ಪ್ರಕಾರ ಚಳಿಗಾಲದಲ್ಲಿ ವಾತ ದೋಷದ ಪ್ರಭಾವದ ಕಾರಣದಿಂದಾಗಿ ನೋವು, ಬಾವಿನಂತಹ ತೊಂದರೆಗಳು ಹೆಚ್ಚುತ್ತವೆ. ಹಾಗಾಗಿ ನಾವು ಈ ಕಾಲದಲ್ಲಿ ವಾತ ದೋಷವನ್ನು ಶಮನ ಮಾಡುವ ಆಹಾರಗಳನ್ನು ಹೆಚ್ಚಾಗಿ ಸೇವಿಸಬೇಕು. ವಿಶೇಷವಾಗಿ ಒಳ್ಳೆಯ ಕೊಬ್ಬನ್ನು ನಾವು ಸೇವಿಸಲೇಬೇಕು ಅಂದರೆ, ನಾಟಿ ಹಸುವಿನ ಹಾಲು, ತುಪ್ಪ, ಗಾಣದಲ್ಲಿ ತಯಾರಿಸಿದ ಎಣ್ಣೆ ಮತ್ತು ಒಣ ಹಣ್ಣುಗಳನ್ನು ಹೆಚ್ಚಾಗಿ ಸೇವಿಸಬೇಕು. ಮಾಂಸಾಹಾರಿಗಳು ಆಡಿನ ಮಾಂಸರಸ ಅಂದರೆ ಮೀಟ್ ಸೂಪನ್ನು ಸೇವಿಸಬೇಕು. ಇದರಿಂದಾಗಿ ವಾತ ದೋಷ ನಿಯಂತ್ರಣಕ್ಕೆ ಬರುವುದಲ್ಲದೇ ಮಾಂಸ, ಮೂಳೆ, ಮಜ್ಜೆ ಮುಂತಾದ ಧಾತುಗಳಿಗೆ ಪೋಷಣೆ ಸಿಕ್ಕಿ ನೋವು ಕಡಿಮೆಯಾಗುತ್ತದೆ. ಆಯುರ್ವೆದ ವೈದ್ಯರ ಸಲಹೆ ಮೇರೆಗೆ ಲಕ್ಕಿ ಸೊಪ್ಪು, ಶುಂಠಿ, ಅಮೃತಬಳ್ಳಿ, ಬಲಮೂಲ ಮುಂತಾದವುಗಳ ಕಷಾಯ ಮಾಡಿ ಸೇವಿಸಿದರೆ ಚಳಿಗಾಲದ ನೋವನ್ನು ಹತೋಟಿಯಲ್ಲಿಟ್ಟುಕೊಳ್ಳಲು ಸಾಧ್ಯವಾಗುತ್ತದೆ.
